Malaysia gamsung ah khamtheih zatuizuak Kawlgammi 5 kiman

Malaysia gamsung ah khamtheih zatuizuak Kawlgammi 5 kiman

Malaysia, Kedah State sungah Kawlgammi guihtheih khamtheih azuak “Drug Trafficking” mi 5 kiman cih theStar pan kiza hi. Tua akiman Kawlgammi 5 tepen UN Card atuh (Fake) atawi vive cisawnsawn hi.

Tua kawlgammi zatui zuakna kimatna panin guihtheih khamtheihzong tampitak kimankhia cih Police te’n genkhia hi. Akimankhia guihtheih khamtheih zatui tepen:
Psychotropic Pills acih uh zatang 12,480
Yaba Pills acih uh zatang 1380
Syabu acih uh Cocaine 5.41 gm
cihbang in mankhia uh a, amatkhak khempeuh uh asumtawh akituat ciangin RM95,000 bang manneiding cihi.

Deputy State Police Chief khat ii genkhiatna ah amasa in palik te’n Bandar Utama, Sungai Petani aom innkhat buluh uh a, tualai ah mi 3 mankhia uh cihi. Tuapen Tuesday ni nitaklam 5pm hunpawl ahihi.

Mi 3 amatlak ah numei khatzong kihel in, adang nihte pen pasal hi a, kum 28 leh kum 38 phakhin uhhi. Anumeinu pen kum 25 bek hipan a, pasal kum 38 aphakhinpa ii azi hiding in ki ummawh hi. Zatui zuakkawm leh zatkawm athuah uh hihtuak hi.

Hihtawh kizom in Wednesday ni ciangin SUV (Sports Utility Vehicle) mawtaw khat Lunas, Kulim ah nitak 5:30pm hunpawl in manleuleu uhhi. Tuasung panin pasal kum 40 aphakhin khatleh numei kum 42 aphakhin, akigawm in mi 2 man uhhi. Tuatenih pen nupa hiding in ummawh uhhi. Mawtaw sungahzong zatui tampi mankhia uhhi.

Palik te’n hih amatkhiat mi 5 tepen avek in kizopna neiding in ummawh uh cihi. Guihtheih khamtheih azuak uhzong kha 3 valbang phakhin in, palik te’n asulzuih thapai uh hihtuak hi.

Avek in akiman mi 5 hi a, December 16 khitciang bekin thusitna ompanding hi.

More: Saudi Arabia ah thukhenna innpi in mi 15 sihdaan pia

Zatui tepen Malaysia gamsung ah azuak kawikawi uh hi a, Malaysia gamveng te panin hongkipuak hiding in ki ummawh cih kiza hi. Akiman mi 5 tepen UN Card atuh atawi uh ahih manin, amin taktakpen kigenkhia nailo hi. Kuate himawk dinghiam? ZD Sawltak #zomidaily