Malaysia Zomi Laaizomte-tawh Hunnuam ~ Pu Zokhai

2016 Malaysia Zomi Laaizomte-tawh Hunnuam ~ Pu Zokhai

Pasian’ geelna bang-in 2016 January 6 ni-in Zomi laaizom zata’ laaitual leenna Malay gamlei ka-siik kiik-a, keima’ aituam (private) vaai-tawh azin kahih man-in Zomi kipawlna leh biakna makaaite-zong zasak selo-in KLIA2 akici vaanleengtual thak sitset katuu-hi. ZAM President Sia Hau Khai-in, “Malay nong hawhding za-ing, nong’ tuk hun-in kei vaanleengtual-ah om lianding kahih ciang-in lem mahmah” hongci ziau-a, ama’ kiang-ah, “Hong tungsim khianding kacihleh minam vaai-ah kipelhsim theilo suak I-hive” ci-in vaanleengtual-ah Sia Hau Khai, Sia Tuangpu (ZAM: Dongtuakte Aphualdelh Tangzaang), Pa Nang Suang (Laaitui Upa & ZCF Bethany Upa), Pa Tawng Mung, Tg. Dal Khup, Tg. Tungpi amauteng-in hongna muak uhhi.

Sia Hau Khai’ mawtaw (proton wira: sedan)-tawh ahitheiteng tuang-in Pa Nang Suang te-nupa leh Pa Tawng Mung te-nupa’ saapna Siri Kuching-ah ka-tung uhhi. Tua ni-a kipan asuun azaan-in Sia Hau Khai-in hong thapaihpih tosuak-in, 2016 Jan 18 nitaak ka’ leenkiik hundong hong kithuahpih ciatciat-in, amawtaw-tawh ka’ uutnana-ah hong taaipih zialzial-in nuam ka-kisa mahmah uhhi. Palik phual leh Court lam-ah Sia Tuangpu-tawh kithuah den-in, hun kihawmthawh tawntung zah-in nuam ka-kisa uhhi. Nikaai nung-ah hunlem zil-in naute teng-tawh bawhlung-zong kimawl-in 2016 ZAM Cup vaai dingbang lungdeih tongkum ngeeingaai-in hunnuam vive kizangh kha-hi.

Sia Hau Khai-pen 2012 Zomi Nam Ni zinmaang-a ka-hawh laai-in full time naseem ciatciat kawm-in ZAM-ah amapang khangno citak mahmah khat hi-a, 2015 October kha-dongtak na aseem paisuak hi-in, ni-khat nai 4 khawngbek ihmu ahihman-in, “na’ nasep akhatzawzaw khiam in” kacihliang nasep hahkat mi thupi khat ahihi. Ama’ nasepna-mah pan-in lawhcing ahihman-in minam donna-a taaisuk taaitoh nading taxi-zong lemkhinlo ci-in mawtaw alei-giap hi-a, mipih khenkhat-in ZAM sum-tawh alei daan-a a-ummawh giugiau-zong omtuak-hi. ZAM pan-in card zuak-a makaai khenkhat-in sum tampi angah a-om phial zong-in Sia Hau Khai-in “asáng”-zong alaplo khat ahihna mimal-in ka’ theihpih ahihman-in mipihte’ upmawhna akhial ahihi. Mipi lampan-in, “upmawh I-neihleh kidong ciatciat lehang mimal ki-itna leh kitheihtelna piang thei-a, minam cidam nading zatui manpha mahmah khat” ahihi.

Biakna lamsang batkhaakna:

Khua upapi Pa Nang Suang leh naute teng’ thusiamna-tawh ZCF Bethany Khangno hun (09/01/2016: Nitaak)-ah hunpi nuamtak zangh thei-in, khualum mahmah leh Australian te’ suahtaakna-tawh kizuui-in pheituam tom-tawh ding ceelcaal kahihman-in comment tuamtuam-zong kimu-in ka-angtang mahmah-hi. Pasian’ deihna ahidiam, Sunday Biakna hunpi zanghding khuatual Pastor pa lemlo vat ahihman-in hunpi kei hongpia leuleu uh-a, Evangelist khualzin mahmah kabang liang-hi.

Kaalkiik Sunday (17/01/2016) ciang-in Sia Hau Khai leh Sia Kap Lian (Former Treasurer, ZAM., tu-in US, Oregon State, Portland-ah teeng) te’ patkhiat EBC Pawlpi-ah Sia Hau Khai aleending-zong naaita ahihman-in hunpi va-zangh thei-a, keizong mipi maaimuakna hongpia uh-in tua-ni biakpiakna hun-ukpi aseem Pa Cia Lam-a kipan Tedim – Lawibual veengte leh sanggamte honkhat-tawh kimu-in, meelmuh tongsaan cim manlo liang-in nuam ka-kisa uhhi. Tua hunnuam khit ciang-in, ZCF Canaan Khangno hun-ah hunpi zangh-phei leuleu-in khangnote’ neihding-a lunggulh gamtat kampau leh zialehtong lamsang naakpi-in gen-in, itna khitui luang-in hunnuam ka-zanghkhawm uhhi.

