Malaysia, Melaka sungah palik te’n damiah migilo mi 2 kaplum, 1 taisuah

Malaysia, Melaka sungah palik te’n damiah migilo mi 2 kaplum, 1 taisuah

Malaysia, Melaka sungah Police te’n damiah migilo in aki ummawh pasal 2 thautawh kaplum uh cih theStar pan kiza hi. Tua kaplup athuak migilo 2 tepen hiamtawi uh a, Melaka Police tetawh Sungai Udang, Taman Bandar Baharu vengsung ah tuni Wednesday zingsanglam in akikap uh ahihi.

Tuzingsang 4:30am hunpawl in Hypermarket vanzuakna Building nungkhat ah mawtaw nambat “registration plate” aomlo mawtaw khat kikoih hi. Tua mawtaw pen migilo abeng “Crime Prevention” kici Police te’n mukha uhhi.

Tua mawtaw sungah pasal 3 om uh a, muanmawhhuai kisa ahih manin, Police Officer te’n sitsawm uhhi. Tua mawtaw sungah aomte hong pusuak un ci’n Police Officers te’n thu apiak ciangin, tua mawtaw sungah aom migilo te’n thautawh palik te kapmasa uhhi.

Tuabang in migilo pasal 3 te leh palik te thautawh aki kaptuakna panin migilo 2 te palik te’n kaplumthei uh a, ahi zongin khatpapen gamsung ah taisim in khahsuah uhhi. Asi migilo 2 tepen gamdangmi hiding in ki ummawh hi.

Video: Cops and robbers shootout in Melaka, two killed

Police Officers te’n tua mawtaw nambat akithuahlo mawtawsung asitcian uhciangin hiamvan leh thau pawlkhat, .38 Smith and Wesson Revolver cih thaute mukhia uhhi.

Hihvai tawh kisai in palik thuneipi ahi Melaka police chief Deputy Comm Datuk Abd Jalil Hassan in agenkhiatna ah hih buaina thupiang pen Wednesday zingsanglam in apiangtakpi hi a, aki taisuah migilo khatpa pen matkiktheih nadingin aki hanciam laitak hi ci’n genkhia hi.

More: Malaysia, Gombak kuamsung ah palik te’n migilo mi 3 thautawh kaplum

Hih damiah migilo tepen abeisa kumsung akipan Negeri Sembilan, Pahang, Perak, Terengganu State tuamtuam ah 14 veibang innluh in, damiah ataih kawikawi te hiding in ki ummawh hi. Tuaban ah mawtaw nambat aomlo penzong sitcianna akineih ciangin abeisa kum 2 hunlai in Johor sungah amangcip ci’n aki Report, mawtaw mangcippen kici hi. Sawltak #zomidaily