Malaysia, Rawang ah mawtaw nih kiphukha, numei 1 si in tampi liam

Malaysia, Rawang ah mawtaw nih kiphukha, numei 1 si in tampi liam

Malaysia gamsung aom Rawang Toll Plaza gei ah Proton mawtaw nih kilim phutkhak mahmah ahih manin numei khat in sihlawh a, adangzong mi tampi liam cih theStar pan kiza hi. Asi numeinu pen Proton Saga mawtaw tungah Passenger in atuang hi a, ahawlpen apa ahihi. Tuni Sunday (12 Feb) ni zingsang 7am hunin Jalan Rawang – Batu Awang lamziktung ah thupiang ahihi.

Gombak palik thunei te genkhiatna ah Saga mawtaw hawlpa in a mawtaw hawlsung ah Passengers mi 8 apua hi a, Rawang Integrated Industrial Park sungah nasemding in apuakding in apailaitak cihi. Tualeh alanglam panin mawtaw khattawh kiphukha in atuahsia gawp uh ahihi.

Lampi langlam panin Proton Persona mawtaw khat ummawh lohpi in hongkawiphei vatin tuatawh kiphukha cihi. Mawtaw hawl Drivers te nihzong limliam mahmah uhhi.

“Selangor Fire and Rescue Department” pan thunei khat ii genna ah hih tuahsiatna Accident apian ciangin Distress Call hongkisampah a, aphual ah Firefighters mi 8 in kidelhpah cihi. Distress Call hongki zaksakpen zingsang 7:10am hun ahihi ci’n genkhia hi.

Naupang zong mi 5 bangin hih Accident hangin liamlawh uh a, avek un Hospital Sungai Buloh ah kipuak uh ci’n genbeh hi.

Asipen ii aluanghawm zong Hospital Sungai Buloh mahah Post-mortem bawlding, aluang kheiding in kipuaksuak hi. Asipen ii ameltheih khat ii genna ah asinu pen Kalumpang, Hulu Selangor lamah Excursion apaiding in akuankhia cihi.

Tua Excursion paidingin Rawang ah aki tuntuah masading uh hi a, tuapan in Bus Ferry tawh Kalumpang lamah apaisuaksawm uh cihi.

Asi numeinu pen unau numei 4 lakah a upapen ahihi. Aluanghawm pen Country Homes, Rawang ah kivuiding ci’n ameltheih khatin genkhia hi. Mawtaw tuahsiatna apianna pen mawtawhawl polhtehman “reckless driving” ci a, Road Transport Act 1987 tawh kizui in thu kibawlding cih kiza hi. ZD Sawltak #zomidaily