Malaysia, Setapak vengsung ah Hakha te numei khat temtawh kidawtlum

Malaysia, Setapak vengsung ah Hakha te numei khat temtawh kidawtlum

Malaysia, Setapak vengsung aom inndei khat ii lupna tungah Kawlgammi numei khat kidawtlum cihthu theStar pan kiza hi. Tua Kawlgam numeinu pen kum 26 aphakhin khat hi a, UNHCR (United Nations High Commissioner for Refugees) Card atawikhat ahihi. (theStar News sungah akigelhloh hangin hih asinu pen Hakha te hi a, amin pen Mai Iang Thabor kici hi. A pasal tawh akiteenzawh sawtnailo cih kizakbeh hi)

Zanni Sunday (Mar 19) nitaklam 8:45pm hunpawl in Setapak vengsung aom Jalan Genting Klang ah thupiang hi a, Shoplot inndei khat ii lupna tungah tua numeinu pen asisa in akimu ahihi. Amin apuam pen Malaysian Police te’n genkhianuam nailo uh cihi.

Wangsa Maju OCPD Supt Mohamad Roy Suhaimi Sarif ii genna ah hih numeinu pen alawmpa tawh tua inndei sungah inn asaapzawh uh khanih khawngbek hipan cihi. Alawmpa zong kum 27 aphakhinpan khat hi a, inndei asaapna ii anuai Ground Floor aom Restaurant ah Waiter asem ahihi.

Alawmpa pen nitaklam atawlngakpak Break Time hunin inntung asaapna uhah akahtohleh alawmnu pen lupna tungah aki dawtlumsa in na om cihi.

Tuaciangin alawmpa’nzong anasepna Supervisor pa zasakpah in, tua Supervisor pa’n Police te kiangah amanlang in Report bawlsakpah hi.

Palik te atunciang in lupna tungah tua numeinu pen silehnai tawh kidim zihziah in aom mu uh a, agil pen temtawh atawmpen 5 veibang kidawtding hi ci’n palik te’n genkhia uhhi. Zato panin Forensics te’n Monday ni Press Conference ah agenkhiatna ah hih numeinu pen akhut taklam ki at masa hiding ci uhhi.

Hih kithahna ah akizang temta zong asinu ii lupna nuai ah ki mukhia cihi. Palik te’n inndei sungteng asit uhciangin innsungah guklut “Forced Entry” cihbang omkeileh kilawm ci uhhi. Asinu ii azat Mobile Phone lobuang adang bangmah akigu, van amang omlo cihi.

Palik te’n alawmpa ii Mobile Phone zong kepsak uh a, tuaban ah ki thahlup laitak in akizangding in aki ummawh khepikaih khedap Slippers bunih zong palik te’n kem uhhi.

Hihvai tawh kizom in muanmawh Vietnam gammi kum 25 aphakhin khatleh Indonesia gammi kum 28 aphakhin khatzong palik te’n man uh a, alawmpa zong thusitding in Police Office ah ciahpih uhhi.

More: Malaysia Setapak Traffic khawlna ah mikhat kikaplum

Palik te genna ah hih buaina apianlaitak in agei ah omding in ki ummawh ahih manin, Indoensia leh Vietnam gammi tegel amat uh cihi. Aluanghawm pen Kuala Lumpur Hospital ah kipuak in, Postmortem kibawl cih kiza hi. Tusungteng Malaysia gamsung ah Kawlgammi te kidawtlum cih kilimzak mahmah hi. ZD Sawltak #zomidaily