A tuamdang Zomi Aksipi Pu Sitni Chin Sian Thang

A tuamdang Zomi Aksipi Pu Sitni Chin Sian Thang

Leitungah mipil, misiam, mi minthang a tamzaw a tangthu uh enleng, mitangpi tawh ki bat loh na pianzia a tuamtuam neitek uh hi. Tua mah bangin ei khangthak Zomite leh Kawlgambup galkap ukna pa’n suakta in Federal Democracy tawh aki uknading in a sihdong na asem ZOMI AKSIPI khat ahi, Pu. Sitni. Chin Sian Thang tangthu tawm endih ni.

1. Moses tawh a kibatna khat: Egypt gam a saltanna uh pan Israel mite a pikhia Moses nuntakna I etteh Egypt gam kumpi inn sungah kumpi Faro tapa kici in makai vaihawm semin annlim tuilim ne-in inn hoih, inn nuam sungah aom sangin sila aom a mipihte tawh gimthuakkhopding a telzaw hi, cih Lai Siangtho in gen hi, (Heb 11:24-26). Tua mah bangin Pu. Sitni.Chin Sian Thang in zong Kawl galkapte tawh na semkhawm in inn hoih innnuam ah omin annlim tuilim ne in aom sang, Democracy ki ukna adeih kawlgam aom mipite, ASSK leh NLD makaite tawh kawl galkapte bawlsiatna thongkiatna thuakding natelzaw hi. A seppih pawlkhat gamdang ah tai-in omta le-uh ama’n taiding nangawn sawmngeilo hi.

2. Judah Kumpi Josh tawh a kibatna khat: Judah kumpi Josh in kumpi asep in kum 7 pha pan ci-in Lai Siangtho in na gen hi, (2Kum 12:1). Pu. Sitni. Chin Sian Thang zong kum 7 aphak in Siampi nasem in mi cina pawlkhat bang damsak ci uh hi. Israel mite kumpi Saul hunma tan kumpi cih bang atuam in neilo uh a, Siampi pawlkhat bangin kumpi nasep tawh athuah uh hipah hi. Zomite zong Christianity hong tunma, minamdang gamkekte hong lutma in Siampite tulai kumpite mah bangin aki zahtak, thupi a kisa ahi hi.

3. Kumpi David tawh a kibatna khat: Kumpi David tek mahmahkhin napi a ziding nungak melhoih a khangmoilai Abishag zi in nei hi. Pu. Sitni. Chin Sian Thang zong, a zi masa nusiat khit a kum tamkhit kum 70 bang valkhinphial hita leh nungak khangmoilai mahmah khat zi in nei hi. Mi pawlkhat in a zi neihtung in neinawn kei leh cih danin gen ngeingai uh hi. Kei mimal muhna ah minam ading a lungsim takpi tawh nasem taktak ahih manin Pasian in Kumpi David bangin zi hoih mahmah pia hi, ci-in ka ngaihsun hi. Lai Siangtho in zi a muzote na hoih a mu ci hi. Pasal pawlkhat cidam in atha gol in a mel zong hoih, pilna zong neita leh zi a muzolo, zi a zongtheilo, a lengkul, nu leh pa, sanggamte leh a lawmte zonsak akul honpi khat om mawk hi.

4. Zo laphuah Zo lasak siam hi: Leitung ah mipil tampitak amau ngeina la aphuak theilo, a satheilo tampi om hi. Ahi zongin Pu. Sitni. Chin Sian Thang pen I ngeina la te tampi phuak in sathei hi. Leitungah University minthang pawlkhat leh Lai Siangtho Sangpi pawlkhat bangah Sang naupangte a ngeina late uh sading in ki sawlthei in a satheilo pawlkhat zong om kici hi.

5. Sum tung leh numei tungah citak hi: Tuhunteh minam makai gen loh biakna makai, biakna nasem tampi tak sum leh numei ah puk uh, minsia uh cih I theiciat hi. Ahi zongin Pu. Sitni. Chin Sian Thang pen a sihdong tuate ah minsiat puamsiatna omlo in a tanau pawlkhatte sum a leitawite nangawn MP a ngah kik, MP kha sum a santeh lohkik tangtang a hihna a behte khat in gen hi. Ei khangthak Zomi makai akua mahpeuh a dingin ettehhuai mahmah, ciinhuai mahmah hi.

