Mimal Tangdin (Independent) MP Candidate ihcih ciangin

Mimal Tangdin (Independent) MP Candidate ihcih ciangin

Gam ukna hong kikhel zawdeuh ciangin 2008 thukhunpi akip khit zawh gambup ah Party tuamtuam hong piangkhia-in tukum 2020 tak teh gambup ah Party -95 val bang om ta hi. 2008 thukhunpi kizat zawh abeisa hun ah gamsung ah kiteelna (5) vei bang om khinta hi. 2010 gambup kiteelpi, 2012 kalhelh kiteel (By-election/ ကြားဖြတ်ရွေးကောက်ပွဲ), 2015 gambup kiteelpi, 2017 leh 2018 kalhelh kiteel (By-election) cih teng ahihi.

Kiteel lut theih nadingin 2008 thukhunpi nuai ah lampi nih kitawn thei hi. Khatna ah party tuamtuam siksanin party min tawh kiteel kiluthei hi. Nihna ah Party cih limlim tawh kisawhkhalo-in mimal tangdin (Independent MP Candidate) tawh kiteel kidem thei hi. Party khat peuh bulphuh in kiteel lut MP hita leh mimal tangdin MP demte hita leh gambup thukhun/Union Election Law nuai ah kiteel alut ciat uhhi.

Gammi khat hihna tawh kiteelna ah MP demkhat teeltheihna/Meetang piakna pen gammi khat hamphatna leh thuneihna (Citizen rights/Right to vote) ahih mah bangin gambup kiteelna ah MP demtheihna/mipi in hong teeltheih nang meekuang luina zongh gammi khat ii pianken hamphatna (Birth rights and rights to be elected) mah ahihi. 2008 thukhunpi sung alian (1) aneu (38-A)na ah zongh kiciantakin kigelh hi (2008 Constitution, Chapter – 1, Article-38-A).

Party khat peuh bulphuh in kiteel azo MP te leh mimal tangdin aa kiteel lutin MP angahte pen gambup thukhun nuai ah ahihtheihna uh leh hamphatna (Equal Rights And Opportunity) akibang vek ahihi. Party khat bulphuh aa MP ngahte leh mimal tangdin (Independent MP) hita leh gambup innpi/Hluttaw sungah thugen theihna, thusun theihna, thudot theihna leh thuneihna khempeuh uh akibang sitset (Equal Legitimate Power) anei uhhi.

Party khat siksanin MP suakte ahih leh gambup innpi/ Hluttaw ah thukhat peuh adot ding uh ciang ahizong, thugen thusunna aneih ding uh ciangin a party makaite uh leh party thukhun in athukimpih aphal kei leh Hluttaw/ လွှတ်တော် sung ah thu kisungsaklo thei hi. Bang hang hiam cih leh party bulphuh MP ahih mah bangin party makaite’thu leh party thukhun zuihkul ahih man hi.

Mimal tangdin MP te leuleu ciangin, atung ah party makai leh party thukhun cih bang om selo ahih manin MP asuah naak uh leh gambup innpi/hluttaw ah suakta tak thusung thei, thudong thei, dotna tuamtuam dong thei ziauziau lel uhhi. Gambup innpi/hluttaw thukhun (လွှတ်တော်ဉပဒေ နည်းဉပဒေ လုပ်ထုံးလုပ်နည်း) sungah suaktatak nasem thei uhhi. Mimal tangdin MP ahoihna ah gambup ah agualzo kumpi sem party pepeuh tawh kipawl thei ziau lelin panmun hoih pipi zongh kipia ziauziau thei lel hi.

Tua ahih manin gambup ah kumpi asemzolo veve party dangte tawh kibang lel hi, kici thei hi. Ahang in 2008 thukhunpi tawh ah kipai lai ahih manin gambup agualzo pan kumpi asem party te/President bek in gambup kumpi ( Union Cabinet/ ပြည်ထောင်စုအစိုးရအဖွဲ့) leh gamkee kumpi ( State and Region Government/ တိုင်းနဲ့ပြည်နယ်အစိုးရအဖွဲ့) amau’ deihsak bangbang a utut uh koih thei uh ahihna hang ahihi.

Abeisa leh tudong ciang mah ah 2008 thukhunpi puah Committee mihing MP -45 (2008 Constitution Amending Committee 45 Members) ah zong mimal tangdin MP pawlkhat kihelkha veve uhhi. Tua bek hilo gambup kilemna khawmpi (Union Peace Conference – 21st Century Panglong) khawmpi ah zongh mimal tangdin/Independent MP pawlkhat kikahsak veve lel hi.

Minam vai leh gam vai zongh gentheih loh cih bang om peuhmah lo-in Hluttaw thukhun nuai ah suaktatak kigen, kisung leh kikum thei lua pha mahmah hi. Tua ahih manin, mimal tangdin/Independent MP te pen agualzo party penpen tawh kipawlin nasem thei ban ah kipawl thei lai uhhi.

Minal tangdin/Independent MP cih pen tutawm aa om cih bang hilo-in nidang pek 1947 thukhunpi leh 1974 thukhunpi hun pekin zongh ana omsa hi. MP tampi tak mah in mimal tangdin tawh kiteelna lutin MP asuak tampi na om ngei khin hi. 2008 thukhunpi nuai ah tuni ciang kiteelna (5) vei a omna lak ah mimal tangdin tawh kiteel alut mihing (413) bang pha aa tampitak mah gualzo lawhcing khin banah tutung gambup kiteelpi ah zongh zatampite in demlai ding uhhi. Agelh: Bob Tuangpi Ref: UEC