Philippines, Marawi City sung galkidona hangin mi asi 329 phakhinta

Philippines, Marawi City sung galkidona hangin mi asi 329 phakhinta

Philippines gamsung aom Marawi City sungah kumpi galkap te leh Islamist Militants te tudongmah kikap ngekngeklai uh a, khakhat bang acingding hitota hi. Zanni Saturday ni inzong galvanleng leh leilampan in thaupi tawh nakpi in Marawi City sungteng kumpi galkap te’n limkap mahmahlai uh cih AFP pan kiza hi.

AFP Journalist khatzong galkidona aphual ah thuthang kanding in apai hi a, kumpi galkap te’n galvanleng Air Force tawh IS migilo te omnateng Bomb khiatsuk uh cihi. Bomb akiatna munte pen meikuang pampam in, meikhu zong vandawn ah khuto meimai cihi.

Galkidona pen nasia mahmah a, agamla paninzong Automatic Gunfire thau aging ziahziah kiza hi. Tuaban ah galvanleng azatte uhzong “MG520 Attack Helicopters” leh “FA50 Fighter Jets” te ahihi.

ANC Television te’n agenkhiatna ah Marawi City sungah galdo ahuhding in Central Philippines panin galkap bekbek 400 bang vanleng tawh kipuakbeh cihi.

Galdoding in akuankhiading galkap te a innkuanpih tetawh mangpha kikhak in aki kahkah laitak zong TV sungpan in ki muthei cihi.

Philippines gam ii leitawlam aom Mindanao Island ah IS te’n phualpi in neihsawm cih President Rodrigo Duterte in atheih ciangin Martial Law tangkokhia a, tuazawh aki kappah ngekngek uh ahihi.

Tuciangciang Marawi City sung kidona hangin asipen mi 329 bang phata kici hi. Tualak ah Chechnya, Yemen, Malaysia, Indonesia cihbang gamtuamtuam panin IS galkap alut pawlkhat zong aki kaplum lakah kihel uh cihi.

Philippines Government Figure panin akizakna ah asi mi 329 lakah IS migilo te mi 225 sikhin cihi. Kumpi galkap panin mi 59 sikhin a, khuasungmi asi pen mi 26 phata hi. Adang asi mi 19 tepen khuasung tualgal aom ciangin aki hepkhiatna panin asi kici hi.

Tua adang asi 19 tepen thauvui thautang tawh asi hilo in, gal buaina hangin ataina ah sungpai leh cina, gilkial dangtaklua cihbangin asi uh ahihi.

Related: Philippines gamsung migilo te zat Facebook Account honkhat khakcipding ngetna kinei

Cimawh dongtuak galtai zong mi 309,000 bang phakhinta a, Marawi City panin ageinai tengah belhtheihding zongkawikawi tek uh cihi.