Tembaw maw Babel? ~ Pu Thangboi

Tembaw maw Babel? ~ Pu Thangboi

Pasian’ thuzui khempeuh in Noah’ tembaw thu leh Babel Tausang thu ih theihngeisa ciat ahi hi. Tua tegel tungtawn in tawm lungngai khawm ding in kong zawn hi

Tembaw Bawlna

Pasian in Noah tembaw bawl in sawl hi. (Piancil 6 – 7). Bang cia phasak ding, bang ci lam ding, bang sing tawh bawl ding cihdong in Pasian in aneng atawng in hilh hi. Amah zong tembaw bawl hong kipan pah hi

Cikmah a tembaw bawl ngeilo Noah in tembaw gol khe mahmah khat abawlna thu akizak ciang in alawm agual, aveng apam, akhuapih atuipih, amipih asapih te’n vadongh pah ngeingai uh hi.

A tembaw bawlna thu agen ciang in azakha khempeuh in nuihsan hi. Pawlkhat bang in “Mize” cihsan uh hi. Pawl khat leuleu in “misokpa bel apapai hita ei” ci uh hi.

Atembaw bawlna mun pen mualtung hi sawnsawn lai ahih man in haivai mahmah mai hi. Tulai hileh Facebook tung bang ah ki nakko mahmah in ka um hi. Pawlkhat bang in Live bang khah in amun amual lak in a nuihzak huai dan gen un ka um hi.

Atembaw bawlciil lam khawng bang in kumdang sang in guahtui tawmzaw kan lai phial in ka um a, zahpih huai mahmah in ka um hi. Azi zong phunphun mai khathei ding hi. Azi in CDM khawng alutsan mel kitheilo hi

Ahizong in:

Atembaw bawl zawh kum 120 aphak ciang in athugente hong tangtung takpi mawk hi. Tuiciin hongtung takpi in tembaw sung a aomkha teng bek suakta hiau hi.

Babel Tausang Lamna (Piancil 11)

Tuiciin tun khit ciang in tembaw tung a tuangte’ suan leh khakte hong pung toto uh a mi tampi hong phata uh hi

Tuiciin tunna thu kigensawn toto uh ahih man in tuiciin thu theitek uh hi. Akikupkup uh ciang un tuiciin tungkik kha leh cih hong patau uh ahih man in Tausang khat lam ding in hong vaihawm uh hi

Babel Tausang deihtak hong lam uh a lawp thei mahmah uh hi. Aneu alian anumei apasal in diang ziahziah uh ahih man in thalawp huai mahmah hi. Ki thutuak mahmah uh hi.

Avaihawm Pawl bang lawplua kisa in nuinui khaliang uh hi. Tulai bang hi leh Facebook tung bang ah tua thu bekbek dimhiau ding hi. Like kipia ziahziah in kishare ziahziah khading hi

Ahizong in:

Pasian in Khat leh Khat akiho theilo ding in Hong bawlziau ahih man in amaban uh zomthei nawnlo in hong dinkhawl hiau uh hi

Ekkakna

Noah pen apilman, asiamman, leh athahat man a alawhcing hizenzenlo a Pasian’ aw za in Pasian’ sawlna mang in sem ahih man in alawhcing ahi hi.

Babel Tausang lamte alawhcin lohna uh pen aki thutuah lohman, avaihawm siamloh man, leh athahat loh man uh hi peuhmah lo hi. Pasian’ deihna tawh kituaklo, Pasian dong khalo, Pasian’ sawlna omlopi a semkha uh ahih man a lawhcinglo uh hilel hi. Adiak in Pasian in “Leitung tuitawh sawp nawnlo ding hi’ng” acih pen phawk khalo sese uh ahih man hi

Ngaihsut ding

Tulaitak a ih vaihawmna, ih hanciamna, ih sunmangte tembaw bawlpa tawh kibang ih hiam Babel tausang lamte tawh kibang zaw ih hiam cih lungngaih huai kasa hi. Pasian in ei’ deih dan a na asem hilo a en ama’ deihdan a ih sep ding hizaw hi. Lungdam, Mung Laan Thang (Tonzang, Zogam)