6. Mipil, mi hangsan leh micitak athuah pa ahi hi: A leitung pilna zong BA, BA Law, LLB kici hi. Zomi sungah hici bang sin ngiatngiat tawh pilna boih thuapthum a thuap masa pen hiding in ka lam en hi. A pilna pen sazuk kipuak mawklo in Zogam leh Kawlgambup galkapte khutsung pa’n suahtakna ngahnading in zangh in tamveipi galkapte bawlsiatna thuakta leh laulo in hangsantak, citak tak-in a sihdong, gam leh minam ading nasem hi. Kawl galkapte in amat dingteh zong ki buke, lauke cih bang omlo a, kithawisa in na omkhol in a tun uhteh zuipahlian ci uh hi. Mi pawlkhat bang Kawl galkapte a muh bek nangawn alau, kawl galkapte etciklai Pu Thang nangawn a hopih ngamlo, amah tawh khualak ah ki hoding lau in phone nangawn tawh zong amah in hopih nuamta leh ahopih ngamlo, a phone alen nuamlo Zomi mipil, misiam, Doctor Ph.D pawlkhat nangawn om cih ZONET ah ka simkha ngei hi. Mipil veve Pu. Sitni. Chin Sian Thang dan a, hangsan leh cihtak tawh athuah hihding uthuai mahmah hi.

7. Makaisiam khat ahi hi: Leitungah minam makai pawlkhat, biakna makai pawlkhat amau bek liat detding ut in anuai ate a pantah nuamlo, a nungzuiding, a mabanzomding mi abawl nuamlo tampitak om himah leh amah in mi pawlkhat MP, Minister suaksakzo hi. Pu. Pau Lun (Minister) bangin ama hangin politics asem hing cingiat hi. Tulaitak Zomi makai akua mahpeuh in ettehhuai hi. Mangte paunak khat ah “if you are not make a leader, you are not a leader” ci uh hi.

8. Vision kiciantak nei hi: Tuhunteh minam nasem ding, sum bawlding a ki piasa pawlkhat haksatna khat peuh atuah uhteh lungkiapah in taikhia in nasepdang zong pah, pawlpi sungah upa makai, siading peuh ut in kipeipah, ahih kei leh biakna nasemding a kipiasa, ze-etna haksatna khat peuh a tuahteh sum bawl, politics khel cih bang dan a tuamtuam mi pawlkhat om uh hi. Ahi zongin Pu. Sitni. Chin Sian Thang pen a Sang kahlai a kipan minam leh gam vai semin a zi neih a ta neihteh zong minam leh gam vai mah semzom in ZCD Party President a sihdong sem hi. ZNC/ZCD Party thukhun zong khel themthumlo, khel kikkiklo in lentinten hi. A Zo laphuah khat ah UNO dongah leltolai vang e, acih bang in ama damlai mah in UN makaite kiangah Kawlgamvai gen a, ZOMI min tawh zong UN kipawlna hiang khat ah member khat in hong sang uh a, Meeting zong ki kahthei hi. Zomi min pen panmun ngahnading sum ngahnading, a omsa kipawlnate khenkhapna cianglel in na zangh ngeilo in limtak strategy kician tawh Kawlgambup leh leitungbup theihding in na kalsuanpih hi.

9. Leitung in amah thei hi: Kawlgam haksat Gen. Tan Swe hunlai in Kawlgam mite gamdang paiding hamsa mahmah hi. Tuaci bang kawmkal ah UN tung tawn a gamdang paitheihnading a kisam lai pawlkhat bang pen a ma laigelhsak mi pawlkhatte UN in pom in gamdang paithei uh hi. A sih in zong leitungah News minthang pen khat ahi BBC in zong dahpihna na gen hi. Tulaitak Kawlgam ah Party lian pen NLD Party pa’n zong dahpihna thugen uh hi.

10. Thupha ngah pa ahi hi: Zomi a tamzaw in thupha ngah, thuphasang I cihteh sumhaute leh inn hoih lo hoih neite hinuam phadeuh hi. Ahi zongin tuate tawh I nuntakna second khat manding , minute khat manding, ni khat kal khat manding, kha khat kum khat manding ki leitheilo hi. Sitni. Pu. Chin Sian Thang pen kum 92 bang leitungah nungta in a sepnop, a uk mahmah gam leh nam vai semkha in MP zong adem simin ngah a, atu a tate zong mukha ahih manin thuphangah ahih lam hong phawksak hi. Kumsawt nuntakna pen Lai Siangtho in zong thupha ngah khat in na ciamteh hi.

Amah bang mipil, misiam, mi citak, mi hangsan minam ading a semkhia khangthak Zomi tampitak Topa’n hong pialai leh ka ut mahmah hi. Hici bang Pa kician a neikha atu a tate khempeuh zong hampha kasa hi. Gennop tampi tawh tuazah ciphot ni. Hih thu pen ko omna Brisbane, Australia ah a tanu leh a tupa tutpihna hun ah ZCC Pawlpi in Sermon dingin hong seh uha, tua ni a ka thugente puahpha in amah ka zahtak piakna in kepcingding a kong suah ahi hi. A kha lungnuam in na tawldam hen. Rev. Do Khan Khai (Registered Ordained Minister, Queensland Baptist Union & Australia Govornment)