Minam Lian (khen khatna) ~ Thang Khan Mang

Minam Lian (khen khatna) ~ Thang Khan Mang

Thu masa: Hih ka lai at in tulai Zomi te’ dinmun pan in asang zaw leh minam lianzaw ah bangci bang in tungto thei ding’ cih deihna hi.

“Tu laitak in Zomi 3 millions bang phata kici hi. Zomi te pen Sen (China) pan kipan in BC 1100 pan BC 525 a uk Zhou kumpi nam, Zhou suan te hi hang pawlkhat te’n ci uh hi. Shi Waiti tawh gal kido in gallel aa galtai in Zo gun (Chindwen gun) kuam teng ah kitung hi. Tua pan kawl ten Chin (China) ci’n hongsam uh hi. Bagan kumpi tawh gal kido in kilel ngeiaa, ki panpha kik in ki zokik hi. Tua gualzawhna pan in “Yaw Min Kyi” cih mintawh kawlgam ah kumpi khat in ki dingto hi.” (Dai sum Lai at tomlakna )

Pa, Kham Go Pau tawh zong ka ki hona ah, “Sen kumpi khang nam hi hang, sengam pan kitai hi” cih khat hong genngei hi. Tongsan sung aa minam vai genna tawh zong ki nai mahmah hi. Zomi te tangthu gen te in hih thu pom kim ciat uh hi. Tua bang mah in Zomi te pen Isreal minam te’ suan leh khak sung pan hi hang a ci zong om hi. Hih thu hang in India gam lam aa pawl te bang Isreal lam zuanzuan ta hi. Ahi zong thu mannn taktak theihna ding DNA et phalai ding ci hi. Zomi te tangthu pen a thei tampi te gen teng kan in gawmkhawm theileng cih ngaihsut huai ka sa hi.

Bang ci bang in minam lian tampi lak ah million 3 bek apha pan ei Zomi te minam lian khat hizo ding ih hiam cih thupi kasa hi. Mitampi te’n kipum khat ding ci uh hi. Zomi te ih kipumkhat hiam? Namdang te tawh ki et kak ciang in kilemlo phadiak ih hiam cihhuai hi. Zomi bup khantohna ding kipumkhatna kisam ahihleh kipumkhat theih na ding bang kisam hiam? Pasian in Abraham kiang ah minamlian asuah theihna ding apa innsung (milim bia milim zuak) leh a pa’ gam (milimbia gam) pan thupha nam 7 or thu 7 tawh kamciam in na samkhia hi.( Piancilna 12) Tua namlian suah theihna ding thu 7 te pen anuai aa bang hi.hih thu nam 7 te in pumkhat hong suaksak in hongtawisang ding thu 7 te ahi uh hi.

1. Minam tawisang Anungta Pasian bek hi

Late 33:12, “ Topa pen Pasian a anei minam, ama luah ding in teelna angah minam in thupha ngah a hi hi.”

Abraham tungah minamlian kong suahsak ding hi ci aa kamciam a pia pen tuni aa ei te biak anungta Pasian ahi hi. Pasian in ama tung ah “nang thupha hong pia te thupha ka pia ding aa hong samsia te ka samsia ding hi” ci hi. “Nasuan leh khak te vanaa aksi zah pung ding hi” ci lai hi. Tua lai tak in Jews or Isreal mi khat zong om nai lo hi. 2010 in USA ah Jew (Israel) minam te thein 500 val bang om aa USA bup ii 39.3% hi uh hi. Minam bup ii 40% pen USA ah teng uh aa 41% pen Israel gam ah teng uh hi. Adang teng pen leitung muntuamtuam ah teng uh hi. Minam lian bek thamlo in pilna lam ah sang mahmah uh hi. Tu nung diak in Israel gamsung thukan siam te a sawltak ding in Muvanlai zang uh hi ki ci hi. Hih minam te pen Nupa kopkhat sung pan’ hong khangkhia minam te a hi uh hi. Pasian in Isreal te bang in hong tawisang nuam hi. Anungta Pasian pen Zomi te Pasian ahihnak leh namdang te tung ah asangzaw in hong kitawisang ding hi.

