Mihau leh mizawng dinmun ki lamdanna

Mihau leh mizawng dinmun ki lamdanna

Hih laimun ah mihau ih cihpen sum tamnei tebek cihna hituan lohi. Mihau acihtaktak tepen amakhuttawh asepngiat aa neih na te hi in, tulianin ahauh liannai lohhang hauhnopna lungsim leh hanciamnopna lungsim anei te zong ahau mah ahihi. Mihau taktak ihsuah nopleh mihau te ngaihsut na bang ihneih kulding hi. Tua bang aa ih ngaihsut theihna ding in honggilhkhia ka hihi.

1. Mihau te in kanuntak khuasak dan pen keima gel ahih man in ka nuntak khuasak na ah keima mawhpuak ahihi acihlaitak in mizawng ten ahih leh ka nuntak khuasak pen amathu in hongpiang hi.Pasian geldandan aa hongpiang hi ci hi. Adiakdiak in sum leh paai tawhkisai in ah tulaitak ih dinmun pen tumapek in ih gelkholh bang leh ih deihbang dan hi a, abeisa hun in ih ngaihsutsiam banglian in tulaitak ih dinmun hong nuam hi aa, abeisa hun aa ih ngaihsutsiam lohman in tulaitak ih dinmun zong hong haksa ahihi.

Tuapen mihau te ngaihsut dan ahihi. Mizawng ten ahih leh ih nuntak khuasak ihdinmun pen ei leh ei aa ihsep khiat na pan hongpiang hicih sangsiam lo in ih dinmun pen midang hongsepsak, Pasian hong koihkoih dan in akinungta hici in ngaihsun uhhi. Pasian hong koihkoih na dinmun ah ki om himah hi. A hihzong in Pasian in ih deihdan aa hongtheih ding hongtelsak in, tua ih deih hongtelsak na pen ahoihlam in ihzatsiam ding kisam hi. Hih pa pen adamsung azawng ding, hih pa pen adamsung ahau ding ci-in zong gelsa in koihtuan lo hi. A ma nuntak khuasak na tawhkisai ama vaivuak hi ci-in angaihsut lo ten midang te vaipuak ding in ngaihsun den uhhi.

A sangkahna, a innkuanpih te, a kumpi te, gamsung sum bawlvanzuak na, cidam na lam cih akipan ahangtampitak mawhsak hi. A zawn na tawhkisai ama mawhna avaipuak acinzawh lohman ahih lam kithei lo in adangtuamtuam ngawh in midang mawhpuak sak cihna ahihi. Midang ngawh in ahangtuamtuam paulap in phunphun ciakciak den uh aa mihingte pen ih ngaihsut na lamlam ah kipai in kingah beh zel zaw hi. Sum leh paai pen lungnop na taktak hikei, sum leh paai thupi masa kei e ci-in kihehnem suk ziau uhhi.

Gentehna in ih pasal ahi aa ih zi ahi zong in, ih lawm te ahizong in ih gei uh ah a om pen thupi masa kei lungnop na taktak om kei, nuam sa keng cici leng hongpaisan lel ding uhhi. Tuabang lian hi aa sum maw it na koithupi zaw ci kikvet se thei uhhi. Ih khut leh ih khe koi thupi zaw cihtawh kibang hi aa, anih in athupit tuak mahbang in it na bek kine thei lo aa sum bek lah piang thei lo ahih man in anih inthupi tuak hi. Sum pen akizat theihna mun ah nakthupit lua aa athupit lohna mun ah bangmah hituan lo zel hi. Ui pen thupi kei ka nuntak na ah deihkeng cici leng cikmah hun in Ui ki khawi ngeilo ding hi. Tua banglian mah in sum leh paai zong thupi masa kei e cici leng sum leh paai ki hau ngeilo ding hi.

