Malaysia, Klang Valley sungah guahtui tamluatna hangin kibuai ngeingai

Malaysia, Klang Valley sungah guahtui tamluatna hangin kibuai ngeingai

Malaysia, Kuala Lumpur leh Selangor sungah aluang Klang River pen tuzingsang tuikhanggawp ahih manin kibuai mahmah cih Malay Mail Online pan kiza hi. Zanni nitaklam 4pm hunpawl akipan Klang Valley sungah guahtamlua ahih manin, Klang River sungah tui adimlet ahihi.

Kuala Lumpur khuasung aom Masjid Jamek leh Jalan Tun Perak lampite zong tuidimgawp in, 2 Meter (6.5 Feet) bang luitui te khangtokhin hi.

City Fire and Rescue Department Operations Chief Samsol Maarif Saibani in agenkhiatna ah zannitak 6:05pm hunpawl in Wisma Teck Lee ah tui dimgawp ahih manin, ahuhding in Hang Tuah Fire & Rescue Department panin Firefighters pawlkhat ki paisak hi ci’n genkhia hi.

Tuipen Meter 2 bang khangto ahih manin, tuihupset Suction Pump te kizang in ki hupkhiasak cihi.

Jalan Melaka aom Bank Muamalat ii innnuai Underground Car Park ah akikoih mawtaw tezong awkcik cihi. Tui Meter 1 bang khangtomawk ahih manin, mawtaw 15 bang ki lakhiatheilo in awkcip cihi.

Ampang, Bukit Antarabangsa ahzong mi teenna Residential Homes te ii innnunglam ah mencim pawlkhat om cisawnsawn hi.

Riverdale Park Apartment aom tezong patau ahih manin Selangor Fire & Rescue Department te kaingah zasak uh cihi. Firefighters zong honkhat kipaisakpah ci a, ahi zongin mite teenna inntepen bangmah asia acim cihbang omnaisamlo cihi.

More: Guahtui tamlua ahih manin, Kuala Lumpur leh Petaling Jaya kikal mawtaw awkcip

Klang River luitui khanna hangin Masjid Jamek LRT Station geiteng ahzong tui dimgawp hi. Jalan Melayu aom Little India kicihna vengkiimteng ahzong tui tamlua in, vanzuak tezong patau mahmah uhhi. ZD Sawltak #zomidaily