Tu in Zomi pen 3 millions bang kipha ta hi. Leitung bup tuamin ki om ta hi. Banghang in Zogam pianna leitang nusia in leitung mun tuamtuam ah kithehthaang mawk ih hiam? Ih biak Pasian in Zomi te tawh sepkhop ding bang geelna nei hiam? Israel te Pasian in a teeltuamna hang in thupha sang ding cih bek hi lo hi. Pasian in Israel minam te tawh sepkhop ding vai lianpi nei hi. Pasian pen nasep masuan nei, a tawlnga ngeilo Pasian, mawhnei mi te gupkhiatna nasep a semden, a ta te masuan ah mapang den, piansak nate lusu lo aa akemcing den Pasian ahihman in tua nasep na ah Israel minam te tawh mapangkhawm ding geelna aneih bangmah in ei Zomi te tawh zong mapangkhawm semkhawm ding in geelna nei hi.

Pasian in amah tawh Zomi te mapangkhawm theihna ding in pilna siamna, nuntak khuasakzia leh namdang mite nunzia hong hilhnuam hi. Zogam pan ihngah pilna leh siamna, nuntak khuakhekzia , lungsim luanzia amah tawh mapang khop na ding in hong hawmthawh hi kha ding hi. Gamlian, gamkhangto te ah pilna hong sinsak in minamlian pi te lungsim ngahsut zia hong guan nuam hi. Minam lian hongsuah nuam a hi hi.

2. Minlian neih kul hi

Ih nam ih liatsak theih na ding “ Mimal kim in minlian, minhoih, minmanpha ih neih kim ciat kul hi. Nang’ namin asiat leh Zomi nam bup sia hi. Nang minphat na nangah ciang in zomi bup kiphat hi. Adah huai mahmah khat ah Zomi sungah miginalo mahmah khat hong om ciang Zomi pan kipaai thei tuanlo hi. Tua hihman in minam it ih hih leh minhoih minlian tawh nuntak ding kisam hi.

Mang Paunak khat ah “we are on the same boat” cih khat nei uh hi. Khat vei lai in mi honpi khat gunkuang tung tuangkhawm in khual hong zin uh hi. Tua te sung pan in mikhat in ama tutna nuai singvutna tawh vut sawm hi. Alawm te in “ lawm aw bang hihmawk na hiam ih vekpi in siatna hong tun nuam na hi hiam” ci in dong uh hi. Tua pa in dawng kik aa “hih teng kei ma mun hi, notawh kisai kei” ci in dawng hi. Ahi zong tua mun pan tui hong lut leh a vekpi in si ding uh hi. Nang na hoih leh Zomi te hoih ding aa nang nasiat leh Zomi bup sia ding hi.

Abaram (exalted Father) pan Abaraham (Father of many nation) (Gen 17:5) cih min pen Pasian piak hi. Jacob (mi khempa ) pan Migualzo pa cih zong Pasian piak hi. Minlian minpha minhoih pen nang gamtatna tung pan aa hong ki pia hi. Minhoih leh phatna pen ei laktawm hi kei midang te’ hongpiak hi zaw!

Minthang na pen nam nih om hi. Ahoihlam aa minthang na leh asia lam aa min thang na om hi Minthang na pen “ pengpelek ( butterfly) mat tawh ki bang hi ci hi. Pengpelek pen man ding in umum le cin lengleng den hi. Ahi zong munkhat ah tu hihiat le cin ama thu in hong leng ding aa nang ma tung hong tu ding hi” ci’n lai sung khat ah sim ngei ingh. Nang leh nang in min na deih luat leh mindai na tawh kizom pah hi. Pahtawina nangah ma in kisial kha ken ki tankik thei hi, kiminsiat pih thei hi. Hlee Duanhta Saw Chit, kawl lai at khat in “ mi kiphatphat te pen a mahleh amah picing kisa zolo, a niamna mi te theih ding alau te hi” ci hi. Nang leh nang na kiphatphat leh min hong enneu zaw ding hi. Thusia pel in om hihiat lel in minlian in hong zuan ding hi.

Tua ahihman in minthanna , minlian, vangliatna cih te pen apil, asiam, thuman cihtak leh Pasian zahtak te ading aa Pasian in a tuamkoih vilvel thupha hi. Kilawmlo pi aa minlian ngahna in maizum na piangsak zaw thei hi.

3. Mite aading thupha hi in

Jacob in a pu laban kiang ah na a sepman in laban neihsa khang hi. Joseph nasep na ah Topa’n ompih aa mapai hi. A omna inn sung ah neihsa lamsa khang hi. Namaan (galkap bupi pa) lungsim siangtho nei , mi citak mi ahihman in Topa’n thupha pia aa ama hang in Aram kumpi ( Ben Hadad II) leh agam bup un thupha sang uh hi. Nang hang in midang te’n thupha sang zaw maw siatna hong tung zaw. Zomi te hang in thupha om zaw maw siatna hong tung zaw cih ngaihsut huai hi.