2. Mihau ten ahih leh haksatna te gualzawh ding in hanciam uh aa mizawng ten ahih leh haksatna te peel uhhi. Mihau ten hauh na ding hanciam uh aa mizawng ten zawnluat na ding leh nektawm kikhawm khop ding bek in hanciam uhhi. Ih tupna asanleh akiat na ding zong sang cih ih theihsa hi. Ih tup aniam leh bel ih tunna ding zong sang ngeilo ding hi. Ih hauh nopleh tupna zong asan kul hi.

3. Mihau ten sum peipung uh aa mizawng ten deihbek thei uhhi ci hi. Mihau na ut hia ci-in kidong leng atamzaw in aw ut mah ingh kici ding hi. A ut lo bel kiom mel in um keng.Tua ahih leh hauhding na sawm hia, hauh na ding banggelna nei ci-in kidong leng asangthei ding tam khawllo ding in um ingh. Mi atamzaw in hauh nopna thu akambek in gen uh a, alungsim tawng ah lauhna banghiamkhat neiden uhhi. Hauh na leh nahoihlo apaikhawm in kingaihsut kha den a, Mihau te alung uh nuam thei lo ding dan in kituat kha den hi.

Hauhnopna bek tawh ki hau ngeilo ding hi. Tup leh sawm taktak kisam in, hauhnop bek tawh hau ding hileng kuamah a zawng kiom lo ding hi. Tup leh sawm cihciang in ih theina khempeuh ih siamna khempeuh, ih ngaihsut na khempeuh 100% za ah za piak kul hi. Mipawlkhat in ih kisap taktak zong theimel lo uh aa mihau ten akisap telcian mahmah uhhi. Ka hauh kei lehzong kasih dong in hanciam ningcih lungsim nei uhhi.

Na uk nakhat , na lawm, na innkuanpih te koihphot zahdong in na hanciam zo diam. Tua na ngawnzong lawhcin ding cihkitel lo lai hi. Mihau ten ahi leh semngam in kipia khia ngam uh aa atawpna ah lawhcing uhhi. Mi hongpiak tawh hauh ding ut ingh in kei leh kei in sepding bel ut keng ih cih leh cikmah hun in hau ngeilo ding hi hang. Kua mah in hong huhloh hang in kei leh kei ka khetawh ding in hauhsawm ning cih lungsim ih neih leh bel hau hamhang ding cihna hi.

4. Mihau te pen atup asawm sangmahmah in, mizawng te ahih leh tup leh sawm sanglo in niam hi. Ih siam na tungtawn in sum akingah hi aa mitangpi hih theih bangciang bek ih hih ih sep theihleh bel mannei khawllo cihna ih hihi. Mi atamzaw pen ih tup ih gel niam lua pahphot mawk ahihciang aa na lian khat peuhpeuh pen ei septheih ding in tuatthei lo in midang septheihbek ding dan in kingaih sun kha zel hi. Ka nasepbang ci bangin khantoh ding kahiam cih gelden ding kisam aa huaiham man hi lo in khantohh na ding ahihi.

5. Mihau ten alem hun ding azon laitak in mizawng ten haksat na leh atheih loh na dingmun bek zong in muthei uhhi. Pasian in mihing hongbawldan lamdang mahmah in lungsim takpi tawh ih zon te ki mu pelmawh hi. Lungnop na ih zon taktak leh lungnop na kimu aa tua mahbang in lungkham na zong ahihi. Ih tup ih gel na lamlam ah kipai ahihi. Khamtheih zatui tuamtuam azang ten zong sum aneih loh uhhang in duhtaktak ahih man un mu veve thei uhhi. Tuamah bang in haksat na leh ih hihtheihloh na lambek ih zon leh tualam bek mahki mu ding hi.

