Mipi ading a hangsan Pu Hau Khen Kham (Ngaihte)

Mipi ading a hangsan Pu Hau Khen Kham (Ngaihte)

Pu Hau Khen ong nusiatna ka zak ciangin katha nem mahmah a, amah tawh ka hunzat khopnate ka ngaihsun kikkik hi. Gen ding sut ding tampi ka lungsim ah ong suak daudau hi.

Abeisa a i gen ngeisa a hih hangin a panmun kham liangin tangpi ading a mapanna mah in ka lungsim ong zo mahmah ahih manin khat vei gen kik nuam lai hang.

Union thuneite le State thuneite vaihawmna khat a thalnialna thu ahi hi. Hih pen mipi ading a deihsak luat man hi a, a taktak in tu ni ciang dongin state level in Union te thu a nang zo nai vetlo ahi hi. Tua pen 29 March 2013 ni hi a, Gullu vai ahi hi.

Company le Union thuneite

Tua hun laitakin Union thuneite in Gullu mual a to ding Sen Companyte tawh na kithu-min khin uh a, nasep akipan ding uh hi ta hi.

Mipite in hih thu ahemlam in a kitheih pen 2012 kum beikuan pawl ahi hi. Asia apha ding kua mah in siang takin gensiang theilo dinmun ahih manin mipi sungah lung hihmawhna le ngaihsutna nam tuamtuam ong om hi.

Mipite thupomzia

Ahuampi in bel Mipite in Sen companyte le kumpite mahmah a kimuang zo phalo hi mai hi.

Tua ahih manin gullu vai ah kumpi thuneite tawh kinawkna ong om toto hi. Mipite khut kilen in ma kipang khawm hi. Gam sung gam pua, sak le khang, Kawl le Zo, Khangno le Siamsinte, numei naupang khutkhat tawi khekhat khai in kipangkhawm hi. Thaneih zahin kihanciam.hi.

State thuneite thupomzia

Mipite khut kilen in khua tuamtuam kipawlna tuamtuam, mipi’muan le suan tuamtuam, MPte kiangleh kumpi thuneite kiang nangawn ah lut tantan in mipite lungsim ong la photphot dih un ci in kipai tantan hi.

Pu Hung Ngai (Chief Minister ) in “Union thu vaihawmna hi. Ei cih theih bangmah om kei” ci in ong sianggen bilbel hi.

Pu Hau Khen (State speaker) le Pu Hung Ngai (Chief Minister) tawh kimu

Pu Hung Ngai’ kammal pen media tuamtuam le phone tawh kiho na pan a kithei bek ahih manin amah tawh khat vei maitang kimu limlim in mipi lungsim omzia gen limlim thei leng hoihding hi cih lunggulhna tawh guahzu meikai nuai ah Hakha paito in ama zum inn mai ah lawm Zam Thuam tawh ka ding cip uhi. A P A (Personal assistant ) pa le Wuangyi dangte in i Pu hehsak kha ve ni aw ci in ciah dingin ong zolzol uhi. Ong zol zel ong tai zel ong vau zel uhi.

A zum sungah giak sam lo ding aihteh ong pusuah peuhpeuh ciang kimu thei lel ding cih ahi hi. An ne ong pusuah ciangin ka delh pah uh a, gen nop teng ka gen samsam uh hi. Wuangyi dangte in ong gal et dimdiam uhi. A hi zongin akammal kikhel tuam lo hi.

A za ni in Sia Thang Za Khual (Khual Suante) deihsakna tawh pu Hankhen tawh lungkim huai takin ka kimu thei uhi. Gullu vai thu omzia teng ka gen uh ciangin mipi lung himawh lua ahih leh kei mahmah in banglo khat kong hanciam loh phamawh ding ai ve maw,” ong cih san hi.

