Malaysia zato te ah gamdangmi te’n leibat RM50.5 million nei

Malaysia zato te ah gamdangmi te’n leibat RM50.5 million nei

Malaysia gamsung aom zato tuamtuam ah gamdangmi cina “Foreigner Patients” te’n zato lupman leiba apiakloh akigawm in RM50.5 Million pha cih theStar pan kiza hi.

Hospital Kuala Lumpur (HKL) bekbek ahzong 2012 kum akipan gamdangmi Foreigners te’n zato alupkhit ciangin piaklohin anutsiat Medical Bill akigawm in RM7.87 Million phakhinta cihi. Tuabangin zato lupman leiba apialo pen gamtuamtuam pan hi uh a, akigawm in gam 38 pha cihi.

Nungkum kumkhatsung bekbek inzong Malaysia gamsung aom Public Hospital alianpen ahi HKL ah leiba akipialo “Unpaid Bill” pen RM3 Million pha cimawk hi.

Malaysia Health Ministry te genkhiatna ah Malaysia gamsung aom Public Hospitals khempeuh ah leiba akipialo tammahmah cihi. Gambup ahuam in akituat ciangin gamdangmi te zato lupman avekpi akigawm ii seh 5 suah, sehkhat bang akipialo leiba in omcip cimawk hi.

Chowkit zato ihcih ziauziau Hospital Kuala Lumpur (HKL) te’n 2012 kum panin 2016 kumdong sum apialo, leiba aneiteng a etcian uhciangin Top 5 sungah Myanmar zong hongki helmawk hi. Leiba ahaupenpen Indonesia hi a, tuazom ah Myanmar ahihi. Tuakhit ciangin Bangladesh, India, Nepal cihbang ahihi.

Mizawnggam tebek in apialo hihetlo a, mihaugam in akituat Germany, Finland, Singapore, Sweden, Japan leh United States te nangawng in Malaysia gamsung aom Public Hospitals te ah sum piakloh, leiba naneimawk uhhi.

HKL panin thunei te genna ah tuabangin zato lupman leiba piakloh in aomte pen agam ciatciat ii Embassy ah kizasak, lai kikhak in leiba kisikkik cihi. Ahi zongin avekin ki ngahkimthei tuanlo a, 5% panin 10% khawngbek ki ngahkikthei cihi.

Sum apiak zawhlohna ahang lianpipen ahihleh Malaysia gamsung ah meltheih tanau “Next of kin” kician omlo, nasep kician neilo cihte hiphadiak cihi.

Tualo adang ahang pawlkhatte ahihleh lungsim kicinglo “Mental illness” aneipawl, innneilo nasep neilo avakthap “Homeless” pawl, agam ii Embassy in apanpihloh pawl, Insurance kician aneilo pawl, nasepna apu Boss te’n akinloh pawl cihbang ahihi.

Tuabangin zato lupman leiba piakloh tamlua mahmah ahih manin nungkum akipan kumpi thunei te’n gamdangmi Foreigner te zato alupding ciangin Deposit tampipi piasak hamtang uhhi.

UNHCR (United Nations High Commissioner for Refugees) Card atawite zong Refugee Medical Insurance (Remedi) aneih hamtangding uh kisam hi ci’n thunei te’n genkhia uhhi.

Thupaizia atelkhollo mi pawlkhat te’n Malaysia kumpi in hongnenbawl acitawh, agammi te ciangin pekkhat khawngtawh zato lumthei, ei gamdangmi te hong gawtbawl acitawh, aphunphun omsawnsawn hi. Amau agammi te’n asumlut ii Percentage bangzahhiam khat Tax “Siah” apiak tangtang uh ahihi. Ei gamdangmi te’n bangmah kumpi tungah Tax ihpiak omlo ahih manin, amau tawh ihngahna aki lamdangding mah ahihi.

Chowkit zato HKL ahzong tukum March kha akipan “Out Patient” ki ngahnawnlo cih ACTS pan kizasawn hi. ZD Sawltak #zomidaily