Misiangtho Don Bosco (Khangno te’ lawmpa) tangthu tom

Misiangtho Don Bosco aka John Bosco (Khangno te’ lawmpa) tangthu tom

Misiangtho Pawini: 31st January – Mi Siangtho St. John Bosco (St. Don Bosco) pen Salesian Kipawlna a phuankhia pa hi-a, a khankhiat na pen lokho innkuan pan genthei takin kum 1815 kum in Italy gam, Becchi khuano pan apa Francis Bosco leh anu Margaret te sungpan a piang hi. Amau unau thum pha uh a, a u tegel pen Anthony leh Joseph te a hi uh hi. A neulai himhim panin milamdang khat hi-a, anu Margaret in nisim in Pasian thu hilhin thungetna te hilh den a, lawmhoih lo tawh kikholh loh ding pen nakpi takin khaam den hi.

A hi zongin a nu thu manglo in lawmhoih lo tawh kikhawl veve a, a nu-in a taai ciangin, Bosco in, “Nu-aw, hih mi tetawh kikholh ding hong phal in, banghang hiam cih leh migina lo a hih uh hangin kikholhpih in ka kimawlpih kawm mahin Pasian thu ka hilhthei a, gina lel uh hi.” a cilel hi. Tua bangin a lawm gina lote pen hoihtak makaihna tawh lamman tot sak dingpen a tup lian pen a hi hi. A lawmte lakah a om ciangin a kimawl siamna acrobatics, mitphial, leh a music siamna te zangin kimawlna tuamtuam tawh a lawmte a lungkim sak thei mahmah hi.

Bosco pen apa in kum nih a phakin sihsan a, anu Margaret in gentheih haksakna tampi kawmkal panin pantah toto hi. Tua bang kawmkal ah, aneu lim pan a lunggulh siampi suah ding pen hong sinto thei-a, kum 1841 kum-in siampi(phungzi) hong suak zo hi. Siampi a suah khit phetin Turin khua ah khangthak te pattah dingin siampi nasep hong kipan hi. Tua bangin khangthak naupang te pen a Nu leh a Pa te in a kepdan lianin itna tak leh deihsakna tak tawh hong pantah toto a, naupang te in zong it thei mahmah uh hi.

A nini-in naupang zong hong ki behlap toto a, kum khat sungin naupang 900 bang hong pha uh hi. Nipi ni leh hun awng khempeuh ah, Missa bawlpih in kimawlna tuamtuam tawh kopkawm in Pasian thuhilhna(Catechism) te nei-in, tua bang tawh ‘Oratory’ a kici-khangno te kimawlna tawh kopa Pasian thu pattahna hong kipan to thei a hi hi.

Don Bosco in a siamna leh a pilna khempeuh siitlo-in khangthak naupang te a dingin zanga, sun leh zan cih omlo-in na nakpi takin sem a, zan khat nai nga zong ihmu zo ngeilo hi. Christian upna picing tak leh midang te a dinga kipia khiat nopna lungsim ngiat tawh khangthak naupang te a dinga nasep pen a tup lian bel a hi hi. Mizawng naupang te, a kem ding a neilo naupang te kaikhawm in nitak sang te bawlsak a, tua banah nasep neilo khangno vakvai te zong kaikhawmin a nasep dinguh vaihawm sakin, khedap sia khui, puankhui leh laibu khui dan te hilhin a pantah hi.

Salesian Society (Society of St. Francis De Sales) a patkhiatna thu: Naupang hong tamto tektek in, laisiam masa sa in a dangte kihilh sawn to zel uh a, pawlkhat in siampi lai sin to in, pawlkhat te leuleu in lai zong sin khollo in amah huhin a om uh hi. A nasep dan thupi ki sa lua a hih manin khangno tampi tak ngah beh zel a, tua bang teng tawh mi 22 tawh kum 1854 tak ciangin Salesian Society (Society of Francis De Sales) hong ding khia hi. Pasian Kha Siangtho makaihna lianpi tawh a sih kum 1888 kum takciangin naupang 773 hong neito hi.

1872 kumin Salesian Sister kici “Daughters of Mary Help of Christians” (FMA) pen Mary Mazzarrello makaihna tawh hong pan khia hi. 1875 kumin Italy gam bek hilo, gampua S. America ah missionary masa bel hong khahkhia zo ta uh hi. Tua hun panin France, Spain leh leitung mun tuamtuam ah hong kizel zo ta uh hi. Tu-in a hih leh Salesian Society pen leitungah Biakna Kipawlna nasep lian khat hong hi ta hi.

Gam 134 ah tu laitakin Salesian siampi leh tangval siangtho 14,500 te’n khangthak te a dingin nasem ta uh hi. Khangno te Pasian thulam leh leitung pilna lamah ki makaih na ding ngimna tawh tu laitak in leitung mun tuamtuam ah, Don Bosco min tawh Salesian sang tampi tak om ta hi. Tua bek thamloh Pasian thu tangko (missionary) dingin leitung mun tuamtuam ah khahkhia uh a, Parish leh Pawlpi a dingin nakpi takin na hong sem to ta uh hi.

Tu laitak in India gam bekbek ah province 11 sungah kikhen in Pasian na lim sep mahmah uh hi. Tua province 11 te: Bangalore, Chennai, Mumbai, Kolkata, Hyderabad, Guwahati, Dimapur, New Delhi, Trichy, Shillong, Panjim-Goa te ah khangno te a dingin nasem uh hi. Mizoram sung mahmah ah zong Shillong province sungah a om-Saiha, Seling, Lawngtlai leh Thenzawl te ah Salesian siampi te’n nasem uh hi.

Salesian Misiangtho Te: A tunga i gen samah bangin Don Bosco in naupang leh khangthak tampi tak a nuntakna uh puahpha a, tua lak ah zong Misiangtho tampi takmah suak khin ta uh hi. Tua lak ah kum 15 bek apha Dominic Savio bangpen Misiangtho in ciaptehna ngah khat a hi hi. Naupangno in Misiangtho himah ta leh leitung mun khempeuh ah a nuntakna leh a sianthona thu kizel a, khangno tampi tak Pasian lamah thahat sak tuam mahmah hi.

Don Bosco naseppih Salesian nungak siangtho FMA makai Mary Mazzarrello zong Misiangtho in ciaptehna ngah khat mah a hi hi. Tua bek thamloh in, Spain leh Sengam ah Salesian missionary tampi tak te zong Pasian min tawh sisan luanna tawh sihna thuak te(Martyrs) in ciaptehna ngah uh hi. Tualo zong tampi takmah Misiangtho in ciapteh dingin om uh hi. Salesian society te in Don Bosco nasep pen citak tak in zom to uh a, leitung mun tuamtuam ah khangno te leh a diakdiak in mizawng mi genthei te a dingin na naksep mahmah uh hi. Misiangtho Don Bosco aw..Kote a dingin thu hong nget sak ta’n!!!! Source: Fr. John Zosiama SDB (St. Don Bosco) Mizoram, India