Malaysia gamsung aom “illegal immigrant” te naseptheih nading E-card kipiading

Malaysia gamsung aom “illegal immigrant” te naseptheih nading E-card kipiading

Malaysia gamsung aom “illegal immigrants” peemta te naseptheih nadingin kumpi in phalna piading cih Bernama News pan kizasawn hi. Tua naseptheih nadingin apiaksawm uhpen tawmveisung zatpakding “Temporary Card” ahih keileh Enforcement Card (E-card) kiciding hi. Malaysia gamsungah aomsa “illegal immigrants” tepen “legal” takin na aseptheih nadingin avaihawmsawm uh ahihi.

Malaysia Immigration Director-general Mustafar Ali ngiatin hihvai genkhia ci a, hih E-card pen “Valid Travel Documents” aneinawnlo te adingin tawmvei zattheih pakding “Temporary Verification” ahihlam zong genkhia hi. Hih E-card pen Peninsular Malaysia sung aom Immigration Offices khempeuh ah February 15 ni panin June 30 nidong Application ngetna kibawl theiding cihi.

Immigration Director-general Mustafar in Press Conference ah zanni in agenkhiatna ah Malaysia pen tulaitak nasemding mi tawmlua “Shortage of Manpower” ahih manin, hih Program akivaihawm ahihlam genkhia hi. Malaysia gamsung ah “illegal immigrants” pen mi 400,000 panin 600,000 kikalbang omding in ki ummawh a, tuate pen hih Program tungtawn in Register akibawlkhit ciangin naseptheih nadingin ki vaihawmding cihi.

Peninsular Malaysia sung aom Economic Sectors 5 sungteng ah hih gamdangmi te in nasemtheiding uh ci a, tua aseptheih nading Sectors 5 tepen Construction, Plantation, Services, Manufacturing, Agriculture cihte ahihi.

Hih E-card ngahtheih nadingin Agent kisamlo a, adeihte ngiatin Immigration Office ah siauhtheih ahihi. Tuaban ah hih E-card ngahtheih nadingin sum beiloding, amawkna Free in kipiading cihi.

Ahi zongin Register bawlciangin anasepna apute (Employers) te’n azuih uh kulsak hamtang a, tuaban ah Criminal Record neilo, adang Boss te kiangpanin ataikawikawi hilo leh acidam hiding, Health Screening akibawlciang poina aneilo hiding cihte kisamsak cih kiza hi. ZD Sawltak #zomidaily