Khua khat ah khedap zuakkhat hongpai in tua apaisawm na khua mite in khedap cihzong thei lo bek hilo khedap bulhngei lo khua ahihi. Lampi ah mikhat in tua khua ah khedapna zuak hang in khawngkei ni teh khedap bulh ngeikei uh acihleh khedap zuaksawm pa in hoihve le, khedap bulhdan athupit na sinsak ning in khedap leisak ziahziah ningci in atup asawm na khahsuah sawm lo hi. Mi lawhcing ding te in lampi om lo himah leh lampi sialtawm ning civeve thei uhhi.

6. Mihau ten ahih leh mihau te leh milawhcing te thupit ngaihsut uh a, mizawng ten hua den uhhi. Mihau aut aa aut bek tenbel mihau te gensia den uhhi. Mizawng ten azawn na hang dan in mawhpaih uh aa mihau te haza den uhi. Mihau te neihsa inn hoihnono amuh uhciang in asung aa tengte zong lungnuam tuan ken teh, lungnop na neituan ken teh, alunguh khamveve in teh, nopsak na taktak nei kei un teh ci uhhi. Tua acihhang in mizawng te zong azawn man un alung uh anuam cih na hituan sam lonapi’n mihing lungsim lamdang thei mahmah hi. Mihau khempeuh pen nekguk leh vankham asemte bek ahau ding dan khat in kituat thei hi.

Amau hauhna nekpih keng hong neumuhtuan kei uhhen cih ih gendan tangpi hi aa, ahauh hang un a neumuh ih hizaw hi. Thupi ihsak loh leh mawhna dan khat in ih ngaihsut te bangcih suahtheih ding. Mihau te haza in muthei mel lo ih hih leh cikmah hun in hau ngei lo ding hihang, banghang hiamcih leh mihau te ngaihsut dan leh theihdan bangci sinthei ding. Mihau ten amau sang aa ahau zaw te thupitngaih sut in amautung pan sinbeh toto uhhi. Mihau te kiang ah om mun in, a thugen uh video hi ta leh lai hi ta leh en in, sim in sinleng akikhangto ding hi napi’n mizawng ten mihau te haza in gensia ahih man in hau ngeilo uh ahihi ci hi. Mihau taktak leh milawhcing taktak te pen akiniamkhiat taktak zo teng bek mah na hihi. A kiphatsakpih leh bel hau taktak nailo cihna hi lel hi.

7. Mihau ten na khatpeuhpeuh ahoih lam (positive) lam in en thei te leh milawh cing tebek khawlhpih in nei uh aa, mizawng ten ahih leh na khat peuhpeuh asialam (Negative) lam bekbek in amuthei te leh milawhsam te tawh ki khawlthei uhhi. Mihing pen ih mizia kibatpih tebek mah ki khawlpih ki thuahpih nuam thei hi hang. Sialvom leh sialvom kingai cih dan hi. Mi lawhcing ding te in mi lawhcingsa te etteh in nei uh a, ahih theih leh kei zong hihthei lua ning ci-in hanciam na in la uhhi. Hauna leh lawhcin na ding a baihpen ahih leh ahausa alawhcing sa te etteh ding in hanciam ding abaihpen ahihi. Mizawng ten ahih leh mihau te thupit muhthei tuan lo uh a, ih thupit ngaihsut loh tetung pan sin dingbel haksa hi.Hauh ding ih ut leh mihau te tawh maitang kimu in ih kihotheih loh hang in amau gen amautungpan hongpusuak thu leh la, video, laibu cih te sim in ih sin ding kisam hi.

8. Mihau ten milak ah kipholak ding phamawhsa se lo uh a, mizawng ten ahih leh milak ah kipholak ding maizum ngaihsut thei uhhi. Vanzuak mi keng cithei uh a, amau leh amau ki en neu thei uhhi. Sum bawl te sang in kumpi nasem te kipi muhzaw thei hi. Sum bawl na ah vanzuak khiat kisam aa bawl in zuakkhiat kul hi. Mihau ten ahih leh vanzuak na hi ta leh ahun, atha, asiam na cih te azatkhiat na lam ah maizumpih loh in atamtheithei zekkhiat zatkhiat ding hanciam uhhi. A mau leh amau kimuan ngamna neingiat uhhi.

