Meeting paizia (2) ~ J. Thang Lian Pau

Meeting paizia (2) ~ J. Thang Lian Pau

Constitution neih kul – Meeting paizia dik i zuih theih nang kipawlna constitution neih hamtang kul. Constitution in a phal man bekin aikeh constitution siksan bekin meeting kisam thei.

Agenda ding pilvan kul

Meeting agenda ding pen OB khensat theih nam maw, Executive Committee (EC) khensat kul nam maw, Khawmpi (assembly/conference) tut kul nam, cih khen siam ding.

Meeting sapzia

President/chairman leh general secretary/secretary geelkhopna tawh meeting sap ding. Aizong khawmpi sap leh khawmpi agenda ding pen EC thukimna aikeh EC in a sehte geelna zong hi thei.

Meeting sapna committee member teng piak/khak kim hamtang ding. A tawm pen ni khat peuhmah kihal thei dingin sapna ngah/thei khol tek le uh.

Meeting Agenda

Meeting sung a sawt loh nang leh meeting thukimna hoih tak ngah theih nangin meeting sapnaah Agenda kician takin tuansak ding –

• 1) CDM huhna vai
• 2) Minam galkap vai
• 3) Covid huhna vai ci ziau loin, gentehna

1) CDM Huhna Vai: CDM lut mi tua zah om, CDM huh nang sum tua zah kingah, bangzah ciata hawm ding, a hawm ding kua seh ding, gampua tungte huhna piak/puak kul i sa hiam, sum cian a om leh CDM lut thakte ading siit ding maw aikeh kisapna dangah zang ding?

2) Minam Galkap Vai: Lawng khat suah ding i ut pen ahih hang tua leh tua pawl nih pha ven, a niha huh ding maw, khat bek huh zo ding maw, bangzaha huh zo ding, hun bang ciang dong huh ding, a zat sawmna uh tua dan hi, i huhna a ngah khit uh teh ‘NUG zong muantaak tuan kei’ ciin din khawl kik seisai le uh, en bang cih ding?

3) Covid Huhna Vai: I theihsa bangin tua khua pen covid tawh buai mahmah ahih manun eimah bangin mun danga ten zong huhna kaihkhopsak a, tun huhna tua zah a phual tung khin, emergency a zat ding kicing ta le uh kilawm, ei sum muh teng a vekin khak veve ding maw, khua dang zong huh kul om thei, leh sum dong gige theilo ding i hih manin sum siit pawl nei ding?

cih danin Agenda kimzaw deuhin gelh leng Committee member-te kigingkhol thei ding, thukhensatna lah picingzaw baanah meeting sung sawt lo tuam ding hi. Tua ahih keileh meeting conductor in a gencian tawm ding tawh hun a sawtsak baanah a ut dana deihkaih gen kawm tawh thuah baih mahmah thei. A tunga pen gentehna hi.

Meeting Qourum

Committee Member meeting kah tua zah a phak kei leh meeting neih theih loh ding cih constitution ah a tuan kul. Gentehna seh thum suah seh nih (2/3), kua hiam teng bek meeting kisam sim thei cih pelh nang. Meeting thukhensat theihna bel meeting kah a lang sang tamzaw thukimna kizui tangpi.

Committee Member hi taaklo

Dam lohna leh khualzinna ziak hilo, a kizoma meeting thumvei a kah kei leh member taak hi nawn lo. Meeting ah thuduh lua den, gup tuam nei den leh a tamzaw thukimna pom hak sa dente member taak hilo. Meeting sim a pau ngei vet lote seem member hi taak lo taktak.

Thukhupna

Tutung i gennop pen Constitution neih leh zuih, meeting sapna Agenda tawh kisai hi bel. Mi hoih lo pen khat ahih hang, Min Aung Hlaing in thuneihna a zat ding teh constitution leh penal code section 505(a) paulap tantan lai sam hi. (Zop lai ding…) J. Thang Lian Pau