Pasian azahtak te leh Topa Zeisu nei aa piangthak mi te nasep na ah daupai uh hi. Piangthak taktak te zong thadah lo, zuilhtak lo uh hi. Kuhkal in beel uh hi. ( Pasian thugen siam zualzual na pi’n nasem nuamlo thadah zong ki om thei hi). Piangthak mi te pen midang te ading khuavak hi. Midang te ading thupha zong hi pah uh hi. Mi piangthak te tawh kikhawlh nuam hi. Ki lungmaung hi. Ih nung pan hong gensiat ding uh leh hong bawlsiat ding uh ki pautau lo hi.

Mipil pawlkhat te a pilna uh kiphatsak pih uh milak ah hailawh thei uh hi. Pasian piak pilna angah te’ kiniamkhiat aa midang te’ mawhna maisak siam in, midang te telsiam uh hi. Pasian zahtak mipil te tawh omkhawm leng vangam malep bang in ki khamuang hi. Leitung pilna bek in hong haisak thei hi.Sum in zong hong haisak thei hi. Sum’ haisak mi te omna peuh ah thusia piang hi. Pasian zahtak te omna peuh ah thusia veng hi. Angsung khual na in midang te siatna puak aa midang khualna in thupha piangsak hi. Midang te a ding thupha hi in.

4. Namdang mi a ding ‘in thuphaminam ih hih kul hi

Pasian in Abraham pen Israel te’ pupi ding’ in tel hi. Israel minam te pen namdang te tungah Pasian akilangsak ding aa kitel a hi hi. Pasian in minam te thupha hong piak ciang in tua thupha Pasian theilo te tungah hawmpsawn ding aa hong piak a hi hi. Abeisa kumzalom lai in kawlgam a ding in Pasian in mangkang te na tel hi. Hun te hong kikhel toto aa tu laitak in Pasian in gupna thu tang ko ding leh Pasian thupha hawm ding in ei Zomi te hong tel hi ci’ in ka sang hi. Pasian thupha in akangngeilo tuinak bang hi aa midang te ‘ tung aa ahawmsiam te a ding gang semsem hi.

Israel te in Pasian thupha azatsiam loh man in minam bup in muhdahna leh huatna na thuak ngei uh hi.

“Rome kumpi khanlai in, Mando kumpi ki ci khat khuasung vak hi. Jew minam khat tawh ki tuak aa, Jew pa in zahtakna pia in na hopih hi. Tua ciang in tua kumpi pa in, “ hih mi pa Jew te hi lo hiam banghang in kei honghopih ngamvial hiam that un” ci hi. Tua zawh a sawt lokhat ciang in khuasung vak leuleu aa Jew khat tawh kituak kik hi. Tua Jew pa zong lau in khuadak ngamlo, pau lo in ding ciip hi. Kumpipa in, “ hih mipa Jew te hi lo hiam , hong mulo hiam bang ding in zahtak na hong pia in hong hopih lo hiam that un” ci kik hi. Amipil te in “Kumpi pa aw tu nung in Jew te khat in hong hopih man in ki that aa tun honghopih lohman in that ding ih hiam” ci uh hi. Kumpipa in “Jew te pen Jew te hi or amah Jew te hi ven” ci hi. (Understanding Judaism sungpan) Pasian in namdang te ading thupha hi ding aa a telna, Pasian thupha zangkhial uh a hihman hi.

Ei Zomi te mailam ah minamlian ih suaktheih na ding ih nung ah etteh ding kicing ihnei khin hi. Thupiangsa te’ tung pa’n pilna ngah minam ih hih theihna in hanciam ni.

5. Nam it na lungsim nei ding

Patriotism: Greek pau pa’n hong luangkhia kammal hi aa , mipi it, gam it gamuk kumpi te panpih, gamleh minam siatna dingpan dal cih na hi.