9. Mihau te pen ahaksak na tesang un hatzaw in ahaksat na tenzozo lo uh a, mizawng te ahih leh a haksat na te in zo ziau thei hi. Hauh na pen athubaih hizenzen lo in, ut thutawh akihau ziau thei hilo ihcihsa mahbang in. Haksat na tampi phulkul hi. Mi atamzaw in haksat na kiphul nuamlo in apelhdan ding lampi kizong zaw den hi. Ih hauhnop leh haksat na leh buaina tuamtuam te anawkzo ding in ih kiginzawk ding kisam hi. Na haksat na te na muhliat laiteng pen nang agina zo nailo na hihi. Ih neulai in khedap buldan cihte, khedan(pencil) tawidan cih te haksa kisa mahmah aa, ih liatkhit ciang in khedan(pencil)tawi dan, khedap bulhdan cihte bangmah thamhinawn lo hi.

Banghang hiamcihleh na khedan(pencil) leh khedap te akilamdang hi lo a , na pumpi hongkhang lianto in na tha hongkicingto ta ahihman in tua ciangciang haksa in na koih nawnloh mahbang in haksat na anawkzo ding dinmun ah ih om theihding athupi pen ahihi. Ih phutkhak ding haksat na pelhdan ding ngaihsun lo in ih phutzawh theih dan ding ngaihsut zawk ding kisam hi. Haksat na ih cihte pen temta bang in hong tathiam hong thakhauhsak te hizaw uh aa, haksat na apelh den te in ahaksatna pelh na munsantak mah buai pihden ding uhhi.

10. Mihau te sumngah hoih in mizawng te asum ngah uh hoih lo hi. Mipawlkhat pen athupi lo, bangmah lo in kingaihsun in ki enneu uhhi. Hauhna, pilna cih te ei ading in ngaihsun thei lo in ngahding dinmun ah zong kikoih ngei lo uhhi. Mi khempeuh pen Pasian in apiancil in hih pen mithupi, thupi lo ci in ciamteh lo a, ih lungsim sungpan ih bawltawm maimai ahihi. Mi thupi in ih kingaihsut leh ahi hipah in, mi thupi vetlo in ih kingaihsut leh zong ahi hipahzel lel hi. Ih lungsim puakzia tungah kinga hi lel hi. Mi atamzaw te in a zawn man in athuman mihoih ding in kingaihsun uh a, akha midan in kingaihsut thei deuh se uh hi.

Hau in sum tampi nei leng mawhna bawl in Pasian tawh akigamla ding dan in kituat hi hang. Tua pen thuman hi lo hi. Sum ih cihpen manbilu (Lens) bang in et lian na dan hi mai a, mi gilo khinsa na hih leh sum na neihciang in azahtampi in na gilo ding a, mi huh nuamsa in akipia khia mi na hih leh sum na neihciang in mi tampi huhding hi teh. Na zawn lai hun in khamtheih tawmtawm na zat leh sum na neih hunciang in tuahun sang nakzat zaw ding cihna hi mai hi. Kha mi apiangthak nahih leh sum aneih ciang in Pasian gamzai na ding in piakkhiat na tampi piakhia ding cihna himai hi. A kuama peuh pen sum leh paai neihman hauh man in a mizia kilaih pah kuamah om lo hi.

