Minam le biakna a tawisang Sia Tualdo ~ Lian Tuang

Minam le biakna a tawisang Sia Tualdo ~ Lian Tuang

Ihmut cim ngeilo, lungkhamlua, an le tui zong kician a ne melmel lo ka hih manin ka tha bei dikdek in ka lung am milmel mai hi. Ka bil ah cimci ham ciaiciai hi. Siavuan ten zatui lei ding ong ciangin hoi dengdeng sa in ka paipai hi.

Khat vei bang ka ngaihsut tam lua le ka tha bei lua hi ding hi ven zato kongkhak kahlei ka sik leh ka khe tungto zolo in ka kipai mawk hi. Zatui teng ka mai ah kiphah zeizai hi. Ka khasiat ong suak mahmah hi. Khitui tolh zatzat hi. Zatuite ka top kawmin“ Cidam in nipi khat sung . . ., “ ci in biakinn sungah la ka sak hiathiat hunte ka phawk mahmah hi.

Ni tum a tum ciangin tu zan khua I vak kik zo tam maw ka ci den hi. Khua ong vak ciangin tu ni ni I tum lai tam maw ka ci den hi. Siavuan siamahte in zong nuntakna pen ei khut sung hi lo hi. A sia a pha lungsim kigingsa in om ding hoih pen hi ong ci lel uh hi. Cidam in nipi khat sung kantan nuam mah si ing e ka cici mai hi.

Si kisam den in si zong hi den mai hi. Ka tanu tungah kawlpi le zangkong zato ka kah sungin si thawl 100 tak ka thun zen uhi. Neihsa sum le pai om hetlo kawmkal ah natna gil mahmah khat tawh zato tungin ka zatui lei na ding hamsatna ciang bek hi loin si zon ding bekbek ahih manin a sawtsawt ciangin a hai lawh dekdek takpi mah hi mai ing.

Ahi zongin ka lungdam mahmahna le lamdang ka sak mahmah thu khat in ZYA le kawlpi kim khawnga ka naseppih lawmte deihsakna le vaihawmpihna tawh Zangkong khua sungah si pen deih zahzah ka ngah hi. Sun le zan cih om loin ka kisap hunhun in itna deihsakna tak tawh ong delh vanvan uhi. Sum le pai zong neihsa bangmah a om loh hangin lemlem to thei hi veng aw ci in sia Tualdo in si cancer natna tawh a tanu Zangkong zato kahna thu ong gen kik hi.

I theihsa tek mah bangin Siapa pen tuiphum pawlpi sia khat hi a, sianu zong kumpi sang siamah khat ahi hi. Siapa in tuma kum lai pawl a kipan pawlpi sia a sep kawm in 2003 pan kipanin HIV positive lam tawh kisai mission nasia takin na kipan hi. Damlote vehna, holimpihna, Pasian thu genna cihte neih pih ngaitngait hi. Veng le pam khua le tui bek hi loin a u a nau a innkuanpihte nangawn in lipkhap in a pampaih mite siapa in itna lainatna tawh veh in tha pia tangtang hi.

Tua hun lai in tua natna neite pen thaltuk in a si pah leuleu ding kisa hi. Miginalote, mizulhtatte, a thangtat mite natna danin kingaihsun kha ahih manin kilipkhap in zumhuai kisa mahmah hi. Tua mah bangin tua natna nei hi akici te zong lungkia in khantom thei mahmah takpi mai hi.

Ahi zongin Siapa in tua bang lungsim kitamzanin a thanem mite tawh nai takin na kizom hi. Itna lak in Pasian thu tawh hehnem hi. Hih natna hangin nuntakna a mawkbei loh nadingin makaih hi. Pumpi bek hi loin kha suahtakna a ngahna dingin holimpih lai hi. Eimi bek hi loin minam tuamtuam biakna tuamtuam tampite tungah holimna pia den hi.

Sabengsiam pa bangin amah tawh a kizom kha mi khempeuh in lungsim pumpi le kha suahtuakna ngah sak ziahziah hi. Damlote in siapa ngai mahmah uh a, nu muan pa muan bangin muang uhi.

Damlo le lungsim thanem vive tawh kikhawl ahih mah bangin a lawmte a sihsuah hun zong om thei zel hi. Si le sa ah kinaina om loh hangin itna tawh inntek panmun a lak hun nangawn om thei hi. Eimi sung bek hi loin minam dang biakna dang sihvui hun pawlkhat nangawnah inntekte lunggulhna hangin Christian ngeina tawh hun a bawlpihna zong om thei zel hi.

Kipawlna tuamtuam, kumpi thuneite le siapa dan in aituam hanciamna tuamtuam tampite a kigawm ciangin hih natna pen a zumhuai a lipkhaphuai lua liangin kingaihsun lua nawnlo zawdeuh ta hi. Hih lam a len zawdeuh kipawlna tuamtuam zong ong om pianpian ta hi.

Hih teng I gen dendanna pen lungsim kitamzan in a thanem mite a panpih tawntung mah bangin siapa lungkham mahmahna ahi tanu no tungtangah damlote tungtawn le lampi tuamtuam panin I biak Pa Pasain in a kisam sisan leh sum le pai te kicing takin thupha a san sak na thu a gen nuam I hi hi.

Tanumei neu pen ci nat zawh kum nih hi khin in si thawl 100 val kithun khin a, tu in zong damsiang ding ngak in zangkong ah a pute kiang om lai hi. Zangkongah ki ompih zo tawntunglo ahih hangin a pu Thawngmangte innkuan in lungmuanhuai takin ong kep sak uhi.

Siapa in “ka nuntakna sungah Pasian in nisim in ama hoihna ong mu toto sak sa ing. Neihsa sum le pai bangmah om hetlo in ka ip sungah pekkhat zong a omloh hun nangawn ah Topa hoihna lamdang sa in ka lungdam semsem hi” ci tangtang hi.

Minam le biakna deidan het loin lungsim kitamzan mite kingakna dingin lungduai takin ma a pan tinten manin ei sung bek hi lo minam dang biakna dangte lak nangawnah minam le biakna atawisang mahmah khat ong hi mawk hi.

Thuzui mite le thuzuilo mite khempeuh tungah a ettehhuai gamtatna pha a lak den na hi mawk hi. Siapa tungah i lung adam mahmah hi. A nasepna pawlpi le a seppihte khempeuhte tungah zong I vekpi tangin lungdam I ko nuam hi. Mailam hunte ah zong Pasian in tangzai takin a zat semsem nading thungetna leh a maban khempeuh ah suakta le maingal takin na a sep theihna dingin i hih theihna tek panin hanciampih ciat ni cih kizawn nuam hang. Lian Tuang