Malaysia gamsung Klang vengah abeisa 21 August ni in Gas bung puakkham a, inntek nupinu liamgawp hi. Hospital Tengku Ampuan Rahimah ah kipuakpah in ni 8 sungbang akikep, akikhoi khitciang in zanni Sunday (28 August) nitaklam 6:30pm hunin hong nusiata cih The Star News pan kiza hi.
Hongnusia inntek nupinu pen kum 48 aphakhin Tan Bee Bee kici minnei khat ahihi. Amahpen a innsung ah Gas bung apuakkhap khitciangin apumpi khempeuh ii 80% bang liamgawp, meikanggawp hi.
Apasal pen Ee Kok Meng kici minnei khat hi a, kum 50 phakhin hi. Apasal ahihleh liamngawh lualozaw in, tulaitak Sungai Buloh Hospital ah akikep laitak ahihi.
A pasal pen Gas bung apuakkhap ciangin apumpi tungah 20% bang liamna ngah cihi. Ahi zongin tu in hoihtuamta a, azi asih madeuh in na pasal zong hoihtuamta, damsiangding hi ci’n asanggam te’n agenkhit ciangin lungnuamtuam leh kilawm a, ahudik damdam in beisuak hi.
Hihte nupa in ta 3 nei uh a, kum 17, 14, 11 cihbang hipan ahih manun asanggam te’n lunghimawhpih mahmah uhhi.
Eizong banghang in hih anhuanna Gas bung puakkham theimawk hiam cih ki lunghimawh mahmah hitaleh thunei te’n ahang genkhianai mahmahlo uhhi. Malaysia gamsung ah innkimphial in Gas tawh an ahuanlo omkhollo khading a, hihbang in puakkhamthei ahih mawkleh bangci bangin kidawmding, apuakkhamlo dingin bangci kidalding cihte zong theihnop huai mahmah hi. ZD Sawltak #zomidaily
Comment piaknop aomleh...