Kumthak lungzuan ~ Zomi Quavadis
Theih loh kikal in hunte hong beibei a, sangkah lai a khakhat sung zong sawt isak mahmah pen gelna saupi tawh na I sep taktak ciangin kumkhat zong a sawt het lo ahihlam hong kitel mawk hi.
Tulai taka ka omna inn Wisma Cosway, 26th floor panin ka khuadak a, KL innsang nihte nupa kitawng ngei lo, itna tawh khut kilenden bangin a ding khawm hilhial ka mu hi. Meite taang zihziah in, khuasung bangpen sun kasa dektak phial a, ahizongin ka naiah tua ka khuadak laitak hun pen 11pm (December 31, 2012) hi ta hi.
Kumlui mangpha khakna leh kumthak dawnna mangla minthang mahmah “Auld Lang Syne” akici pen mikim phialin phone sungpan na ngaiciat uh a, ka nasepna sung leh a kimteng bangah sun akipan na kihong in, ka ciah khit ciangin zong tua laa lunglenhuai mah ka galzak ciaiciai lai hi. Lunglen dan pen kam tawh gen zawh ding hi lo a, lai tawh zong gelh gaih khit zawh ding zong hi peuhmah lo hi.
Kumdang hileh lawm leh gualte tawh aksakan umcih in zusan thawl thum khong tawh tubial zeizai kawma kumthak akidawn ngekngek hi a, tukum tak ciangin tuate ki ngaihsun kha lo bek hilo, kumthak tawh kithak khom kha ahi diam cihkek khatin ngaihsut inzong ka nei kha kiuhkeuh kei a, 7\11 Store pana ka lei Capuccino niangtui bungkhat tawi liuliau kawmin ka khua dakdak mai a, sangpen Pasian tawh kiho in hong piaksa simzawh loh thuphate hangin amin siangtho ka phat thapai hi.
Tuabanga keilekei kikhol a ka lungsim leh ka mitkha ka vak kawikawi sak laitakin cina pua Ambulance moto ong ham vava mawk hi. Tua ka zak phetin Kohima (Nagaland) khua laizang a om War Cementry mualsuang tunga kigelh thu minthang mahmah pen ka mitkha in ka galmuh pah hi. Tua mualsuang tungah hih thu kigelh hi. “When you go home tell of us and say, FOR YOUR TOMORROW WE GIVE OUR TODAY”.
Eikam tawh a theihnop pak dingin khia leng “Cidam a inn tung kik na om uleh ko galsunga site thu hibangin na gen un. Na mailam nuntakna uh a nop ding kong deihsak manun koten ka tuni nuntakna uh ka piakhia uh hi.” Hihthu pen ka lungsim sungah a thakin hong nungta kik a, ka ngaihsutna khempeuh hong tuamcip hi. Keizong nikhat ni ciangin asi ding hitang a,kei nunga nungta laite phattuamna ding ka nuntak laiin bang sem ding ka hiam ciin ka lung ngaingai dihdih hi….
Tuabang teng tawh minute leh secondte hong paipai a, 3am hong sat tamawk ahih manin lupding ka khensat hi. Ihmut suak lopi ihmut sawm zong eilehei a ki gimbawl tawh a kibang ahihlam ka telpha semsem a, kawi khilkhial ding khong om leh maw ciin melmuh loh gam vangla a om ka ngaihno mitkha ah bawltawm in hong za kei taleh “Hapi niu zea, mai beibi” cikawmin kikhim ka kipan hi. Francis Lamthang
Comment piaknop aomleh...