Malaysia-pen Zomite’ ading bekthamlo Asia gambup’ ading-a akhangto mahmah gam khat hi-a, tua sung-ah Zomite tualbial zihziahthei I-hihman-in naakpi-in Pasian phat-huai kasa-hi, banghanghiam cihleh Kawlgam kiukna kikheel-in khantohna tu-in kipan lehzong KL akibat nading kum 50 kiim peuhmah kisam laai khadinghi.
Hihbang akhangto siingdang’ khuatual-ah Zomite ataangpi I-khuasakzia, sungtum pusuahzia, neeklehdawnzia-a kipan I’ gam-a I’ nunluui ngilh-in nuam I-sa thei-a, Pasian’ Thupha-mah ahihi, ahitazong-in itna leh thukhualna-tawh I-zatsiam keileh tua Pasian’ thupha-pen eima’ siatna hongsuak thei-hi. Nasep tam mahmah-a, I-hawmthawh mahmahsaam hang-in kha-khat RM 900-1200 cih-pen asia hilo-hi.
Zogam-ah na kiseem nuam mahmah taleh khasum, nitha naitha kician-tawh sepding a-omlo ahihi. Tua hi-a, Malaysia-ah nasep-pen naakpi-a a-uut-huai ahihna I-kiphawkthak sak nuam-hi. UN vaai-tawh gam thumna pai theih nading lampi-zong nidang bang-in vang nawnlo ahihseem-in hoihtak naseem-a, geelna leh ngiimna athak nei-in, tua ngiimna-tawh kituak haanciamna leh thukhualna-tawh seem lehang gamdang cih bangmah hituanlo,Pasian-in koikoi-ah thupha hongpia theilua ahihlam I-mu dinghi.
Gamdang cihzong Pasian’ thupha lo-tawh anuam om tuanlo-hi. Lungtang kitapna, khantawn khitui luanna, tate’ maailam vangik bang-a khantawn phial-a puak keeikaaina-a kipan psychological, social leh spiritual laden akici lungsim, sahkhua leh khalam vangik apua keeikaai, pualah-a atuuk mi-zong amunmun-ah omhi. Alangkhat-ah, Pasian’ thupha-tawh anungta mi-pen koikoi om taleh lungmuanna leh khamuanna-tawh innkuan kip, innkuan nuam leh innkuan cidam tak-in khuasa uh-a, tua-in VaanGam maleep ahihi.
Tua ahihman-in, hong kimat ma-in, dahna kahna, natna satna-in hongphaak ma-in nasep nading leh sumzon paaizon nading-a hih hunlehmual-hoih mahmah-pen khahsuah hetlo-a I-zatsiam nading naakpi-in I-ki haanthawn uhhi. Malaysia-pen gam thumnate bang-a tax piak akuullohna hi sawnsawn-a, I’ sep bangbang-tawh kituak-a akingahna mun hi laailaai ahihman-in khasum atam I-ngaakngaak kaal-in zaanhun-in hongpha khaleh kiseem thei nawn loding ahihman-in Topa’ hongpiak Nii ataan laai-in naseem-in nulehpa, ziilehta leh ulehnau te’ phattuam nading hahkat ciatni.
Hih thuhoih hahkatna-tawh I-manlah takciang-in lungleen khuangaihna leh lungsim gimna akici lungkiat lauthawngnate-tawh I-ki gamla seemseem ding-a, taksa leh kha, lungsim cidam hiilhialna-tawh ma I-nawt zoding uhhi. Pasian-in hong ompih kimciat tahen!
Zokhai
(Tomkaal KL, Malaysia)
Comment piaknop aomleh...