Nam itna lungsim ih cih ciangin: “Nam itna in aminam minsiat na ding pan ki dawm den hi. Namdang te mudah tuanlo hi. Namdang te thanem mi aom leh huai hi. Aminam hoihna namdang tung ah lak hi. Mi namlian hih na tawh kipha sak lo hi”(Pastor Thang Siangh). Laisiangtho sungah kamsang te pen tu ni ei te etteh ding ahoih pen minam it te hi uh hi. Minam sung aa siatna te puah pha uh hi. Minam ading antang in thungen uh aa luangkham in mipi dal ngam uh hi. Minam itna pen Pasian kiangpa’n hong pai ki itna hi. Pasian it lo khat in mipih te it ding piang theilo hi. Tua mah bang in Pasian it aa piangthak taktak te in mipih te it uh hi. Ahi zong in namdang te mudah na in Pasian kiang pan hong pai hilo cih ih tel ding kisam zel hi. Tu lai tak zomi sung ah Pastor khempeuh in Zomi a ding itna tawh thungen zen leng…., Zomi bup Pasian in hong tawisang nuam mahmah ding hi.

6. Namlungsim paikhia ding

“Nam lungsim pen in gualzawh tungnung na zang in nam neu leh thanem zaw te sim mawh bawl hi. Nam lungsim pen in minam kiphasak pih hi. (Pastor Thang Siangh).

Nam lungsim pen mawhnei mi te pianpih natna khat a hi hi. Namlungsim natna damsak thei pen Pasian bek hi. Nam lungsim in minam deidanna piang sak hi. Namlian mi te pawlbawl in nam neu te simmawh nopna piang sak hi. Zomi hihna ki angtang sak ding hi aa kiphatsak pih ding hi lo hi. Kiphatsakna in nuaikiatna ding lamziik pi khat a ahihi. Zomi hihna nuntak pih ding hi aa sihpih ding hilo hi. Kiphatsak na in siatna kipat na hi. Hih nam kiphatsakpih lungsim pen minam bup a ding in natna lungvei na khat hi aa minam khantohna ngetbang aa a ne heng thei natna khat hi. Ih nopsak ciang, pawl ih tam ciang, ei leh ei ih ki tuamhuai paampam ciang namdang miten mudahna in hong nei pah uh hi. Pawl ih tam ciangin pawltawm te huai thei leng tua in minam tawisangna hi zaw aa namdang te simmawh nuainenna in siatna kipat na hi.

Pasian in Isreal te thu hilhna ah; “Khualmi na nemniam kei ding uh hi. Khualmi lungsim na thei uh hi. Banghang hiam cih leh no te in Izipt leitang tung ah khualmi na hi ngei uh hi”. (Paikhiatna 22:21, 23:9)

7. Ngeina hoih te leh ih lai te kepcing ding

Ngeina kepna ding munhoih penpen mun in eima innsung a hi hi. Zomi kipawlna te pen tua inn aa nakep ngeina te zatkhiat na ding mun hi zaw. Tanu tapa te Zo ngeina hong hilhsak ding Zomi kipawlna tuamtuam te , zolai zo ngeina makai te muang kha ken. Na tanu na tapa te tua bang munah tualbial sak zaw in la zangkhia (practice) sak in.

A zenzen in ngeina ih theih keileh Zomi sung aa ngeina lam tawh kisai thuthei , mipil te dot ding hi. Ahi zong a hilh ding pen Nu leh Pa hi. Inn ah ta te zo lai simsak in, zo pau paupih in, zo lai bu dangdang te sang in zo lai siangtho mah simsak pah le cin hoih pen hi.
Kawmtung aa kisuang limte in Zogam Zolai Zomi thu ahilh thei ding lim te suang in. Gam dang om te a ding in Zo gamlim bang kawmah khai le cin hoih ding in ka um hi. Mihing te pen muhna leh zakna in hong huzap phadiak hi.

Thu khupna

Zomi te a ding Pasian in geelna lianpi nei hi. Hih bang aa leitung gamtuamtuam aa ih ki theihthang na hang in Pasian geelna khat Zomi te tawh tangtung theihna ding hi kha ding hi. Pasian in ngimna leh geelna nei lo pi nasem ngei lo hi. Ahi zong in mihing te in Pasian zia ih zonlohman leh Pasian thu manloh man in Pasian geelna zekai thei hi. Banghang hiam cih leh Pasian in tua ageelna a sem ding in mihing te zang hi. Tua hi aa ei Zomi te’n ih sepkei leh Pasian in namdang khat zang lel ding hi.

Pasian zat minam te minamlian hi pah hi. Pasian in mihing azat ciangin nasep gualzawh theihna ding in thupha tuamtuam tawh mapanpih pah hi. Minphat na pia hi. Vangliatna zong pia aa thahatna guan hi. Zomi te minam lian asuak na ding in Zomi mimal kim in hih thu 7 tawh nuntak khuasak ding kisam hi. Deihsak na tawh, Mangpi (Thang Khan Mang) Miami, USA