Malaysia, Kajang sungah Lorry khatin mawtaw neukhat taih in mi 2 si

Malaysia, Kajang sungah Lorry khatin mawtaw neukhat taih in mi 2 si

Malaysia Kajang vengsung ah Lorry mawtaw pi khatin mi 2 taihlum cih theStar pan kiza hi. Tua Lorry pen Traffic Light ah mei asankhinpipi himahleh taisuak teitei ahih manin, alanglam ah mei engta ci’n apaikhia mawtaw neukhat taihsuk khagawp cihi.

Aphutkhak mawtaw neupen Perodua Viva mawtaw namte hi a, asungah pasal nih atuang uh ahihi. Tua pasal nihte lakah khatpen apumpi damlo “Disabled Person” hisawnsawn hi. Lorry mawtaw pitawh akiphukha himawk ahih manin mawtaw pen depcipgawp a, asuang ah atuang pasal nihte zong liamgawp uhhi.

Mawtaw neu ahawlpa pen Izzaq Syameer Ifwan Suhaimi kici kum 26 aphapan khat ahihi. Anung tutna ah atuangpen Sha’ari Nuruddin kici kum 63 aphakhin khat hi a, apumpi damlo pen ahihi.

Tuesday (Mar 07) ni zingsanglam 10:45am hunpawl in Taman Pelangi sung aom lamkabom khatah aki phukha uh hi a, mawtaw neusung ah atuangte pen liamgawp uh cihi.

Semenyih Fire and Rescue Department te genkhiatna ah tuahsiatna aom ciangin hongki zasak ci a, aphual ah 10:50am hunpawl in katungpah uh cihi.

Mawtaw neu sungpan in aliam nihte lakkhia uh a, Beranang Health Clinic kipuakpah himahleh anih in si uh cih Medical Personal te’n khuanung genkik uhhi.

Agei ah amukha te genna ah Lorry pen Traffic Light asan hangin taisuak teitei in alanglam pan apaikhiata mawtaw neupen aphulgawp ci uhhi. Tua Lorry Driver papen a mawtaw nusia in, taimang ahih manin kimanzo nailo hi. Kajang Police te’n athu hoihtak ciamteh uh a, Witness tetawh Report bawlkhawm uhhi.

Mawtaw neu sungpan asi pasal tegel pen Hospital Serdang ah aluanghawm kheiding, Postmortem bawlding in kipuaksuak hi.

Malaysia gamsung ah mawtaw hawl pawlkhat in lamthukhun zuihetlo in, utbangbang in phenghawl gawpthei uhhi. Traffic Light khawngah meisan taleh eng taleh utut in ataisakgawp tampi omhi. Khuasung vakciang, lamzik kanciang kidop huai mahmah hi. ZD Sawltak #zomidaily