Cikha ah Phone line ki ngahta

Cikha ah Phone line ki ngahta

Zogam, Cikha khua ah GSM phone line ki ngahta cihthu kiza hi. Cikha Khua ah March Kha kipat lian in phone line ki ngah in, 4/3/2017 pan kipan in online kizang thei ci hi.

“phone line ngahta ahih man-in Zum lamtawh kisai nasep na ah ahi zong, thuthak khat pepeuh ahi zong kiza baih thei tading in, nasepna zong tampi tak nuamtuam inteh, online bel 3G H+ hisam in ahi zong deihbang in line hat naikei” ci-in Cikha aa Cidam nalam ah asem Siamah Didim in Zingsol tanu tetung ah hong gen hi.

Cikha Khua ah abei sa hunte in phone line CDMA 450 te leh India phone line bek ki ngah aa, CDMA phone zong kilim zat thei tatak khol lo ban ah India phone pen India lampan Line khak le uh zattheih loh hi.

“Phone line aki ngahna hang in na, Cikha khua aa aom Khangno te in Thuthak(News) khat pepeuh kitheih baih tading, thumuhna zong hong tangzai zaw ding, tuateng pan in Mundang, Gamdang aa aom Sanggam, U Leh Nau, Lawm leh gual tetawh kizop na honglem mahmah ta” ci-in Cikha Khua Khangno Makai khat ahi Sia Khual in gen hi.

Cikha khua ah Inn 250 pha aa, Kawlgam leh India Gamgi aa aom khua khat ahi hi.

“Nidang CSO’s meeting khat pepeuh om leh Cikha hongsap nop uh ciang Tonzang ahih kei leh Tedim pan hongsam sawn uh in, tun bel Cikha Khua mah Direct tak aa hongho thei ding uh ahih man in Lungdam huai mahmah ci-in Sia Khual in genbeh hi.

Asawt lo in zong online page pan Cikha Khua Thuthak Tangko theih nading khat neihzawh nading Khangno lam ahan ciam laitak uh ahi hi. CS Mung/ Zingsol