Minambup nungtolhna ~ Lian Tuang

Minambup nungtolhna ~ Lian Tuang

Tu sunga thupiang tampi sung pan ka lungsim a ong luai den thu nih om hi. 1) Tedim a akem ding omlo khanghamte kepna inn (Bethany Old Age Care Home ) 2) Tedim Kawl biakna sang a naupang 240 vai te vai ahi hi.

Khangham kepna

Khangham kepna tawh kisai online khawngah zong ngiahsutna a tuamtuam om ngeingei hi. Ngaihsutna kibangkim loin hoih a sa tawh kilawm a sa lo tawh ki om hi.

Hoih a sa lote in “ Zongeina hoih tak zui peuhleng a kemding omlo pitek putek cih bang om theilo ding hi. Tua ban ah Khristian vive I hih manin I nu le pa or I pu le pi te hoih takin kem in thupha dawh huai hi, hoih tak kem ciat in, hih bang nasepna pen mindaihuailua hi” ci in ngiahsutna lunggulhna siksan in thu kigen tawh kibang ka sa hi. Hih pen ahi lua mahmah thu ahi hi.

Athu ka kankan ciangin a kemding a cingding mi a omlo takpi pitek putek a om manin hih bang thu a kivaihawm na hi zaw mawk hi. Ut le utloh thu hi loin kisam ahih manin a kisem na hi zaw ta hi. A vaihawmte le a gim atawlte thupi ka sa mahmah hi.

Khasiathuai lua

Hih thu pen Zogam ah apiang takpi thu ahi hi. Hih thu siksan in ngaihsut ding thu tampi ong om hi. Migam milei ah hi lo, Zogam leitang tung mahmah ah khangham khin pitek putek pawlkhat gilkial dangtakna le lungleng khuangaihna tawh mi kongzin daikawm mun khat peuh ah gulsih thamsih bangin a hu tawpna a sang ding om takpi hi tah a, ci in ka khasiat ong suak mahmah hi.

Zomi dimun

A thu dang khat in en leuleu leng hih vai pen tu lai Zomite dinmun ong lak thu khat zong ahi hi. Zomite in Upa khanghamte thupi sa lua khollo I hihna zong kilang ka sa hi. U le nau, beh le phung vai ah ki it kiveina thanem in ngeina le biakna thu laigilte ah zong a kiamsuk pianpian ahih na ong kilang ka sa hi.

A ciinhuai ngeina hoihte

I pu I pate nuntakzia tawm lungngai kik leng, zunek sanekna khat peuh a om ciangin khangham pen taltak pen mah masak uhi. Thu le la vaihawmna khat peuh a om ciangin zong upa thutheite beh le phungte mah kibulphuh den hi. Thu dong tangtang uhi. Itna zahtakna bulphuh in a neih bangbang uh ne khawm dawnkhawm gelkhwm thei uhi.

Hunthak dinmun

Ahi zongin tu lamlam ciangin khua le tui sungah mipil milian khatpeuh a om ciangin a maiet nuam le a gensia nuam in nam nih I kisuah lian hi. Ahi zongin a lungdampih ding kuamah I om zo mel kei hi. Ama thuneihna le a pil asiamna a khan laiteng lametna khat tawh ki maiet henhan in a thuneihna a om nawnloh ciangin mihai bangin I ko gawpgawp kik hi. Amaute u bawl pa bawl in thu le la dotding kuppih dingin kingaihsun kholkeileh kilawm ka sa hi.

I pu I pate hun lai hi leh tua bang mite thupi bawlin it bawl semsem dingin ka lamen hi. Khua le tui, gam le minam vaite ah mi masa upa taltakte thudong tangtang in, nu le pa zahtakin, khua le tui veng le pam sepna gelnate ah u zaw nau zaw I kibulhsiam ciang bek in a picing minam kisuak zo pan dingin i lamen hi. Hih pen I Zo ngeina taktak hi zaw hi.

Biakna makaite

Tua mah bangin biakna nasem makaite sungah zong mi masa sia masate zahtakna tawh u bawl pa bawlnate thanem mahmah tawh kibang ka sa hi. Zogam khristian tangthu a huampi in en leng biakna vai, upna vai taktak tawh buaina le pawlpi kikhenna pen 1970-80 kim in nasiatakin piang ngei hi.

Ahi zongin tu ni donga a kizomzom lai, pawlpi kikhenna le buaina tuamtuamte pen thudang tuamtuam le maikai vai khawng hi zaw a, upna biakna vai hi nawn khollo zaw hi. Pawlpi tuamtuam kipawlna tuamtuam ah kikhen in ei mun ciatah thakhauh in I biakinnte zong hoih thei mahmah hi. Ahi zongin mipite nisim nuntakzia taktak kipicing zo loin aituam lungsim pawllungsim tawh kidim in, u le nau beh le phung khua le tuipihte nangawn midang sadang bangin I kibawl zawsop thei hi.

Hih bangin I thahatna nangawn ah thu ginalo tawh a kizopna pen biakna nasem makaite in biakna vai ah mi masa upa talkakte u bawl pa bawl siam lua loin biakna naseppih sung nangawn ah u zaw nau zaw cih itna le kizahtaksiamna sangin pilna siamna leh neih le lam peuh bulphuh in tungnun kituhna khawng thakhuahlua kha ahi mai tam ci in khat veivei ka ngaihsun khazel hi.

Minam bup Nungtolh

Tanglai Pupa ngeina hoih nono tawh khang kizom in,Nangma pumpi na it bangin mi dangte na it in ( Matt 22:39 ) cih thupiakna tawh Khristian kum 100 a cingkhin Zomite sungah pianna nu le pa, pi le pu, upa makai khang masate thudon loin bek tham loin a nusia pampaihna nangawn I om theih lel mawk pen minam vai le biakna sung upna vaiah I nungtolhna lianpi khat ahi dingin ka lamen hi. Hih bangin minam nungtolhna apianna pen mimalkim khat le khat kikal ah ahun le amun zui in itna le kizahtaksiamnate a thanemna pan a kipan dingin ka lamen hi.

Innsung le Pulpit pan kipan

Khangham a kemding omlo pawlkhat I gam I lei ah om takpi cih pen a kimu thei a gahkhia thu hi a, tua bang apiangsak thu pen itna le kizahtakna cih thu laigilte Zogam ah luitui bangin a kiam man ahi hi ci in I gen khin hi. A khasiathuai mahmah I minam bup I nungtolhna guamthuk sung pan I suahtakna dingin lung kituak in hanciam loh phamawh hi u le naute aw.

Amasa in eima innkuan ciat pan I pan ding hi. Tu lai khangthakte in nu le pa a zahtakzia, upa makai mi masate zahtakzia, mipil misiamte zahtakzai pen inn pan nu le pate pattahna leh biakna sunga I muh I zak thu le I kimakaihzia tawh nakpi in kimemat dingin ka lamen hi. Tua ahih manin nu le pa leh biakna makaite in i bangkua sung, i pawlpi sung le i minam sungah khat le khat ki itna kizahtaksiamnate a thakin khat vei no suak sakkikna tawh i minam zunkik ni cih kizawn nuam hang.

Tedim a khanghamte kepna inn le thuvaihawmnate a lawhcin nadingin i hanciam khawm dinga, tua mun ah kuamah paipih a kullohna dingin zong i hanciam khawm ding hi.

Hih pen kei mimal ngiahsutna hi a,a thumanpen cihna hi lo hi. Laigual sau pian ta ahih manin naupang 240 te vai zong damdam in zom kik ni. Lian Tuang