Malaysia, Kota Marudu ah lamzikpi mencim in Motorcycle tawh mi 2 ahingtang in vuknelh

Malaysia, Kota Marudu ah lamzikpi mencim in Motorcycle tawh mi 2 ahingtang in vuknelh

Malaysia, Kota Marudu District sung aom Kota Marudu – Ranau Road kici lamzikpi pen tuzingsang in kicim ahih manin mi 2 si cih NST pan kiza hi. Tua asi mi 2 tepen Motorcycle khattung ah atuangkhawm uh hi a, upmawhloh laitak in lampi kicimvat ahih manin, tua ahawlpa Motorcyclist leh anungah atuang Pillion Rider te anih un ahingtang in leisungah kivulhnelh cimawk hi.

Hihvai tawh kisai in palik thunei ahi District police chief Superintendent Mohd Izaan Abdullah in agenna ah tuni Friday zingsanglam 7:30am hunin Jalan Marak Parak lampitung ah thupiang hi a, District Fire and Rescue Department te’n hong zasaksawn uh cihi.

Police Team te’n hih mencipna aphual ah delhpah uh a, ahi zongin tua Motorcycle tawh khualzin mi 2 tepen asisa in aluanghawmbek kimukhia cihi.

Zingsanglam 10:30am ciangciang tua Motorcycle tawh khualzinte pen kuacih ki theician nailo cihi.

Ahi zongin sunlam 12:30pm hunpawl ciangin Update kizakik a, Motorcycle tawh atuangte ii aluanghawm pen leisung panin ki lakhia theita cihi. Tuaban ah ahawlpa Motorcyclist pen kum 39 aphakhin Jaiman Bien kici a, anungah atuang Pillion Rider pen kum 22 aphakhin Edmond James kici hi.

Hihte nihpen Motorycle tawh apailaitak in thakhatthu in lampi kicimvat in, hawkguam sungah anih un ahingtang in aki vulhnelhsuk ahihi.

Hih tuahsiatna ah Kota Marudu leh Ranau Fire and Rescue Departments panin ahuhding in Firefighter mi 14 in delhpah uhhi. Statement aki khahkhiatna ah Firefighter te’n kawbia “shovel” khawng zangin leisaai te thaikhia uh a, asungah aki vulhnelhkha te ii aluanghawm zongngeingai uh cihi.

Misi khat ii aluanghawm pen 8:31am hunin kimukhia a, akhatzaw pen 9:28am hunin ki mukhiathei hi. Tua misi luang 2 tepen Police te khutsung ah ki ap in, Police te’n akisam bangin vaihawmding uh cihi.

Asi mi 2 te ii zat ahi Honda EX5 Motorcycle zong leisung panin ki mukhia hi.

Sabah Civil Defence Department director Colonel Kamal Mokthar in agenna ah tuahsiatna apianna ahi Kota Marudu kuamsung tengah abeisa ni 2 sungteng guahtui tammahmah cihi.

More: Colombia gamah mencim buannawng lakah mi tampi awkcip in asi mi 210 phakhin

Tuahangin lamzikpi tolhkhia, kicim in 30 meter sungbang mencim in nawkkha hi. District Public Works Department te’n hih mencipna munteng hoihtak in etcianna neiding uh a, Warning Sign zong akikoih nadingin thu kipiakhin cih kiza hi. Sawltak #zomidaily