Malaysia, Sabah State sung aom Sandakan khuasung ah mawtaw guta minih akidelhna panin mawtaw kitaihkha in palik minih in liamlawh cih theStar pan kiza hi.
Monday ni zingsanglam 9:15am hunpawl in palik pawlkhat in mawtaw guta te mukhia uhhi. Tuaciang in alawmte ahuhding in zasakpah uhhi. Sgt Fadzil Bakar leh Lance Corporal Ismail Shamsudin tezong ahuhding in mawtaw hatsak mahmah in delhpah uhhi.
Tuabang in hattak in Speed tawh ahuhding in adelh laitak in, guta te tawh U-turn bawlna ah kiphukha in palik te anih un liamtuak uhhi.
Mawtaw kigu cih Police Report akibawl ciangin palik te’n khuasung ah mawtaw azongin avak kawikawi uh ahihi. Guta te’n palik te amuh uhciangin taisawm uh a, tuapan in tuahsiatna apiang ahihi.
Mawtaw kiphutkhakna hangin palik khat alu adeklam limliampian a, 9 veitak kikhui kulhi. Tuaban ah amit ataklam zong liam cihi. Adang palik khatpa ahihleh liamna bangmah ahuaisialua omlo cihi. Anih un Duchess of Kent Hospital ah zatui zaha akibawlkhit uhciangin ki tuaksak kikpah hi.
Guta te nihzong mawtaw kiphutna panin liamtuak uh ahih manin, Duchess of Kent Hospital ah zatui akibawlkawm in palik te’n kem uhhi.
Tua guta mi 2 tepen mithatsawm, mawtaw guta, vankham zatui zuakna leh zatna, lamzikpi tungah Road Accident piansakna cihbang in thu kibawlding cih kiza hi.
Guta te nihlak ah khatpa pen Local Malaysian gammi hi a, kum 31 khat gualpawl ahihi. Adang khatpa pen gamdangmi Foreigner khat hi a, kum 19 gualpawl ahihi. Hih guta nihte pen gitloh guktakna Crime tuamtuam tawh matding in akideih mahmah migilo te nahi sawnsawn uhhi.
Related: Malaysia Selayang – Kepong lamzikpi tungah palik te’n mi 2 kaplum
Guta te lakah khatpa pen abeisa in nupi khat ii suaitau “Gold Bracelet” suhsak in damiah taihngei khin ahih manin, tuatawh matding in aki zonzon laitak ahihi. Police te’n zong guta damiah migilo te benbengsam uh a, ahi zongin ki thuakthuaklai veve hi. ZD Sawltak #zomidaily
Comment piaknop aomleh...