Mipite’n Tawm Nangak Lai Un ~ Pu Thangboi

Mipite’n Tawm Nangak Lai Un ~ Pu Thangboi

Tulai thusia lasia tampi a om ciang in mipi sung ah Zomi kipawlna pawlkhat te’ tung ah hawmthawhna leh ngaklahna thu tuamtuam ih za hi. Tua ahih man in kei’ theihkhak sunsun sung pan mipi’ theih ding a kilawm kasak tawm kong hawmsawn hi.

Thautawi Vai

Thautawite pen khat leh khat dinmun kibanglo in ngimna taktak zong kibang khin hetlo hi. Thautawi thahatte himhim pen gam khatpeuh tawh hoihtak akizom akizawl theite hi hamtang hi. Gentehna in:

KIO/KIA in Sen te’ mit-hek en a agamtat loh phamawh hi. KNU/KNLA in Thai te’ mit-hek a et akul hi.

Tua mah bang in ZRO/A in zong India te’ mit-hek et akul ahi hi. Atung a kumpi 3 teng bang in tulaitak a misokte tawh akizopna uh khah nai hetlo uh ahih lam phawk huai hi. March 27 ni Naypyitaw ah avapai gam 8 lak ah atung a 3 teng kihel hi.

Mipi lungphona ah thautawite khawng hong kigolh ding a ih lam-et pen thumuh vai phalo hi. Mihingte ih utbang in agamta thei tek ding himawk leng leitung nuam hetlo ding hi.

Tu’n kawlgam zingvai hawm ding a kiphuan thak kipawlnapi ahi NUCC sung bang ah thautawite sung pan Kachin thautawi min pen KIO/KIA ong hi nawnlo hi. Kachin mipi in zong “KIO/A in bang sem hiam?” ci’n phun selo hi. Ahang om ahih lam thei uh hi.

(NUCC bang hiam cih na theih naikei leh tulai khuahun tawh kisai kuamah gensia nai hetkei in. Thu kan phot in) Ih theih ding ah thautawi kipawlna makaite mihai khat zong omlo hi.

Federal Army Vai

Federal Army bel tangtawng akipan ei mualmi te’n ih deihpen leh ih lunggulh pen ahi hi. Federal vai ah Men Ong Lai leh Ong San Suh Cii te alungsim uh akibang linlian ahi hi. Tulaitak a gilo misok kawl galkapte phiatmai ding ngimna ah kawl thautawi gina dang khat a om masiah kawlte ut hetlo ding cih phawk huai hi.

Ong genpha ning

Tulaitak a misokte deihlo a kitom kawl mipi sung ah thautawi kipawlna gina hong om masiah Federal Army vai kawl te’n ngaihsut in zong nei nailo uh hi. Social media sung a kigengente khawng zuau vive leh kikhemna vive ahi hi. Federal Army vai gamla mahmah lai hi.

Bang Cih Ding ?

April kha a kipan kawlte hong kithawi tading uh a amau ong hat ciang in kisam asak uh leh Federal Army vai hong ngaihsun ding uh hi. Tutadih pen lungphona a kihel Zomi te’n luang le ban sawng liang in na kipiakha peuhmah kei un. Sih genloh matthuak ding zong pammaih mahmah hi hang.

Tawm Nangak Un

Zomi kipawlna makaite hoihtak akikup laitak uh ahih man in ei’ ading ahoihpen ding hong gel ding uh hi. Tawm khat lungduai in nangak lai un. Citawm mahmah lai ih hih man in kihei khial leng ong ki valhtum ziau ding hi. Ih ngaklah tazong in lungduai sak ni maw guai. Sian Aw Lum Bang Hong Sung In, Mung Laan Thang (Tawmvei, Yangon)