Gambup thu omzia

21 Febuary 2013 ni in campany te le State thuneite kimu in a nasepzia ding teng uh pulakna nei uh hi. Hih hun laitakin Kachin gam Mitsone le Letpaduang sumngo khuk vai nakpi takin a kibuai laitak ahi hi. Zogam ah zong Gullu Nickel vai so lihlih hi cih gambup theihpih dingin kihanciam mahmah hi. Tua bek tham loin Kachin, Shan, Kayin, Yanggon, Mandalay,…, mipi le kipawlna tuamtuamte tawh khat le khat kizopna bawlin lampi om bangbang tawh ma kipang hi.

Pu Hau Khem in mipi’ deihna thupi bawl

Gamsung thu omzia le mipi lunggulhnate amuh ciangin Pu Hau Khen in Pu Hung Ngai( Chief Minister ) kiangah” Union vaihawmna ahi phial zongin Zogam sunga Project lianpi kisem ding ahih manin State Hluttaw in a theihpih loh phamawh hi. Hluttaw ah hih Project vai gentelna le kikupna neihloh phamawh hi” na ci giap hi.

Hih vai hangin Pu Hau Khen le Pu Hung Ngai kikal ah zong kimai nopmawhna tampi pianlawh hi cih ka nung zak kik hi.

Mapan khopzia

Pu Hau Khen mah ong lung himawh in Gullu project vai State Hluttaw ah thukin takin ong lut theihna ding ong gel sak pah hi. Hluttaw sung ong tung peuhleh a kilawm ding bangin kong gel ding hi ong cih san hi. Hluttaw ah dothuai thulelate in na gel un la Pu Zozam in ong dong hen. Dottnate a dawngkik dingin company le kumpi thuneite na gen khol ding hi ing ci in kigel khawm hi. Hluttaw sungah Gullu vai kikup ding thu a om ciangin Pu Hung Ngai nak heh cih mahmah leuleu hi.

Hulltaw sung thupaizia

State Hluttaw pen 29 March 2013 in kibawl a, tua lai ah Pu Zozam in Gullu vai dotna nei a, thuneite le companyte in nasepzia ding leh a met hawmzia ding, kithukimna tuamtuam thute gentelna nei uh hi.

Pu Hua Khen in a thuneihna pen tua ciang bekah zang loin “ Nickel Project vai hih lai ah nong gen bangun mipite kiangah gen ding kisam hi” cih thukhentatna neih pih hi.

Mipi bulphut kipanta

Tua thukhentat tungtawnin Pu Hung Ngai makai in Minister 3 le MP a om teng ban ah companyte in Tedim, Kam Hau hall ah 1 April 2013 ni in mipi tawh kimuhkhopna ong neihpih pah hi. Hih kimuhkhopna dan pen kawlgam ah Galkap kumpi le Kumpi thak hun sung tawntung ading amasa pen hi ding hi ci in kigen hi.

Tua zom ah 2 April 2013 ni in Zonuamzang Khua le Dimzang khua ah Minister 3, MP te le companyte pai ngiat in State Hluttaw sunga a gen thute genkikna ong nei uh hi. Khua 14 panin mipi a kikaikhawm ahi hi.

Tua zomah May 17 ni in Tedim, Kam Hau hall ah Pu Hung Ngai maikai in mipi tawh kimuhna om leuleu hi. Tua ni bel khat le khat a kinuaizan mang dektak a, ahi zongin thusia lasia om loin kikhen thei liamliam cih ding ahi hi. (Hih kimuh khopna pen Rev.Thang Van Lian in lai in gelh in Zingsol Journal ah zong kisuak sak hi)

Hih bangin galkap hun le kumpi thak sunga a om nailo Project khat peuhpeuh ading mipi tawh kimuh khopna ong pian theihna pen mipite kithutuahna le Pu Hau Khen Kham in ama thuneihnate hangsan takin ong zat man ahi hi cih ka tel pha sansan hi. (nasep a khawl khit ciangin zong ka kimu zelzel uh hi. A lungduaina le pilvangna thute zom to lai ni.) Lian Tuang