Mang’neipa (Dreamer): Pu Hau Do Suan (U.N. Ambassador)

Mang’neipa (Dreamer): Pu Hau Do Suan (U.N. Ambassador)

Laisiangtho sungah Zawtah (Joseph) mang ih thei ciat ding aa sanggam te in mangneipa ci uhhi. Amang’ zong tang’tung tak pi hi. Ei Zomite taangthu sungah zong Pu Khan Thaum in mangman’ aa “Tuzan ka mangin, ka baw (Sperm) pai in ka khutkuak tawh dawh in kapaihleh Thaangmual dungah meilum in kaai” cihi. Tua mang zong kei bang a tang’tung a ci hing. Pu Hau Do Suan zong Mandalay University a khah lai, Saya Smith Ngul Za Thawng tawh Bawdihgone University Christian Center (UCF) a omlai un mang khat man aa, “Ka mang’ in U.N Assembly ah ka tu aa, kamai ah BURMA cih lai kisuang hi.” ci hi.

Tua mangzong atang’tung ahihi. Tua hun laitak in, UCF ah aom teng, Sai Hti Saai (Lasiam minthang), Son Ceu (Lasiam minthang) Kap Khan Tuang (Tuangta, a Uu Cin Kim in, Saya Ngul Za Thawng a ap) te ahi uhhi. Mandalay EENT Zato Sayamah sem Ning Lam Cing zong om zelzel hi. A nasep uh pen nisim vok-an bawl leh vok-an pia, vokno suak sak, ak khawi, an pia cih bang ahihi. Nasep khat pepeuh maizumpih neilo hi. Hih “Maang” te a’taangtung na-in, Pasian upna, thuakzawhna leh kiniamkhiatna te hang ahihi.

Pu Hau Do Suan pen Cingpikot or Keeizaang khua, Pu Khai Za Dal leh Pi Luan Zen sungpan November 1, 1954 kum in suak hi. Dr. Maung Maung Aye M.B.B.S Rgn. Dy. Minister of Education tanu Daw Nwe Nwe Aye (Cingh San Niang) tawh 1980 kum in kiteng hi. Tanu khat leh tapa khat nei hi. Defense Service High School Meiktila ah sang kah hi. Middle Schoolpen Cingpikot or Keizang SMS kah aa, High School pen Tedim SHS leh SHS (3) Mandalay ah kah hi. Chin State teltuam mipil 7 Std Luyechun SMS Cingpikot or Keizaang leh 8 Std Luyechun SHS Tedim pan ngah hi. Manndalay Arts & Science University pan B.A zo hi.

Kawlpau pen nuhnialnial bek aa, Kawlte pawlkhat sangh siam zaw phialmawk hi. 1995 kum in National University of Singapore pan Master of Public Policy (MPP) ngah hi. Mangpau zong ahi cii pi hi. Tua hun laitak in Singapore ka om laitak uhhi aa, eimi om sunsun teng kaikhawn in, gualzawh lopna leh lungdam pihna ka-inn vuah ka bawlsak hi. Tua zan ko innah hong giak aa, zinsang ka khanlawh maa un na ciah hi. A lupna ka et leh a zanpuan silh pen khep siset aa, Paltan te’ siksingkuang sang’ a kiu maan sak zawlai hi. “HOKUM, kalapau” maan mahlo ding maw ka cibek hi.

Suan’ pen aneu lai akipan in, Papi te pau leh “Vamim no bang aa tuuihawng khu aa, a vak pah pawl” a hihi. Aneu lai kum 10 zong aphakmaa pek-in, Meiktila Khua nawl Galkap leen (Line) pan in Meiktila khuapi sungah Datsian (Cinema) en ding apai ciang in, sawtvei en lua ahih manin, ciah nading Bus om nawnlo aa, Datsian zung (Cinema Hall) sungah amahguak mah giakngam lel hi. A nuzong laphuah siam khat hi in ka um hi. A nusih ih zak ciangin Saya Rev. Khoi Lam Thang in “Ih Zogam pallun ding hi” cih la ngaih mahmah pen Suan’ nu phuah hi ci hi.

