Mi tuamdang khat in ~ Sia Genpu

Mi tuamdang khat in ~ Sia Genpu

Zomi Khangno tingteng mi 31 USA gam Tulsa khuapi panin Nashville Music City khuapi ah Gospel June 13,2015 ni-in hong pai uhhi. Youth Pastor Sia Genpu ( Neng Lam Gen ), Khangno makai Tg. Khaiboih, Worship lampan Sia Sian, Mission lampan Sia Mang cihbang mi 31 Pasian gamleh adikna zong masa cih ka muhteh i Zomite mailam kalsuanna namtui semsem ahihna ka mu hi. A pawlpi min cihte genlo vetse di. 31 cih thu ka ngaihsut teh Zeisu zong kum 31 a phak laitak in Leitungah a vaksan laitak hi
ding hicih ka ngaihsun kha hi. He…hem…kum 31 ka phak Kha tawh hong ki tuaksese zong ka lungdam pha diak hi.

Sia Genpu thugenna tomnono pawl khat kong hawmsawn nuam hi. LS Samuel Masa 10:6 Topa kha in khauhtakin nang hong uk ding a, amaute tawh laamin awng khawmin mi tuamdang khatin na kikheel ding hi.

A tuam dangkhat cihpen eipau aciktak in genleng Ui meikang bangin cih hi aa, Topa Kha in khauhtak in hong uk ciangin om hiathiat theilo Uimei kang bangin laamin ki awng ziahziah hi ci hi. Tha ka ngah mahmah uhhi.

Mihingte in tua nu, tua pa tua ciang bek tungzo inteh icih hangin Pasian in ciantan neihlo in i tupna tantan hong pianuam hi. Pasian tawh kop in tupna sangpipi neihni cihi. India galkap khat amau unau ah a u pen hi aa, zuu khamkham thei hi. Mite in a nu leh pa vakzo kei-inteh cih muhna neih himah leh, a Nu in ka ta pen nikhat ni ciangin Pasian thu ah hong pianthak pelhmawh ding hi ka thungetna tangtung ding hi cihtawh atapa mu hi. Mi hong muhna leh Pasian hong muhna ki banglo hi. Tate mimuhna leh nulepa muhna ki banglo hi cihi.

USA ah mihau 70% pen Jew mi hi aa, tua mite in a Tate kiangah ni simin, ” nang pen mipil milian ding hiteh, mi tampi amakaih ding mi hiteh ka cihcih manun mipil milian mihau hi ung”,cih Dr.J.M.Paupu in gen hi cihi. Tua ahih manin Israel mite in a ampauna uh Muk gah a nene uh ahihi cihi. Ni simin tate thupha piapia ni, mipil mihau Pasian a zahtak ding mi hiteh cih tate kiangah cici lel ni, a tang tungsak ding Pasian ap lel ni cih tawh tha hong dimsak mahmah hi.

Mikhat in Sia Pum Nang kiangah, “Sia aw, Pasian in Vantung leh Leitung cihte mihing cihte abawlma in bang bawl hi ding hiam? cih a dot leh, Sia Pum Nang in Lai Siangtho sunga omlo pi hong dong na hih manin kenzong aomlo pi in hong dawngleng, thu ahilolo a ngaihsunsun a gengen te Pasian in a satna ding Ciangpum a suihsuih laitak hi ding hi cihi”, cihthu hong gen behto hi. Ih mailam kalsuanna ding vai tawh ki sai ahilolo a ngaihsun hilo in, a hoih vive ngaihsunsun leh pu laklak lel ni cihtawh lungkim takin hong thapia hi.

Pasian Kha Siangtho in eite hong khel ciangin i nunlui tatdan tawh hong omom sak lo in a tuam dang khat in hong bawl hi. Nuntakna ki khel cihteh a ngei bang den keei cihna hilo hi. Nuntakna thak, ngimna thak, lam-etna thak tawh a lamdang khat in hong bawlpha nuam Zeisu kiang zuanni cih tawh Sia Genpu in Kha lungtai tak in Innlam hong ciahsak bek hilo in, Inn panin Tate kiang leh i mailam kalsuanna dingte ah
keipen Pasian tawh pangkhawm tonkhawm denin milian mihau dingin hong deih Zeisu hi cih lungsim hong guan mahmah hi.

Sia Genpu pen ka khua vuah Sang hong khah lai-in ka nau tawh Tan khawm hi aa, a kum pen kum 30 zong pha nailo ding hi. Zomi Khangno khat in Malaysia ah omlai Pawlpi lianpi a neih ban-ah Pasian thugen Talen Pasian in Zomite sungah hong ki behlapsak zel manin ka lungdam mahmah hi.

Theihding: Sia Genpu thugenna pen ama gen dan lianlian in hong pulak theilo ka hi aa, hong pulak thei hileng i nuntakna mi kim hong sukha mahmah dingin ka lam-en hi.

Thawn Tuang
Nashville TN USA
June 14, 2015