Mexico gamsung ah Helicopter khat kia in mi 13 si, 15 liam

Mexico gamsung ah Helicopter khat kia in mi 13 si, 15 liam

Mexico gamsung ah abeisa Friday ni in 7.2 Magnitude thahatna tawh zinling gawpzel hi. Tua zinlinna munte ah a endingin apai kumpi thunei te zat Minister’s Helicopter khat kiasuk in, Van mawtaw khat dengkha sawnsawn a, mi 13 in sihlawh cih AFP pan kiza hi.

Tua atuahsia pen UH-60 Black Hawk Military Helicopter te hi a, zinlinna Epicenter zuanin alenlaitak in akia ahihi.

Zinlinna hanginbel asi kuamah omlo kici a, ahi zongin inn Building honpikhat kisia cihi.

Hih Helicopter sungah kumpi thunei ahi Interior Minister Alfonso Navarrete leh Oaxaca state Governor Alejandro Murat tezong atuang uh hi a, ahi zongin amaupen bangmah cilo hi ci’n President Enrique Pena Nieto in genkhia hi.

Ahi zongin Helicopter akiat ciangin mawtaw khat dengsukkha in, leilak ah aom mitampi in anuntakna beilawh in, aliamzong tampi omhi ci’n President in ama Twitter tungah genkhia hi.

Saturday ni in Oaxaca Prosecutor’s Office panin agenkhiatna ah tua Helicopter kiatna hangin pasal 4, numei 3 te aphual ah sipah uh a, adangte pen Hospital ah akipuak laitak in lamkal ah si uhhi ci’n genkhia uhhi.

Aliam bekbekzong mi 15 phahi ci’n Statement ahzong khahkhia uhhi.

Hih Helicopter akiat ciangin ahuhding in Rescuers Team te inzong delhpah uh a, asi aliam kuateng omhiam cih zongkhia pah uhhi.

Navarrete te’n Televisa Network ah agenkhiatna ah hih atuahsia Helicopter pen leilak panin vandawn asanna 40 Meter ah alen laitak in vanlenghawl Pilot in hoihtak hawlthei nawnlo in akiasuk ci uhhi. Vanleng sungah atuang Passenger pawlkhatzong liam ci uhhi.

US Geological Survey te genna ah hih vanleng kiatna munpen Pinotepa de Don Luis ah hi a, zinlinna Epicenter panin 37 km agamlatna ah akia hi ci uhhi.

Zinlinna hangin Santiago Jamiltepec khuasung ah aom akigawm in inn 50 bang kisia cihi. Building akisia te lakah Church leh Hall pawlkhatzong kihel a, ahi zongin misi kuamah omlo hi ci’n Interior Ministry te’n genkhia uhhi.

More: Taiwan ah Helicopter khat kia in mi 3 si, asi lakah Video Director minthang Chi Po-lin kihel

Zinlinna hangin kuamah silo in, zinlinna munah adelhin apai kumpi thunei Minister te vanleng hangin mi 13 in asihlawh uh hihtuak zawmawk hi. Sawltak #zomidaily