Amah zong pianpih kivakna (Talent) zong nei aa, lai-at “Aticle” at zong siam hi. “Masih ma kaung sih ma kaung = Omkei leh lah hoihlo, om leh lah hoihlo” A laphuah siamdan pen gen sawm nawn keng. Mandalay University a kahlai mahmah in zong University bup kamkiselna (Sakaye hluhpwe; Debate) om ciang amau History Department ta’ang in a mah kitel aa, kidem pahpah hi. Kawlpau siam mahmah cihna hi.

Mihing khatpen ih khansung in asangpen ih tun’ zawhna dingin, Zi leh tate panpihna kisam pha hi. Daw Nwe Nwe Aye pen Buddhist biakna sung pan khangkhia ahih hangin, Pu Hau Do Suan tawh akiten’ khit uh ciangin, Christian hong suak hi. Christian mawkmawk hilo in, aten’na a innkiim uhaa om Buddhist Kawl naupang teng kaikhawm in, Sunday School hilh hi. Eimi na’ngawn tua bang, bangzah taktak ih om tam? A tanu zong tan 10 (Matriculation) OB (Optional Burmese) Distinction ngah bek hilo in Kawlgam bup ah, OB mark a sangpen/ atampen hi aa Kawlgam News Paper ah kisuak sak hi.

1979-81 ciang Ministry of Foreign Affairs (MOFA)ah sem hi. 1981-83 ciang Ministry of Education Dy. Minister pa PA sem hi. 1983-84 MOFA ah Dy. Director sem hi. 1984-85 Permanent Mission of Myanmar to UN, New York, USA ah Third Secretary; 1985-87 Dy. Asst Director za tawh MOFA; 1987-91 Permanent Mission of Myanmarto UN, Geneva, Switzerland ah third Secretary; 1991-96 MOFA Head of Branch; 1996- Myanmar Embassy Canberra, Australia ah First Secretary; (No.1 BEHS Golden Jubilee Magazine pan)

Video: H.E. Hau Do Suan ~ U.N. Ambassador (Myanmar) @ United Nations General Assembly

https://www.youtube.com/watch?v=M39YcBGX_ls

Magazine sung a kisuak sak ciang leh Ministry of Foreign Affairs ah Dy. Director General hong sep kikal koiteng ah bangsem cih ka kanzopak kei hi. Kawlgam sungah Galkap kumpi thuneihna hunsung hi aa, UN uliante, Gamdang uliante tawh kizopna ah kammal khat bek kamphen khialna in luangsawng zahdong in lauhuai hi. Sr. General Than Shwe, Sr. Gen. Maung Aye, Gen. Thein Sein (PM)/ U. Thein Sein (President) thuneih hunsung Kawlgam zin hong laileen UN uLiante leh Gamdang uLiante Kawlpau to Mangpau to Kawlpau kamphen ding Pu Hau Do Suan kizangh hi. Thein Sein Government hun sungin zong, Secretary Hillary Clinton leh President Obama Kawlgam zin hong lailen ciang in vaidawn lak ah kihel den hi. Canada gam ah Ambassador asep sungin zong Ambassador lak ah asang pen Ambassador Extraordinary and Plenipotentiary ahi hi.

Tu-in New York ah Myanmar Permanent Representative to UN asep kawm in gam thum Mexico, Jamaica, Cuba te ah Ambassador sem kawm hi. Tuhun laitak in, Leitung gam 120 val in, Rohingya vai in Kawlgam alang pan laitak hun in, UN ah Kawlgam taangin luangkham in na asep laitak ahihi. Zomi sungah Kawlgam ta’ng in hih bang pan mun atung om nailo leh hong om kikpak dingin ka um kei hi. Zomi Ngalliam Vontawi Pu Hau Do Suan.

Khupkhan Thang Taithul
Norman, Oklahoma, U.S.A.
(Laisim mipite telkhialh loh nadingin,hih ka article at pen Pu Hau Do Suan Biography at hilo zaw in, Mangneite perspective pan aa ka-at hizaw hi.) January 11, 2018