Mi 200 val atuang vanlengkhat aki Hijack sawmlaitak Passenger khatin honkhia

Mi 200 val atuang vanlengkhat aki Hijack sawmlaitak Passenger khatin honkhia

China, Beijing City zuanding in aleng vanleng tungkhatah pasal khat kitom in, vanleng hawlte omna Cockpit buk ii akongkhak lokgawp in vanleng Hijack ding kipatsawm cih South China Morning Post pan kiza hi.

Nung Saturday (Mar 18) ni in Ethiopian Airlines sungah thupiang ahihi. Hih Ethiopian Airlines pen Ethiopia gammi khuapi Addis Ababa City panin Beijing City lam zuanin alengkhia ahihi. Hih vanleng sungah Passengers akigawm in mi 200 val atuangkhawm uhhi.

Passengers lakpan in pasal khatin vanlenghawl te omna Cockpit buk sungah lutsawm in deihtakin phuphei in, akhe tawhzong suipheigawp hi. Tuaciang in vanleng tungah nasem Flight Attendants mi 2 in letsawm uh a, lenzolo uhhi. Passengers lakpan mi 2 mahin letsawm leuleu in lenzolo uhhi.

Tuacinag in Passengers lakpan in Cao Guoxiong akicipa hong kithawi leuleu hi. Hihpa pen Chinese Passenger khat hi a, Bodybuilder khat ahih manin, atha kicing in siamna ahoihkhop atheikhat hihtuak hi. Tuapa in thakhatthu in sualtungah sialpaisukziau in tuakhit ciangin vanlenghawl Pilot te’n hencip uhhi.

Minute 20 sungkhawngin tua vanleng sungah akitomtompa akhut anihin anunglam ah lehhen in opciksakziau uhhi. Tuapa pen akhut loklok ahih manin akihenna aki sutkhiatding patau ahih manin Cao Guoxiong in Passengers te kiangpan Headphone Cable khaute sutkhia in kiptakin hencipbeh hi.

Vanlengsung buaina apiansak ciangin vanlengzong Beijing City zuannawnlo photin Pakistan gam aom Allama Lqbal International Airport ah ki tusak hi. Tualai ah akitomtom Passenger pa ki tuakkhiasak in Police te khutsung ah ki ap hi.

Hihpa pen nungdiak in anasepna panin aki khawlsak khat ahih manin, alungsim aki siacipkhat hiding kici hi. Sihding laulo khat hi in, vanleng Hijack sawmin, vandawnpan kiatsuksak asawmkhat cimawk hi.

Ahi zongin tua Ethiopian Airlines pen bangmah nawngkaina omlo in lengkhia kikthei a, Beijing City ah geelnasa sangin nai 5 ziakaizaw himahleh lungmuangtak in tungthei uhhi.

Ethiopian Airlines sungah atuangteng ahonkhiapa Cao Guoxiong pen amai themkhat liamna om cihi. Tuapa pen AVIC International ah anaseppih te’n vanlengtual ah kipaktak in nadawn uhhi. Ethiopian Airlines panin Flight Captain inzong lungdamna laidalneu khattawh gelhin piasak hi.

More: Beijing Wildlife World ah numeikhat sahang in petlum, adangzong khatliam

Cao Guoxiong ii lauhetlo in vanleng Hijack ding akithawipa asialpaihzia leh mitampi nuntakna ahotkhiatlam akitheih ciangin Social Media tuamtuamah kisuaksak in thupi kisa mahmah hi. Ih siamna te mitampi phattuamding in ih zattheihding thupi cih phawkni. ZD Sawltak #zomidaily