Malaysia, Setapak vengsung ah Factory meikang in puakkham ziahziah

Malaysia, Setapak vengsung ah Factory meikang in puakkham ziahziah

Malaysia, Setapak vengsung ah zanni Monday zanlam in apuakkham, aginngaih mahmah pawlkhat kiza hi. Tuapen athu akikan ciangin Plastic vantuamtuam bawlna Factory khatpanin apuakkham om ahih manin, tamveipi apuakkham agingziahziah akiza kici hi.

Tuabangin Plastic Factory apuakkhapna munpen Jalan Genting Klang tung aom setzung khatpan ahihi. Ageinai panin amittawh amukha Eye-witness te genkhiatna ah nitaklam 7pm hunpawl in Setapak, Jalan Perusahaan Kiri aom Factory khatpan in apuakkham hi ci’n genkhia hi.

Apuakkham pen tamveipi akizom in apuakkham ngekngek hi a, akigawm in 20 vei valbang puakkhamding hi ci’n genkhia uhhi.

International Car Dealer ah Security Chief asem ahi kum 53 aphakhin Omar Dani Buyong in agenkhiatna ah tua Factory panin apuakkham aom ciangin meikuang pen vandawn ah kilawnto ziahziah cihi.

Amasa in meikuang pen tuazahpi hikhollo himahleh thakhatthu in hongkilawh ziahziah a, meikuang kitheh zaizai in, meikhu lumto khengkhang hi ci’n genkhia hi.

Tuabang in amuhphet in meiphelhzum ahi Fire Department te kasampah saisai hi ci’n Bernama News te tungah genkhia hi.

Tuabangin Factory panin apuakkham tepen an huanna in akizang Cooking Gas te hiding in ki ummawh a, ka Office uh hong lawhphei khakding ka patau mahmah hi ci’n Security Officer pa in genkhia hi.

Kuala Lumpur Fire & Rescue Department panin Senior Operations Commander asemkhat in agenkhiatna ah nitaklam 7:34pm hunpawl in patau kangmei om cih hongki zasak ahih manin, hongki zaksakzawh Minute 5 sungah aphuah ah kitungpah hi ci’n genkhia hi.

More: Malaysia, Setapak vengsung ah sangsia khat thautawh kikaplum

Kuala Lumpur khuapisung aom meiphelh nasep asem ahi Wangsa Maju, Hang Tuah, Cheras, Sentul, Keramat Fire Station mun 5 takpan in Firemen bekbek akigawm in mi 80 in delhpah ngeingai uh a, meikuang pen zanlam 10:32pm hunin phelhsiang zopan uhhi.

Hih meikatna hangin asi leh aliam kuamah kizalo a, meikat kipatna ahang taktakpen kumpi thunei te’n kancian laiding uh cih kiza hi. Sawltak #zomidaily