Hehpihna tha ~ Peter Suumpi
India gam leilu lam ah Kalimera akici khuano khat om hi. Tua khua ah leitang hoih lo ahihman in bang mah kiciing thei lo hi. Khuami te pen zawng lua mahmah ahihman in an zong akham un ne zolo uh hi. Khua tawh akigam lua lo mun khat ah lamzikpi khat om in tua lampi tung ah mawtaw pen kisia in khawl thei zel hi.
Khat vei nektheih apua mawtaw khat tua lampi tung mun khat ah hong kibung in ken ah hong kia hi. Mawtaw hawlpa liam in mawtaw dang khat tawh zato akipuak ahihman in mawtaw acing ding mi omlo hi. Tua thu athei khua mite in tua nektheih te gu in inn ah ciahpih uh hi. Tua bang teng tawh inn kim in ni tawm no sung nek ding an hong nei uh hi.
Hih thu hong pian khit aakipan khua mi te in ngaihsutna khat hong nei uh hi. Mual tawh kinai le mual aa piang tawh nunta in tui tawh kinai leh tui aa piang tawh nungta cih mah bang in mawtaw lampi tawh kinai ahihman un tua lampi tawh hong nuntak sawm uh hi.
Ahizong in mawtaw te atawmtung aa kibung hilo mawk ahihman in khua mi te in ngaihsutna khat hong nei uh hi. Nitak lampi tung ah mawtaw a pailoh laitak in khua mite in lampi tung pen tupek te tawh to in lapi susia uh hi. Tua hileh lampi akawm akuak tam in mawtaw kibut nawh zaw ding cihna ahi hi.
Mawtaw te in lampi hoih lo lua ahihman in hong dam hawl uh hi. Tua laitak in khua mite in mawtaw hawlpa theih loh kal in anung pan avan te guksak uh hi. Atung lam in ahihleh nektheih bek gu uh hi. Dam dam in van dang zong hong gu uh in khuapi sung te ah vazuak kik uh hi. Tua akipan agu bek hinawnlo in aluh ciang dinmun hong hita uh hi.
Hun tawmvei sung in hih lampi pen alauhuai pen lampi hong suak hi. Kha sim in buluhna le gukna tawh akidim lampi hong suak hi. Tua guta te palik te in man in thong akhiat uh hang in khua mi te lau tuanlo in gu eve uh hi. Tua bek thamlo in palikte mat zawh in hong om nawnlo in gukdan luhdan hong siam zaw tham uh hi.
Khua mite pen buluh ding apawl pawl in kikhen in agal-et ding pawl, thupuak ding pawl cih bang in kikhen dimdiam uh hi. Aguk uh van te a inn te uh ah sel in palik te in azon ciang in atheih zawh nawnloh nading in atunna bung te na ngawn laih uh hi. Kumpi thunei lam te in zong tua khua mite kiang ah aguk nawnloh nading uh, thudik in anuntak nading in hanciam in lam alak uh hi.
Ahihang in Kalimera khua mi te pen buluh gamtatna sungah nuamsa khin ta uh hi. Hih bang in bangmah gimpi in sepkullo aa nuntak theih pen zongsang khinta uh hi. Thau lak van luh cih pen kalimera khua kim ah atawntung in piang hi. Tua pan kipan in mawtaw hawl tampi te in tua Kalimera khuakim aa lampi hong pel ta uh hi. Tua ahihman in khua mi te nekding neilo in ni tampi hong om uh hi.
Nikhat vanpua mawtaw khat in tua Kalimera khua gei aa lampi zui in hong pai hi. Mawtaw tung ah phosphate vui ip tampi pua hi. Hih phosphate te pen nasepna aa zat ding ahi hi.
Khua mite in mawtaw amuh phet un umcih in luhpah uh hi. Mawtaw hawlpa in khua mite ii luhna amuh ciang in a mawtaw khawlsak in Kalimera khua sung dong ah va zui hi. Mawtaw khawl ahihman in khua mite aluhna lemzaw tham hi. Lau vetlo takin mawtaw bup in luh gai uh hi.
Mawtaw hawlpa pen khua sung ah va lut in kua mite kiang ah avan apiakkik nading un va thum hi. Ahizong in khua mite in ko gu kei ung ci in nial uh hi. Mawtaw hawlpa in athum thum hangin avan pia kik lo uh hi. Atawpna ah mawtaw hawlpa in hih avui te pen aki nektheih loh lam, nasepna ah zat ding ahihna thu, gu aneiihna thu, ne kha leng akisih theihna thu agen hi. Mawtaw hawlpa thuman gen pen khua mite in umlo uh hi.
Khua mite in athugen umlo uh ahihman in mawtaw hawlpa in acih nading theilo hong patau hi. Palik va ko ding cileh lah apaikhiat kal in khua mi te in ana nek khak ding lah patau hi.
Inn khat khit inn khat avahilh hi. Khukdin liangin “hih avui te ne kei un. Kisi thei hi” ci in agen hi. Mawtaw hawlpa in tua bang in agengen na hang in khua mi pawlkhat in mawtaw hawlpa thugen hong um hi. Mipawl khat in akpeuh pia sin hi. Ak apiak leh asawtlo in si takpi hi.
Tua pan in khua mite hong patau uh hi. Tua bek thamlo in alungsim tawng uh ah nasia takin hong kisuang mahmah uh hi. Mawtaw hawlpa na aguksak uh hi aa mawtaw hawlpa in tua khua mi te a muhdah ding ahi hi. Hih avui te ne in asih khit ding uh ahi hi. Hih pen amau tawh akituak mawhnadan lohna hi ci in amau um uh hi. Ahizong in mawtaw hawlpa in amau amuhdah loh bektham lo in tua avui te nek loh ding, amau nuntakna ahutna ding khukdin liang in thum hi. Hih bang itna lungsim, hehpihna lungsim le veina lungsim te in khua mi te hong maizum sak hi. Nakpi tak maizum sak hi. Khua mi te phosphate vui te mawtaw tung ah guansak kik uh hi.
Hih thu apian khit aakipan Kalimera khua mi te in van luh nawnlo uh hi. Van luh ding angaihsun mi aom ciangin “nidang aa lungsim hoih mawtaw hawlpa phawk in. Ama van ih guksak hangin aman ih khua zang in ih nuntakna hong honkhia hi. Amah ih phawkna in midang te tung ah siatna bawl ngam lai ding ih hiam? Ei tua zah dong ding in dawi gilo hita ih hiam?” ki ci uh hi.
Kalimera khua gei aa alampi tu in bit ta hi. Palik te in cing in thunei u lian te ii puahna hang hipeuhmah lo in lungsim hoih itna anei mawtaw hawl khat hang ahi hi.
Mihing te ih gamtat dan pen kikhel thei hi. Nang koi dan in kikhel ding na hiam cih tung ah kinga hi. Mihing te ii hehpihna in hong khanglo sak thei hi. Nang koi ci khanlawh ding na hiam cih tung ah kinga hi.
Mihing te ii lungtang sung ah hehpihna khau zang khat om hi. Tua khau zang pen itna tawh ih sai ciang in agin kiza hi. Midang te ii hehpihna na ngah nop leh amasa in nang neih hehpihna te zang khia masa in. Bang zah tak in atatsia mikhat pen nang ii hehpihna, veina leh na itna te in ama ii siatna te pan kikhel sak thei hi. Peter Suumpi Source : http;//www.daode.org
Comment piaknop aomleh...