Minam Kalsuanna lamsang:

ZAM Makaaiteng’ thusiamna-tawh 18/01/2016 suun nai 1 – nitaak nai 4 ciang Malaysia-a biakna makaaite leh khua makaaite ahitheizah-tawh hunnuam zanghkhawm thei-in, Malaysia-a Zomite don ziading lungdeih sinthu ka-suut thei-a, ka-lungdam mahmah-hi. Thamlo-in, ZAM Makaaiteng-in mipi’ maai-ah Puanlaaisan hong-ok sak-in hong pahtawi uh-a, ka-angtang mahmah-hi. Hih holimna-a hongpai biakna makaaite leh khua hausate khempeuh tung-ah naakpi-in ka’ lungdamna leh ka’ angtanna kahong pulaak phapha-hi, Pasian-in pawlpi mite, mipih, khuapihte akom ahuai zo seemseem ding-in pilna, cidamna, sumlehpaai-a kipan akisam bangbang hong phungvuh seemseem tahen!

ZAM makaaiteng-tawh ahihleh unau kithuah-in kithuah vet kahih man-uh’n atuam-in formal meeting or session kinei manlo-in, hunlehmual zil-in holim kamkum-in nuihciam ka-leelkhawm uhhi. ZAM Upaphualpi inn bang-in nei/zangh-in President pu leh Sia Khoi Tuang, (upa Cinpi-zong zaankhat honggiak hiven, ihmut cim zolo hi’nteh, hongzom nawnkei hehehee) koteng giak-in ziingsang nai 4 kiimkiim-dong soccer enkawm, holimkawm, ziingsang nai 9-a tho lianlian cihbang-in hunnuam hong zatpih uhhi. ZomiDaily Sia Joseph Mangseen-zong hun hongpia-in mipihte’ muhlehzaak theihding-in ZAM kipatlam-a muhlehtuahte-a kipan minam kalsuan nading lungdeih sinthu pulaak theihna maaituahthudotna President pu-tawh hong neikhawm sak-a, ka-angtang mahmah-hi.

Mimal-a hong neekngaih-a hongsam tampi lak-ah Laisaang Pu Hau Thang (Zotuallai Laibu khat hong citpiak), Sia Tuangpu (ZAM: Anihveina bangpen Genting High Land tuiciim luui-a ava-mat mualdawn ngasa lim mahmah hilaai) leh ka’ tupa Khual Hatzaw te-nupa, Ngalliam SK Khai leh DN Thangpi, Hertamas Khuapihte cihbangteng’ kiang bek-ah hunpia-zo kahihman-in hun ka’ piak zawhloh sanggamte’ tung-ah alungdamlo hi peuhmahlo kahihna-zong phone nangawn-tawh hong hopih kiik manlo liang-in ka’ kisuanna hih pan-in kahong pulaak nuam-hi. Ka’ innteekte Pa Nang Suang & Nu Khawl Nuam, Pa Tawng Mung & Nu Muang te nangawn-tawh nihvei thumvei khawngbek ankuang uumkhawm manbek liang-in kimanlah ahihman-in akuamapeuh-in hong telsiam ciatding ka-lamenhi. Kinotuamna hong citpiak khempeuh tung-ahzong naakpi-in ka-lungdam mahmah-hi, Pasian-in sumnu sumpa namtui tak-a alam ziahziah seemseem ding-in hong phungvuh tahen!

Tongciampih Ngalliamte-tawh:

Cheras Pertama-ah Paltan SK Khai leh Paltan DN Thangpi te’ kiang-ah Sia Tuangpu-tawh leengphei-in, si leh hing kimu bang-in hunnuam tumdang mahmah khat zanghkhawm-in, nunluui hunte leh Vaaigam ka’ nusiat nung-a amau’ muhlehtuahte hong suut uh-a, ankuang ka-uumkhawm uhhi. Nuui khawm zeel-in, khitui mualtuang khawm zeel-in, holungkum cim manlo-in nuam kasa mahmah uhhi. Athaai ciang-in Paltan SK Khai-in KFC hongvaak-in abehpa ahi ZAM President pu-tawh kava zanghkhawm uhhi. Mual hong liamsan ngalliam tampi lak-ah cidam-in meelmu tong kisaang thei-a ka-om theih man-uh’n naakpi-in ka-nuam uhhi.

Lamka lam-a Zomipihte’ gaal ahi Meitei gaalkaapte-tawh akinawkna: adiak-in Paltan SK Khai bangpen thautang-in a’ guitar tum laai khavang zihziah, a’puan-ak khavang liipliap, ama’ gun/vun nangawn dulhlo cihte-a kipan aneng-atawng-in hunlem khat-ah kahong gelh dinghi. Pasian-in koikoi-a a-om Zomi Gaalkaap khempeuh hong kepbitsak tahen! Luangkham-a minam’ ading amapang mihing limlim-pen ama’ khang ahihkeiphial lehzong atu ata khang-ah Pasian-in laamsaang ngeeingeeiding kei mimal upna ahihi, tua ding-in tongciampih khempeuh Pasian-in hongphawk tawntung tahen!

