Midangte ciaptehna maimai tawh ka minam min ka laih kei ding hi

Midangte ciaptehna maimai tawh ka minam min ka laih kei ding hi

Leitung pen sum ngahna ding ahih nak leh a kisi ngam phial zahdong dingin kisemngam ta mawk hi. Ei meetna ding ahih nak leh bangbang ong kici zongin aw aw a cinuam kitam mahmah mawk hi. Ki ngaih sut huai mahmah kasak thu kong sungnuam hi.

Ih Zomipih honkhat ten sesum minthang, minleza te lunggulh manin Zomi hong daipih ngamlo mawk uhi. Kei nuntakna ding ahih nak leh Chinmi ong kici zong bang phamawh ahia? Kipum khatna ding ahih nak leh bang phamawh ahia? a cici honkhat ki om mawk ahihmanin ngaihsut phat huai kasa hi. Ih pu ih pate luahsuk ih minam min Zomi daipih ngamlo sihpih ngamlo cih limlim pen ih kipil sak mahmah hangin ahai lai ih hizaw hi.

Namdangten gulpi in Eve a khem bangin sumlepaai,minleza tawh hongzol bawl dinga ei sungteng hong tawk gawp nopman uh ahih lam ih phawk ding theihhuai/telhuai mahmah ta hi. Zomi ih hihna zong Pasian gelna om kei leh Zomi ih kicih theihna ding om thei tuanlo hi. Pasian in Zomi dingin hong bawl hi gegu utlo teitei aa ih om leh ei hangin ih minam bupin supna,mai zumnate ih tuak ding hi.

Nidang a gul bangin hong zolzol ten Pheisamh in misiamin a nek kik bangin hong nek tum dinglam phawk theileng hoih mahmah ding hi. Midangte mai biakbiak kullo ih minam min Chin/ Lai/ Zomi cini ci a kidotdot kullo Zominamte hihang. Zomi a kici teng kipawl/pumkhat thei peuh leng ih langah kuata pangzo ding ahihiam?

Mite ciaptehna Chin maimai khawng tawh Zominam ih hihna laih theih ngiat ding hilo hi. Chin State aa om Zomite ih hihi. State min khawng minam min asasa laite pen Ph.D ih hiphial zongin ahai mahmah lai ahihi. Sumlepaai,minleza tawh ih minam min ahi Zomi laihsawm keini. Ih mai azum ma in kisik kik sawm ni. Inntek hih mah a nuam penpen ahihi. Minam dangte kiangah mo thak banga ih om dending pen nuam hetlo ding hi.

Ka lunggulh lian penpen in “Midangte ciaptehna maimai tawh ka minam min ka laih kei ding hi” cih ih lungsim sungah ih neih tek ding akisam mahmah ahihi. Lunggulhman leh deihsak luatman aa gelh khialh at khialh a om leh kingai dam tek ni maw. Zomi ka hi hi. Suanno, Malaysia