Amizia alungsim aa omsa hong pholak khia maw ahih kei leh hong behlap to maw cih hi lel hi. Hauh na in kua mah siasak lo aa hoihsak tuan lo, angei mah bang hi lel cihna hi. Sum hang aa mawhna sung ah alutding in ihki ngaihsut leh bel sum honglut ding adal tawh kibang hi hang a, ih dal leh bel a sangzo tekiang ah na tunglel ding uhhi. Sum ih cih pen van khat danmah hi lel a gentehna in ah temta zong pen an huan khat ading in mehteh mehgah at na ding in van khat hi a, mithat khat ading in mithah na van khat hileuleu in mulkimhuai van khat suak hi. Tua mah abang hi aa, sum ih neih man in na mizia hong kikhel ding hi lo aa na mizia pen na mizia hi le hi. Sum hang in mawhna ah kilut lo aa, sum pen sum hi a angei ah amah aom hi lel hi.

11. Mihau ten ahih leh a sepna tungtawn in lawhcin na muhding angaihsut laitak in mizawng ten ahun leh sum khekding ut zaw uhhi. Sangsia te ngaihsun le uhcin sangsia pawlkhat in lai na kiasiat phialzong un ka khasum uh tanlawh tuan keinung ci thei uhhi. Sangnaupang tawm ta le uhcinzong ka kha sum uh angei mah banghilel cihte, tua dan a khasum sangden cihpen kumpi nasep nop na ahang khat hi a, hahkat se takei leng zong kha sum sangciatciat cihpen mi atamzaw aut pen hi aa, ih sep na tungtawn in kha sum kipia ding ci leh sum tawmno cikcik angah zong tampi om kha ding hi.

Kumpi nasep leh mi khutnuai aa nasep tawh kuamah mihau om ngei lo hi, nek guk nei ahih kei nak leh. Hun leh sum akilei hi aa hun pen kinei behthei lo hi. Mihau te ahih leh avan bawlkhiat ahih kei leh a van zuak na pan un avan ii manphat na tawhkizui in sum ngah uh aa, gentehna in van khat pen nikhat in abawlzo ahi zong kum nga khitteh abawlzo pan ahi zong aman kibang den lel a, kua man abawlzahhun tawhkisai kikan sak man lo hi. Tua a van zuak pen ei ading in phattuam na aom nak leh atamman zong in kileisak veve hi. Tua mahbang in hauh theihna ding dinmun tam aa zong sup theih na ding dinmun zong tam veve hi.

12. Mihau te in neih beh ding neihthuah neihkop ding deih uh aa, mizawng ten tel uhhi. Gentehna : lungnop na leh hauh na cih te, pianthak na leh hauh na cih te, sum bawl mihau maw ahih kei leh ei nopsak bekaa om milmel cih te hi. Mihau ten ahih leh anih aa neihtheihdan ding zong uhhi. Mizawng ten ahih leh sum ih neih leh a dang khatzaw akinei thei lo ding dan in ngaihsut uhhi. Pasian in mihing te hau in leitung ah nuamsa in aom ding uh phal hi. Laisiangtho ah zong a thumang aa athu azui te hauhna tawh thupha pia cih kimu thei hi. A masang athupizaw aa koih ding bek aphal loh ahihi. Sum in suakta tak in omsak thei a, deihdan duh dan leitheih na, ih utut na ah pai theih na, ih it ih ngaihte huh na , Pasian gamzai na ding leh mihuh theih na cih te semthei hi. Sum hang in ih nopsak na suplawhding cih ngaihsut loh ding thupi hi. Ih nopsak dan tawhkizui in sum bawl dan ding ngaihsut dingkisam hi.

13. Mihau ten anasep net worth atangzai theih dan ding angaihsut laitak in Mizawng te ahih leh a sumngah ding bek ah buai uhhi. Net worth cihciang in asum muh na sungpan aleibat loh khit teh aomlai ameet apung te cihna hi. Sum meet muhtheih na ding van leh na angaihsut lai tak in mizawng ten sum ngahtheih na ding bek ngaihsun uhhi. Sum lut cih pen namnih om aa passive leh working cih om hi. Mizawng ten sum meet bawlna pen mihau te bek ii septheih ding sa kha uh ahih man in sin ding inzong tuat se lo uhhi. Mihau ten asin keileh zong asiam te cialziau lel uhhi. Mipawlkhat pen sum angah na atam leh tamzat uh aa hauh taktak ma aa mihau bang aa ih om leh bel ih hauh taktak ding hongkhak tanthei hi. Sum khol (saving) pen kipatna bulpi pen hi a, sum ih khol khitteh sum meetbawl na ding kipan thei pan ding hihang. Mizawng ten tu leh tu a nopsak ding teel uh a, asum ngahzahzah zangmang pahpah uhhi. Hauh nading ahi zong mailam ah ih zat ding ih zek ding ih koih ih khol den kul hi.