Malaysia’ Khantohna tungtawn-a Haanthotna:

Malaysia-pen 2012 Zomi Nam Ni-a kapai laai hun-tawh naakpi-in kikhaai sak-huai zahdong-in khangto-a, building hoih mahmah, lian mahmah tampi nana po-thuah zihziah-hi. Tua sung-ah ZAM Upaphual-zong nana-om thei-a, intranet system kizanghte bangpen Australia-a akizanghte tanzil-mah hi-in, lamdang-bang kasa liang-hi. Hih khantohna-mah bulphuh-in “Malaysia-a Zomi khempeuh-in hih hunlehmual hoihpen khahsuah hetlo-a, gam thumna paidingte hitaleh Kawlgam ciahdingte hitaleh ahun atun ma-in mannei tak-a zatsiam nading”-mah koikoi-a ka’ thugen bulpi ahihi. Laaizom khenkhat-in Malay-ah tualtang kisa-in neumuh thei-a, khasum hawmthawh-a nasep teelteelna-tawh hun amawkbei tam simsim ahihna-in lungsim hong nuamlo-sak ahihna pulaak-in, “gamdang-ahzong hihkaan hituan khollo” ahihna pulaak-in haanthotna ka-nei den-hi.

Asia gam-ah Malay akhangto penpen gam khat hi-a, Zomite’ ading-in bangzah-in hoihhiam cihleh:

• Nasep-pen certificate lo-a septheihna min (Certificate kikal tantanlo)
• Siah (tax) pialo-a nasepna mun (Malay leh Kawl Gamukte’ kiang-ah siah piak kuullo)
• Nitha & Khasum lamsang gam thumna zahdekdek-a akisaanna mun
• ဧည္႔စာရင္း တိုုင္ kuullo-a lawmte’ kiang alemlemna pansan-a septheihna mun
• Natna satna khat kituakleh Kawlgam’ sang-a ahoih zawtham, sum I-neihkei phial lehzong Suu Kyi Zato, ACTS, MSF-a kipan NGO Zatoneute akicinna mun

Hihzah-a munlehmual hoih akihon laai-in naseem-a, biakinn khawng-ah tuaituum thapaai lozaw-in, kikhop ngeina ciang longal avaal akaan-a lasin thapaai, antang thungen thapaai lozaw-in, thumaan cihtakna-tawh naseem lehang gamthumna hitaleh Kawlgam hitaleh I-tuntunna-ah kimaaipaak zawding, ei mahmahzong lungleen khuangaihna leh lungkiatna-tawh kigamla zawding cihteng genpi-in ka-nei thei-hi. Vaaithupi lawmlawm ahihkeileh vaak-haat hetlohding, akimante ataangpi konglak vaakna mahpan ahihna-zong theihbangbang-in suutpihna ka-nei-hi. I’ vaakvaak ciang-in muh kihau-in, sinnop, ciapnop kihau thei ahihman-in supna kibehlap zawden-a, lamet lohpi nasep nangawn kipelh thei-hi.

Pasian-pen biakinn bek-ah a-om akisak khaak nawnloh nading, nasep taan liang-a kikhop tantan-zong akuul masa ahihlohna theihcianding-a kipan akhual atual-ah minam sung-a akisam thuguipi-a ka’ sehthu ahihman-in naakpi-in ka-suutpih thei-hi. Athu-in, neekkhopciang pawlpi-in apiak ahihleh thu-khat, unau meeltheihte’ kiang mah-ah la-zeel, love-gift tungpeuh-ah kinga-a biakinn khawng-ah I-thapaih sang-in naseem ciatciat-in sumpi maantak pia lehang atua seem-zong Pasian’ nasepna namtui mahmah hizaw khading cih kei mimal muhlehsaanna hi-a, holimna-ah hong kihel zolo sanggamte’ ading-in ahong gelhkiik kahihi.

Atawpna-ah;

Tütung Malaysia hawhna-pen private-purpose pan-in multi-purpose -in Pasian-in hong laihsak-a, Ama’ Hoihnaphapi-tawh hong phungvuh-in, lamet ngam hetloh nop cihtak-a anuam hunte it leh ngaih teng-tawh hong zatkhawmsak-pen lamdang sa-in Pasian’ Min ka-phat-hi. Minam, gamlehlei, sumlehpaai, kiukna, siamsinna-a kipan leitung thu khempeuh suutsuut lehang atawpna Pasian bekmah hiden-hi. Tua Pasian-in Malaysia-a Zomi Laaizom zatamte’ kisap khempeuh hongsik tahen! Zomi Pasian’ Thupha! Zokhai