SEA Games akici Southeast Asian Games pen tukum 2017 kum aidingpen Malaysia gamsung ah atungding ahihi. Hih Malaysia gamsung ah akibawlding SEA Games pen a 29th SEA Games hita a, August 19 panin August 30 kikal Malaysia gamsung ah kibawlding hi.
Tulaitak leitung gamtuamtuam ah ngongtatna tampi kiza kawikawi ahih manin, hih Malaysia gamsung ah akibawlding SEA Games sungahzong bangmah nawngkaina aomloh nading, kidaltheih nadingin “Security Drill” kisinna ki bawlkik leuleuding hi.
Tutung akibawlding Security Drill pen Kuala Lumpur City Centre (KLCC) ah kibawlding a, Sunday leh Monday ninihsung kibawlding cih theStar in genkhia hi. Akibawlding ahunpen 8am panin 2pm kikal ci a, tu’nzong KLCC kuamsung ah palik tampi omzihziah khinta cihi.
Hih SEA Games vaitawh kisai in Security Drill akibawl ciangin khuasung akibawlna kuamsungteng ah Police bekbek honpikhat omzihziahding ahih manin bangmah lauthawngnading omlo hi ci’n City Police Contingent Headquarters pan mipi tungah zaksakna nei uhhi.
Malaysia gamusng aom ei Zomi tezong Zomi Daily panin aki zasaksawn ihhipah hi. Sunday leh Monday ah akibawlding ahi Kuala Lumpur City Centre (KLCC) kuamsungteng Security Drill hangin bangmah lauluatding hilo, Immigration Department te’ Operasi tawh bangmah kisaina omlo cih khencian theihding ihki zasakkhol hi.
SEA Games atun taktakma in Security Drill pen Malaysian Police te’n 5 vei bawlding uh cihi. Security Drill pen Malaysia gamsung muntuamtuam ah bawlkawikawiding uhhi.
KLCC Mosque, National Sailing Centre (Langkawi), International Endurance Park (Terengganu) cihte ahzong Security Drill kibawlding a, Bukit Jalil National Stadium ahzong khatveimah kibawlkik laiding cih kiza hi.
Hih Security Drill akibawlna ahangpen deihlohpen in tuahsiatna ngongtatna khatpeuh aomkhak zenzenle bangci bangin semding, vaihawmding cih kiginkholhna ahihi. Crisis Response Team te ii septheihna leh bangzahin manlang cihtezong aki sitciannopna ahihi.
Gamsung ah buaina aomloh nadingin Security Drill akibawl banah Scanners zong mipi lutnading “Entrances” khempeuh ah kithuahding a, alu khempeuh limtak in Scan kibawlding hi ci’n genbeh hi.
Related: Kuala Lumpur khuasung ah mawtaw nih kiphukha, University sangnaupang khat si
SEA Games (Southeast Asian Games) pen gamtuamtuam ah kibawl kawikawi in, Kawlgam ahzong 2013 kumin kibawlkhin hi. 2013 SEA Games pen Kawlgam khuapi Naypyidaw bekthamlo, Yangon, Mandalay, Ngwesaung Beach cihte ahzong kibawl in, gam 11 panin akimawl Athletes mi 4730 kihel uhhi.
1961 kum leh 1969 kum inzong SEA Games pen Yangon khuapi ah kibawlngei a, tuakhitzawh 2013 kumciang in Kawlgam ah aki bawlkikpan ahihi. Sawltak #zomidaily
Comment piaknop aomleh...