14. Mihau ten asum leh paai hoihtak in kemcing in kemsiam uhhi. Mizawng te ahih leh polhteh den uhhi. Sum ih ngahzahsung pan bangzah kembip ding, bangzah zangkhia ding cih pen athupi pen ahihi. Mipawl khat in tuabang aa koihtuam ding leh zat ding kicingkei ahih kei leh neingiat lo cithei uh aa, pawl khat in koihtuam kepbit tuam cih khawng amawkna hi lel cithei uhhi. Sum tawmno khat ahizong gelsiam theih hilel hi ci hi. Pekkhat ahiphial zong in hoihtak in kikhol thei veve hi ci hi. Sum kaneih tamdeuh ciang in sum kepkisin ning ih cih leh bel kataksa akifit ciang in exercise la pan ning cihtawh kibang lel hi. Sum tampi ih neihtheihna ding in tulai tak aa na neihsunsun hoihtak in na kepbit siamding kisam hi. Sum bangzahngah cihsang in sum bangci zat bangci zeek cih thupi zaw hi. Sum hoihtak in na kepsiam kei leh sum in hong uk ding hi. Ih neihsa sum tawmno khat hoihtak in ih kepsiam kei leh tuasang atamzaw koici keptheih ding.

15. Mizawng ten sum ading in nasem in, mihau te ahih leh asum in nasep sak hi. A kipat cil in sum bul ih neihna ding in mikhutnuai ah nakisem tek hi. Tuapen mizawng te ading in kumtawn nasep hi a, mihau leh hauh asawm te ading in abulkipat na bek hi aa atawntung in mikhut nuai ah nasep sawm lo uhhi. Mizawng ten tulaitak hunbek ngaihsut in nei uh a, damsung huntomno ci-in adeihdeih uh lei uha , mihau te ahih leh tuni leh mailam hunding khinkhai siam uhhi. Ka neulai akipan hong kihilh dan pen thanop na pen lawhcin na bulpi hi ci-in, hong kihilh lo khat pen ataktakin thanop pumgawp na bek kizang thei lo in sepsiam na zong kisam hi.

Sum muhdan nam nih ahi passive leh working hi aa passive income pen ih tup ih sawm ding kisam hi. Passive income zong namnih om in investment leh business om hi. Ih tuppi pen in nasep kul lo aa ameet tawh nuamsa tak aa omtheih ding ahihi. Nasep mah ih sepnop tantan ahih kei nak leh. A lohtheih loh aa nasep leh ut thu aa nasep kibang lo hi. Mizawng ten ahih leh abul pat na ding in hunnei lo sum nei lo ci-in adamsung un nasem tangtang uhhi. Mihau ten ahih leh nasem in sumkhol in meet bawl uh aa atawp na ah suakta tak in om hit hiat thei uhhi. Na dangtuamtuam ah sum kinei thei zel lel hi ih deihnak leh. Kua mah in ih taltang pan in thautawh hong ngim in, nipi nisim in sameh na nek ngeingei kul, khakhat in phone sum tuazah na thun ngeingei kul, tua ahih kei leh hongkap ding hing cituan sam lo uhhi. Ih ngaisut leh ngaihsut loh hi lel hi.

