Mipi mai ah Thugensiamna (Part 4) ~ AS Thangbawk

Mipi mai ah Thugensiamna (Part 4) ~ AS Thangbawk

31. Na lungsim leh pumpi tawldamsak in.

Mipi mai ah thugen dingin na kipat ciangin take a deep breath (na sungtawng dong a tungdingin huihdik masa in). Na sungah huihte second 5 sungbang omsak inla tuaciangin damtak mah in khahkhia in. Tuabangin 5-6 bang hih inla nanglenang na lungsim sungah a hoihlam in ki mu in. A siam, mite’ lungsim a zo mahmah in kimu in. Mite maiah hangsantak in thu a genziahziah thei na hihna na lungsim sungah pulak in. Tua in na pumpi hong nemsak dingaa na lungsim hong hangsak ding hi.

32. Kiciansak mahmah in.

Tangthu leh mi min te na gennopleh a kum, a mi min cihte na gentheih lianlian ding kisam hi. Laisungah ciamteh inla gen in. Na kammal zatdan, laigual paizai leh grammartically taka na gentheihding hanciam in. Kammal paizai malo tawh mite mai ah sawtpi thugen dingin hong kideihlo ding hi.

33. Na gending thu nei limlim in.

Kam a paunuam mi na hihding kisam hi. Na lungsim sungaa om thute midangte kiangah gensiam in. Na lungsim sungaa om nate mite in khamit tawh teltak a muhtheih nadingin na kamtawh na gensiam ding ahihi. Na thu pen mi te’n mittawh mu ding cihzahdongin hanciam in.

34. Maizum ngei kei in.

Leitungah na nuntak laiteng thu a gending na hihi. Koi mun koigam na tungzongin, koi koi peuhah na omzongin kam na pauloh a phamawh a hihi. Na mai a zumleh zunbuk leh mite muhlohna ah kisin in. Stage launa pen mikhempeuh lungsim sungah om kim hi. Actor siampen te zong video a kizaih simsim in a kisin tangtang mah hiaa siamkhin ingh cih omngei peuhmah lo hi.

35. Thupi ngaihsut in.

Kampau siamna pen leitung kongkhak tawh kibang hi. Kam na pau siamleh teltheihna kongkhak khempeuh na maiah a kihongsa hipah lel hi. Nanglenang thubek zong a hoihzawdeuh in ki gentheih sawmphot limlim in. Tua hileh mite na na kizopna hong kihong ding hi.

36. Mi te zaknop te mah gen in.

Galpi nihna lai in ka inn ah Galkap bu khat hong hawhthei zel hi. Tuapa pen midangte banglo in ka ta te in it mahmah se uh hi. A hang ka kankan leh ka inn ah hongpai sim in ka tate zaknop thute genpih tangtang hi. A taktak in gal sungthu genleh kilawm napi galthu genlo in ka tate kiangah gunkuangthu genpih den hi. Banghanghiamcihleh ka tate in gunkuangthu bek a theihnoplaitak uh a hihi. Hihpen mite’ lungsim lakzawh nading a thupi pen thugensiamna khat a hihi. (Cargenuzh)

37. Na hamphat pih dongin kisin in.

Mipi mai ah na thugen theihna in ulenau sungah mun hong pia hi. Na siamna hong khangsak hi. Lawmhoih tampi hongpia thei hi. Na sumbawlna leh na nasepna ah hong lamsang thei hi. A sangzawna mun ah hong kahtohpih thei aa makai in hong bawlthei hi. Kampau siamte a khasum khangbaih zaw hamtang hi. Tua ahihmanin kampau kisin in. Hamphatna tampi na ngahlawh taktak ding hi. (Mimal tawh ki hona ah) Mi haksa, mi genhak te bangcih zawh theih ding…
Nisim nuntakna ah i hopih ngampakloh, ki muhpih ding i ut luatloh, haksa i sak mi omthei hi. Tuate tungah bangcibangin i kizopna ah zawhna ngah thei ding hiamcih tawm gen ding hihang.

38. A thugen te hoihtak ngaihsak in.

Mi a tamzaw te in thu gen nuam mahmah uh hi. A thugen a ngai ding mi deih mahmah uh hi. A ma gennop teng kiciantak na ngaihsak kei leh na thugen a bilsungah lut ngeilo ding hi. A lungsim tawng ah bangthu omhiam cih na tel dongin ngai dide phot in. A kampau tuh kei in. Thungai dingin pai in.

39. Na lungsim daisak in.

Na lungtang kisaina ngai inla om hithiat in. Linglawng gawp kei in. Bangthu khat peuhpeuh hong genzong na lungsim kemcing in. Hehlo dingcih khentatna a neisa in pai in.

40. Mawhsak ngei kei in.

Thu khat peuhpeuh hong genciangin a hizongin, a sumbawlna, a innkuan sungthu, a lawm te tawh a kizopna khat peuhpeuh ah a ma mawhna genkik kei in. Khialteh ci kei in. ‘Na tuacihlohbel, tuacih zawlo a’ cihdante hong dot keileh genpeuhmah naikei in. A kiphatsakna sukha ahihmanin tuabang kammalte zanuamlo hi. (azom Part 4 nasimsuak vemaw) AS Thangbawk