Minam langpang icihte…

Minam langpang icihte… ~ Thawn Tuang

Minam min pen Zomi hi. Zomi cih a neih tuam vilvel pen kei Zomi hi-ing
a ci te hi pah hi. Zomi cih a neih tuam Zomi te mah hi pah hi. Minam
min pen deih teel theih thutawh a ki teel hilo hi. Eima Right ciat
tawh minam ki teel ngeilo hi. Minam min khawng Right tawh ki zui
theilo hi. Ken zong deihteel theihna Right neih lel kaiteh England
minam ut ing cih tawh minam min Right tawh ki teel theilo hi. Ut tawh
utloh tawh ki sailo minam min ciat a ki neih dimdiam ahi hi cih thu
masa hisak phot ni.

Zomi langpang cih tawh ki sai-in Kawlgam ah minam min Zomi in hong ki
ciamteh theihna dingin hunhoih hunlem March-April kha sung hun om hi.
Zomi makai khempeuh in code 914 gelh ciatni hong ci uh aa, a mun mun
panin tha ki pia in ki thukim hi. Tua ahih manin code 914 ah na gelh
zongin phamawhlo, Kawlgam Census Commission hong piakna te ah zong na
gelh zongun nomau Right ciat zui un cih tawh Zomi sung hong sukham
nuamte Zomi langpang hipah hi. Siang gen mahmah leng Zomi min pua ki
pawlna hi liamluam na pi-in ut utna ah gelh ding cih a tangko te Zomi
cimang khin hen aci hilel hi. Zomi minpua ki pawlna hi na pi-in
Kawlgam ah Zomi cih hong ki ciamteh zawhna ding hunhoih aom laitak in
ko ki pawlna in panmun panlakna neih kei nung cih lanlan bel haitawpna
taktak ahihi.

Party cihte, ki pawlna cihte, biakna cihte thutuam hi. Tukum 2014
Census vai-ah ki pawlna, party, biakna…cihte tawh ki sailo minambup
tawh ki sai thu hi. A neu alian ban kim hi. Kei tawh ki sai kei nacih
khinkhian lehzong midang pawlzawn kenla, tangko sese dah in. Minam min
vai-ah ut in, ut ta keileng kei tawh ki sailo cih bang hi theilo hi.
Ko ki pawlna tawh ki sailo, panla lo… khat peuhpeuh code ah gelh
theih hilel Zomite lak ah icihleh Zomi khempeuh a langpang hipah hi.
Zomi nam ah a lutlo peuhmah Zomi langpang cihna hilo hi.

Gentehna:
Zotung te kiangah Zotung code ah na gelh aa, Zomi code ah na gelh
zongin ki sang hi aci bang hileng Zotungte kiangah ci ka hih manin
Zotung minam cih a langpan mahmah ka suak hi. Mi minam min khatpeuh,
langpan ding hi dihdihlo hi. Kawl kumpi in Zomite sungah ki sailo
pi-in minam min code nono tawh hong khemkhap sawm hi. Hong piak code
nono te ah gelh ciat dingin code dang khat ah gawm kik ding cih hileh
phadawm hi. Ki khenna taktak hi.

Zomi minam hong ki ciamteh zawhna ding code ah han thotna pialo aa,
adang ah na gelh zongin ki ngahlel cih a tangko peuhmah Zomi langpang,
Zomibup langpang suak hi. Ut utna ah minam ki mawklut theilo hi. Minam
min eima Right tawh a teel liang om samlo ding hi.

Minam sungah…
Thawn Tuang
Zomi Angvaan
June 28,2014
www.zomi-angvaan.blogspot.com