Sia vive ~ Nk Khanno

Sia vive

Gun gal kah dingin Sangsiapipa khatin gunkuang khat hong sap hi. Gunkuang tung tuankawmin gim pipi hanciam takin gunkuang a hot tantan gunkuang neipa kiang ah hi bangin thu hong dong hi.

“Pu nang sumlei sumzuak pilna (economy) na thei na?”
“tua dan za ngei kei sing e Siapa?”
“Hmm, na nuntakna i sehli suah seh khat a si ai ve maw. Tua leh lailam pilna (literature) e na theina?”

“Lai bel thei sam ve ingh in. Lailam pilna cih bel thei kha het kei sing e Siapa, nikhat zon nikhat nek cih tawh a kinung ta hisam hiven ka theihloh hangzong poimawhna om sam ding ahia”

“Hi thei sam kei ei, lailam kiva aa a siam hilecin hih na nasepna gungei aa om vasa, ngasa, zingkung lopa, mualdungte thu at thei ding nai ve. Tua bang khawng lah hih theilo zel mawk nahih ciang aa na nuntakna i sehlisuah seh khat mah a si tawh akibang hi leuleu zel ei”

Tua leh khinkhaisiam pilna (philosophy) cih na thei na?”
“theilo”
“Khuahun lam pilna (climatology) e leh?”
“theikhang ei. Nitum kuan van a san aa leh zingciang khuapha ding, zingsang lam van a san aa leh nibup mei kaai ding. Tua ciang bek upmawh gentheih ingh”
“cih zezen aw ei, khuahun lam pilna na ngawn theilo pi aa gunkuang hot lai maw! Na nuntakna pen sehlisuah sehli a si taktak hi ei”

Hi bangin mipil pa kampau te hangin gunkuang hot papi pa nuamhet nawnlo hi. Tua kawmkal ah gunkuangin gunlai aa om singluang khat phukha sawnsawn lai hi. Gunkuang a nawl hong vang in tuite hong lut hi.

Papi pa’n zong mipil pa thu khat hong dongkik hi.
“Siapa aw, tui na pek thei maw?”
“ihkk.. ken tuipek theilo, bang cih ding ka hia?”
“Bang cih ding na cih ciang bang na gennop na a hia? En o Siapipa na nuntakna i amanpha mahmah sehli teng khempeuh guntui sungah tumcip ding hita ei”

Tua hi aa i nuntakna ah ei i siamkhat theihkhat ahizong letmat khat cihbang tawh Sia kisa kha pahpah in midangte kineu muh thei hi. Midangte zong amau siamna ciat khattek a neih lam uh manggilh huai lo hi. A mau zong amau mun ciat ah sia khat mah na hi veve uh hi.

Nk Khanno (Zingsol)
credit: original writer