16. Mihau ten lauthawng pipi mah in semteitei uh aa, mizawng te ahih leh alauhna kizo sak den uhhi. Hauh na pen mikhempeuh in ki deih in ki ut aa, ahizong in asep leh abawlding te asemnuam abawl nuam kitam hetlo hi. Ngaihsun in gel hang aa tua pen ngaihsut na bek ahihi. Tua ih ngaihsut na leh ataktak kikal ah leiki dawh om in tua leipen sepkhiat na kici hi. Thu ngetcihtak in ngen in, ngaihsunsun mah lehang zong van pan in hongkia suk lo ding a, sepkhiat khat peuhpeuh ih neih kisam hi. Pasian inzong nasem tangtang te huhden hi. Hong hangsan sak theilo te ahih leh, lauhna, upngam loh na, lungkham na te hi aa, hih in ih ma hongkhak tansak den ding aa, ahau azawng kuamah khentuam nei lo ding hi.

Ahihhang in milawhcing ding te in hih hatsat na te kikhaktansak lo aa, mi lawhcing loding te in kikhaktan sak ding uhhi. Nuam ihsak na dinmun bektawh kikhang to theilo ding aa, nuam ihsak loh te zong ih phul kul ding hi.Nathak sin cihteh nuamlo hi, nasep behlap cihkhawng nuam lo hi. Ahizong in nuam ih sakloh te zong semsem leng atawp na ah kizongsang in nuam kisa veve lel haksa ih sak na hongbei lel hi. Tua pen nuam ih sak comfort zone behlap kici hi. Mi in haksa acih te zong en kingeina seh in nuam kisa lel ding hi. Tua hi leh midang tesang in kilawhcing zaw dingcih na hi mai hi. Tuabang aa cihtheih na ding in ih lungsimpuakzia ih uk zawh kul mahmah ding hi. Ih ngaihsut na ki uk sak lo in en ih ngaihsut na ih uk zaw ding ahihi. A tom in genni cileng na nuam ziau bek ih sep leh ihnun tak haksa ding aa, na haksa ih sep leh ih nuntak nuam leuleu ding hi.

17. Mihau ten sinbeh den uh aa mizawng te ahih leh atheikhin in kituat uhhi. A lauhuai pen kampau in banghiam cih leh theihkhin ingh cih hi aa, ih theih khit taktak leh taktakloh pen ih nuntak pih leh nuntak pih loh ah ki enthei hi. Ih nuntak pih kei leh ih bil in ngai khin za khin ahih kei leh , lai ah sim khin ahih kei leh kam in genkhin cihna bek hi lel hi. Thei taktak tel taktak cih na hi lo hi. Theih telna ding in sin kisam aa, theikhin ingh ih cih leh sin ning ihcihtheih hun ah lawhcing pan ding hi hang. Ih sepsa teng mah ih sep thapaih leh ih neihsa tengmah nei thapai ding cih na hi. Mizawng ten sin na ding hun leh sum neikeng ci den uh a, mihau ten ahih leh nakhat peuhpeuh ka siambelh leh meet pih ding hing ci den uhhi.

Sinna ding sum neikeng aci tepen sinbeh ding akisam penteng hi uh aa, tampi na sin leh tam pi na ngah ding hi. Lawhcin na ding in bangnei na hiamcih lam ah kinga lo in, kua na hiam, bangsiam nei na hiamcih lam ah kinga zaw hi. Kua mah asiam sa in pianglo aa sin napan asiam vive ahi uhhi. Tulaitak aa asiampen tezong akipatcil in asiamlo pen te uh ahihi ci hi. Tua ahih man in ih siamna ih zatsiamtheih na ding in sinbeh kisam den aa, ih sin kei leh kikhangto thei lo ding aa ih khantoh theih kei leh misisa lampai thei ih himai hi. Mikhempeuh in hongtaisan ding uhhi. Tua ahih man in khangto nuam na hih leh konglai post khiat te na sim sak zel in maw. Saimon Timothy