Meeting i cih ciang in

Meeting i cih ciang in

Meeing I cih ciangin I ki pawlna I ngimna, tupna leh I tuahkhak thusia, thupha leh hong pailaiding hunte ah I sepkhop ziading, bang cileng ki khangtoding, bang danin semleng, ki gualzo ding, cih bang dan a tuamtuam tampi tak omding a, tutung I gennop in ahih leh Church leh Community Meeting paizia tawm I gennuam hi. Bang hang hiam cih leh Zomite zat dan leh mi namdangte zatdan pawlkhat ki lamdanga, Meeting paidan I theih kei leh mi dangte tawh ki pawltheiloding, I ki pawlna cidamloding, mi dangte pen a gilo bek a ki ngaihsun khathei, mi dang te’n zong ei a gilo, amau a mudah a hong ngaihsun khathei uh ahih manun tulai khua hun huih nunzia theihhuaisa ka hih manin a thei nailota ding, tawm I kihawm sawn nuam hi.

1. Zomi pawlkhatte leh Minamdangte Meeting neihdan pawlkhat aki lamdanna: Mi namdang pawlkhat te’n Pawlpi Meeting leh Community Meeting aneih uhteh a sawt pen nai khat, nai nih kan hilo napi’n Agenda tampi tak zo uha, Zomi te’n ni khat in Agenda khat leh nih zong, I sualkhop hun omthei zen hi. Mangkang Pawlpi pawlkhat ah kumcin Meeting ka kihel kha ngei hi. Amau minute 45 ahih kei leh nai khat sungin manthei ziau uha, kua mah a awsang, aki kawkke zong ka tuakkha ngeikei hi. Community Meeting zong tuaci bang dan mah hi-in kicim manlo, I taw kham manlo hi.

Zomi Pawlpi pawlkhat te’ I hih leh biakna Pawlpi kumcin Meeting bang pen ni thapai in hih in ann leh tui I ki vak ngekngangh a, sum tampi bei lawh ban-ah a hehsa, a khasiasa a, khuttum liksa peuh a, aciah tawh etc, aom pawlkhat omthei hi hang. Tua manin mi pawlkhat in makai semnuamlo, meeting painuamlo thei uh hi. Hici dan pen tulai khangthak hun ah ki tam zatthei nawn hetloding leh tuaci bang a zanghzangh a omlai leh tua pawlpi leh ki pawlna ah tulai khangthak mipilte hong ki bualnuam hetloding uha, I ki puah kei leh ei om nawn lohteh I maban zomding mi kua mah om kei leh I ki pawlna a mangthang or na semzo nawnlo suakthei ding hi mawk ahih manin ngaihsuthuai hi.

2. Ai leh bang hangin namdang te’n nai khat sungin Agenda tampi zothei mawk uh hiam? Hih thu ka etciang in amau Meeting a neihma un Agenda neihding lianteng, Meeting paidingte tungah limtak ki zasak khol uha, aki muhkhop uhteh a thugending uh a minute ciangtan lianin, tua tung tawnin a ngaihsutna uh sungkhawm uh ahih manun hun tomno sungin Agenda tampi khin man uh hi. Mi pawlkhat tua dan a ki zasak kholleng, I muhdah khat I Agenda ahih leh a nialding in ki kumkhol thei mawk I hih manin hunsawtpila thei hi.

Zomi pawlkhat te’n Meeting I neih ciangin hong sam makai pawlkhat nangawn in Agenda na ngawn gelkhollo in tuni I Meeting ding bang ahi hiam, ci-a, akai khawm tawm tawh, Meeting Agenda khat genleng, eima deihna I lawmte zuihding deihlua kisa sermon danin gentehna tuamtuam zangin thu saupi a gen tawh, Pasian hong sawl hong theihsak hi aci tawh, ka thungetna ah ka ngah hi, aci tawh ki omthei mawk ahih manin tua in zong, hun sawtpila thei hi.

Pasian hong sawl takpi ahih leh I lawm te’n hong thukim kei leh zong eikia in seppahding ahi hi. Agenda pua mi pawlkhat leuleu in ngimna kician neilo in mi khut a, gul mannuam I cih danin ama sepzawh loh ama septheih loh ding peuh a hoihlua danin genin tua pen a lawmte pawlkhat in thukim kei leh a heh peuh omthei mawk I hih manin tua in zong hun sawtpila thei hi.

