Lungkhamna zin bang kha ni.
(Break the worry habit. -By Dr. Norman Vincent Peale)
A lungkham den khat ii nasep pen hoih cih taktak om thei lo hi. Na khat peupeuh na sep ciangin na sep ngei loh khat ahiphial zongin lungkham ngaihsut luat ding hi lo a, kihtaak bawl luat ding zong hi lo hi. Bang hang hiam cileh hamsa mahmah dinga ih upmawh khat pen ih ngaihsutna sangin na baihzaw ek thei hi. Na khat peuhpeuh lungkham ngaihsut lua kei peuh lecin na sep bangbang hong nuam dinga, na lawhcing thei pan ding hi.
A nuai a thu kigelhte sim in zui zo lecin lungkhamna zin bang na kha thei ding hi.
(1). Don’t take yourself so seriously. Leitung ii puak vangik pen nang bek in puak sawm ken, na zo kei ding hi. Nang na nungta aa na si khin a hiphial zongin leitung pen a paizia ngeina in paipai lel ding cih tel inla, na puak vangik khat peuhpeuh lelh luat dingin ngaihsun kei lel in. Ki lungnuam sak lel in cihna hi.
(2). Tell yourself that you like your work. Na nasep khat pen nuam na sa kei zongin ihplah ning ci-in hanciam tentan in. Tua hileh a kawmkal a haksatna omte in na lungsim hong nawngkai sak zo lo ding hi. Nasep pen ei lungsim puakzia leh ei muhdan tawh kizui hilel a, baihsak nuam leng a baih hi pah a, haksa sak nuam leng a haksa hi pah hi. Na lungsim tawh na ngaihsut dan a thupi hizaw hi.
(3). Plan your work for today and everyday. Tuni a na sep ding leh nisim a na sep ding teng geel kholhsa in koih inla, tua tawh kituak in sem peuh lecin nasep khat peuhpeuh na lelh luat ding bangmah om lo hi.
(4). Decide that you will not try to do everything at once. Zingsang nasem na kuan ding ciangin “Ka sep nop khempeuh thakhat thu in zawh gaih pah ka sawm kei ding hi” ci-in khensatna bawl in. Na pen a hunzui a sep ding a hihi, tua hikei leh hun pen anai tawh kikhen lo ding hi. Bilpi bangin na thahatna suangin tai pah zanzan lecin na ngimna mun tung lo in lamkaal ah na tawl in na bah lel ding hi. Sumkuang bangin dam takin hih hiat-hiat lel lecin sau tungzo zaw ding hiciai!
(5). Determine to restudy your job. Na nasep dan kician takin enkik tangtang hamtang in. Tua hileh na kicinlahna teng na tel ding a, na khialhna teng na puah pha thei ding hi. Ni dang ciangin na nasep dan hong nuam semsem zaw ding hi.
(6). Discipline yourself. Nang leh nang ki ukzawh sawm in. Tuni a na sep ding tuni mah in zawh sawm inla, zingciang a sep dingin na khol bawl leh hong ki kholkhol dinga na sep taktak ciangin na tha in zo nawn lo ding hi. Tuni a sep dinga na geel kholhsa pen tuni mah in zo pah hamtang in. Khateh neisak ken.
(7). Never start your work without praying. Pasian khut sungah ki-ap masa lo pi in nasep kipan kha ngei ken. Thungen masa tangtang in. Tua hileh ngaihsutna hoih Pasian in hong guan dinga mi nungah na kipumpei niloh kei ding hi. Mit tawh na muh theih loh, khut tawh na lawn theih loh Pasian tawh a kopden na hihlam kiphawk tawntung peuh lecin na vangik haksatna teng aman hong puakpih dinga na van hong zaang ding hi.
Laigelh siam mipil minthang Dr. Norman Vincent Peale in hong vaikhak a tunga thu sagihte a zui zo kim ciat dingin ih biak Pasian in thupha hong pia ta hen.
– Francis lamthang (Zomi Quavadis)
Comment piaknop aomleh...