Malaysia gamsungah abeisa kalsung in Terrorist migilo 20 kimankhia

Malaysia gamsungah abeisa kalsung in Terrorist migilo 20 kimankhia

Malaysia gamsung ah abeisa kalsung in a ngongtatsawm thautawi migilo akigawm in mi 20 kimankhia cih theStar pan kiza hi. Tua migilo galkap “Militants” tepen Malaysia gamsung State 4 sungah muntuamtuam panin akimankhia uh ahihi.

Tua akimankhia migilo te sungah Malaysia gammi 7, Philippines gammi 7, Indonesia gammi 5 leh Northern Africa gammi 1 kihel uhhi.

Hih migilo tengpen abeisa November 30 panin December 15 kikal sungah Selangor, Johor, Sabah leh Kuala Lumpur State 4 sungpan in akimankhia uh ahihi. Bukit Aman Special Branch Counter Terrorism Division te makaihna tawh Eastern Sabah Security Command (Esscom) te’n panpih in aki mankhiathei ahihi.

Hihvai tawh kisai in palik ulian Inspector-General of Police Tan Sri Mohamad Fuzi Harun in agenna ah amasapen in kum 24 aphakhin ahi Indonesia gammi khatpen Johor, Pontian District sungah aki mankhia masa cihi. Tuapa pen “Jamaah Ansharut Daulah” akici migilo kipawlna Terror Group ah makaipi Senior Leader khat ahihi. Hihpa pen abeisa November 30 ni in aki mankhia masa ahihi.

Hih migilo tepen Syria gamsung ah IS migilo tetawh akipawlding in apaisawm uh kici a, apaitheih nadingun akisam sumte akaihkhop laitak in akiman uh ahihi.

Abeisa July khasung in Indonesia gamsung Bandung City sungah Bomb aki sukkhap hunlai inzong hihpa pen kihel hi ci’n Statement ah tuni Friday ni in ki genkhia hi.

Anihna akimanpa pen kum 46 aphakhin khat hi a, abeisa in sangsia Teacher asemngei khat ahihi. Hihpapen December 01 ni in Kuala Lumpur International Airport (KLIA) panin akiman ahihi.

Abeisa Malaysia gamsung ah akibawlsawm “Better Beer Festival” pawipi sungah buaina apiangsakding in akithawi, Terror Cell tetawh akizom kici hi. Teacher papen Kuching pan hi a, Southern Philippines gamsung aom Terror Cell migilo tetawh akipawl dingin apaisawm ahihi. (Southern Philippines akici Philippines gam ii leitawlam pen “Abu Sayyaf Group” akici IS tawh akizom migilo te ii phualpi ahihi)

Athumna akiman tepen Indonesia gammi 4 hi a, December 04 ni in Sandakan Town khuasung ah Esscom te’n amatkhiat uh ahihi. Hih mi 4 tepen Indonesia, Tarakan leh Nunukan khuapan in Southern Philippines gamsung nawkin Malaysia, Sabah State sungah thumanlo illegal tawh aguklut uh ahihi.

Tuakhitzawh akimanpen kum 50 aphakhin Philippines gammi khat ahihi. Hihpa pen a gammipih Filipino te zawnkawikawi in Philippines gamsung aom migilo kipawlna “Abu Sayyaf Group” tetawh akizomding in mi azonzon laitak in Kuala Lumpur, Kepong Area sungah December 06 ni in akimankhia ahihi.

December 10 ni inzong Sandakan Town sungpan in Malaysia gammi 6 leh Philippines gammi 5 kimatbeh leuleu hi. Hihte pen Southern Philippines gamsung aom Terror Group migilo tetawh akizom uh ahihi.

December 10 ni mahzong Johor, Masai khuasung ah Philippines gammi 1 kimatbeh leuleu hi. Tuapazong Phillippines gamsung ah gitloh gamtatna Terror Attack abawlsawm khatmah ahihi.

Anunung penpen akimanpa pen North Africa gammi pasalkhat hi a, KLIA ah December 15 ni in akiman ahihi. Hihpa pen Islamic State (IS) tetawh akizom hi a, abeisa inzong Turkey kumpi thunei te’n amatngei khat ahihi. Hihpa pen Malaysia gamsung ah tukha kipatlam pawlin alut hi a, gampualam panin “Foreign Enforcement Agencies” te tungtawn in hihpa aki mankhiathei ahihi.

Europe gamsung phadiak ah Christmas leh New Year cihbang Holiday pawi hunsung in migilo te ngongtatnuam phadiak ahih manin, Security kilimgin mahmah uhhi. Indonesia gamsung ahzong Christmas hunsung buaina aomloh nadingin Security kikhanding cih kiza hi. Sawltak #zomidaily