Malaysia gamsung ah vankham RM22 Million manneiding kimankhia

Malaysia gamsung ah vankham RM22 Million manneiding kimankhia

Malaysia gamsung ah guihtheih khamtheih vankham “Drug” bekbek akigawm in 300kg kimankhia a, asum in akituat ciangin RM22 Million bang manneiding cih theStar pan kiza hi. Hih vankham tengpen Terengganu, Selangor, Penang sungteng ah Bukit Aman te makaihna tawh abanban in buluh kawikawi in akimankhia ahihi.

Tukumsung Bukit Aman te makaihna tawh vankham kimanlak ah tam akimanpenpen “biggest seizure ever” hiding hi ci’n thunei te’n genkhia uhhi.

Bukit Aman Narcotics Crime Investigation Department (NCID) panin thunei te genkhiatna ah hih vankham “syabu” tepen Thailand panin Malaysia, East Coast States ahi Kelantan leh Terengganu te nawkin honglut hi ci’n genkhia uhhi.

Hih vankham hizah amat khiattheih nadingin Bukit Aman Narcotics Crime Investigation Department (NCID) leh Special Tactical Intelligence Narcotics Group (Sting) te kipawlkhawm in amatkhiat uh ahihi.

Vankham tepen niangteh bangdan in Chinese Tea Packet sungah aki selsim ahihi.

Bukit Aman NCID director Comm Datuk Seri Mohmad Salleh in agenkhiatna ah hih vankham tetawh mi 6 kiman in, tuate pen kum 25 pan kum 53 kikal vive hi ci’n genkhia hi.

Amasa in Bukit Payung ah kibuluh masa in, tualai panin mi 2 kiman khiapah hi. Tuaban ah Lorry Container sungah akiselsim vankham Syabu zong 288.5kg ki mukhia hi. Tuakhit ciangin Klang paninzong mi 1 kimatbeh leuleu hi.

Tuakhit ciangin Penang sungpan in mi 3 kimatbeh leuleu a, zatui Syabu zong 20.5kg tawh kimankhawm uhhi.

Video: Syabu worth RM20mil seized in biggest drug bust this year

NCID Director in tuni Thursday ni in hihvai tawh kisai in Press Conference bawl a, tualai ah vankham akimanteng RM22 Million bang manneiding hi ci’n genkhia hi. Tuaban ah mawtaw 4 leh vankham semte vanzat atuamtuam zong matsak uh a, tuatezong aman akituat ciangin RM260,000 bang manneiding cihi.

Related: Australia kipuaksawm Cocaine vankham $322 million manneiding lamkal ah kiman

Vankham pen Thailand gamsung panin gamgi ah honglutphei a, tuapan in Kuala Lumpur ah kipuak in, muntuamtuam ah akizuak kawikawi ahihi. Hih vankham sepna ah amakaipi, Mastermind kuahiam cihpen kumpi thunei te’n akansan laitak uh ahihi. Thailand leh Malaysia kumpi thunei te kipawlkhawm in hih vankham sepvai khakciptheih nadingin hanciam khawmding uh cih kiza hi. Sawltak #zomidaily