3. Tulai khangthak te’n bang dan Meeting nuamsa? Meeting neihding ciangin Agenda theikhol sakding, ahun leh amun kician sakding, hun man a kipan in hun man a tawpding, Agenda pawlkhat tawh kikumsa leh Amen piading a Meeting neihpihlo ding, suakta tak a, amau ngaihsutna genkhia thei ding, kawl galkapte dan a kua mah taibawllo ding, khat leh khat zahtakna tawh kampau in thugen ding etc, tulai khangthak te’n nuamsa uh hi.

4. Ai leh Meeting ah thu bangci genleng kilawm: Meeting kah cih ciangin I lungsim ah bang mah omkeita leh thu genteitei ding cih hikhin samlo hi. Mi pawlkhat misawlsa peuh in Meeting ah thugenthei mawk uha, thu kician kidong leh lah midang idea ahih manin a kician in gentheilo in thu adongte a gilo peuh in ngaihsun theimawk uh hi. Mi dangte Idea gending in meeting paikeileng, thusung keileng, I muan khat peuh thugen a maipha ngahding I ut manin Amen piakpih keileng aki lawm mahmah khat hi. I lungsim ah thugending a suah kei leh bang mah genloding, asuah luat leh zong, I genma in hih thugenleng a hoihtakpi diam, midangte heh nang ahi diam, I ki pawlna a khangsak takpi ahi diam cih ngaihsut masakding thupi hi.

“Suakta tak a, thu ki genthei I cih sam hangin awsanluatna, mi zakdah ding thugenna leh verbal abuse leh discrimination zangkhaleng lauhuai leuleu hi.” Midang khat thu I gen khaknop zenzen leh zong, Sia. Kam Khaw Thang gen danin amah om leh zong ama zak a, ama maitangah I genngamding dan mah-in athu gending, mimal ki muhdahna, melsia, puamsia I sakna leh ki lungkim loh na aom leh tuate Meeting ah genloh ding thupi hi. Tuate I genkhak leh Human Rights ki zatna gamte ah thukhun in a phal loh pawlkhat omthei ahih manin I ki pawlna khantohding deihsialua I thugenna hangin eimah thangah I awk khak ding lauhuai thei hi.

5. Ai leh Ageda bangci khentatding: Kumpi thukhun leh biakna thukhun tawh aki tuah nak a, I ki pawlna a khantohna ding ahih nak leh khentat ngamding, a mi I muhdah manin a thusun pumnial mawkloding thupi mahmah hi. Lam khat leuleu ah I zahtak mahmah khat ahi phial zongin kumpi thukhun leh biakna thukhun tawh aki tuah kei leh bang zahta a, a thugen ahoih phial zongin nialngamding, zuilo ngamding thupi, ahih hang a mi muhdah sawmlo ding thupi mahmah hi. Tuhun ah Zomi pawlkhat in I telkhialh pen a tamzaw thukimna cih ahi hi.

A tamzaw thukimna I cih pen ahoih mahmah nih leh thum aom a, kumpi thukhun leh biakna thukhun tawh aki tuah leh tua mun ah a tamzaw thukimna zatding ahi hi. Jesu nungzuipi te’n Jesu a leh hek Judas tangding mi alak ding uhteh laiai sanin atel na uh ahang pen Matthias leh Barsabbas pen mihoih mahmah tuak ahih manun amau zong atel zawkding uh theizolo uha, laiai sanin atel uh ahi hi. Ei pawl in mee tawh I teldingteh a qualification uh leh I deih dan aki bangtuak takpi mah ahi hiam cih ethuai hi.

Hoih keita leh qualify keita leh tanau meltheih ahauh a, mi mai-et asiam leh I thukhensat kikhial nuam mahmah a, tua pen ei kimawhsak nuamlo in Pasian deihna hi, Pasian tel hi peuh I cinuam thei mawk hi. A phawkhuai khat ah Pasian zahtak taktakte leh Pasian ompih taktak te’n mi a tamzaw hoihsak sangin Pasian hoihsak , Pasian zia tawh kituak mah hoihsazaw, dinpihngam in tuatungah ki ngangam zaw uh hi. A tomin genleng mite sang Pasian lauzaw uh hi.

Hih thuteng limtak a simte leh a hun leh amun zui a, a zanghtheite mi dangte tawh ki pawlna ah maimiallo lawmlawmlo ding uha, Zomite ki pawlna Church leh Community te ah zong hici bang danin I kalsuan theih leh tampi tak khangto dingin ka lam-en hi. Khaibawi