Midang le nang kibang lothei ~ Job Cinpi

Midang le nang kibang lothei ~ Job Cinpi

Hun khat lai-in papi khat in, Vok khat, Bawng khat le Tuu khat kawi hi. Gankhawi pa in a gankhawi thumte ganbuk khat sungah khawi khawm hi, ci hi.

Ni khat gankhawi pa in a ganbuk sung panin vok man dingin hong kithawi hi. Vok in amah kiman ding cih a theih ciangin lau-in tai kawikawi a, a tai kawmkawmin ham zaza lai hi. Tua bangin a ham zaza ciangin a kianga om bawng le tuu in, lawm vokpi aw, bang dingin ham zaza na hia?

Ko nih gel zong nang mah bangin ei hong khawi pa in hong man pahpah a, ama hong kaih nana ah ka pai lel uh hi. Lau nading bang mah om lo hi, ci uh hi, ci-in bawng le tuu in vokpi kiangah gen uh hi.

Vokpi in, lawm bawng le lawm tuu aw, no nih gel le kei ka kibang kei hi. Note nih hong kimat ciangin bawng nawi le tuu mul deih manin hong kiman ahi hi. Na nawi uh leh na mul uh a lak khit ciangin hong khah kik ding uh hi. Kei ka hih leh ka sa nek dinga hong kideih ahi hi. Tai lo, ham loin mawk om thei ding ka hiam, ci hi.

Khat veivei, ei le midangte a kibang ding sain ei lungsim le ei thuakna bangin midangte tungah, thu kigen thei hi. Heh taak kei, khasiat taak kei, buai taak kei, ci-in tua bang lel tak a cite i hih khak loh ding kidop huai mahmah hi.

Na lawmte sim dingin na Share sawn in, Lungdam, JobCinpu (Zomi Laisim Nuamte)