Malaysia gammi IS galkap tumsawm mi 2 kiman

Malaysia gammi IS galkap tumsawm mi 2 kiman

Syria gamlam zuanin IS galkap tumdingin apaisawm Malaysia gammi 2 kiman cihthu theSun pan kiza hi. Hih akiman tegel pen kum 29 leh kum 24 cihkhawngbek phapan uhhi. October 28 ni in Syria gamsung alutsawmna panin Turkish kumpi thunei te’n natheikhia uh a, amat uh ahihi.

Tuapan in Turkish Authorities te’n Malaysia gamsung ah honglehpuakkik uh a, October 30 ni KL International Airport (KLIa) hongtung uhhi. Tuamun pan Bukit Aman Special Branch Counter Terrorism Division te’n na dawntuah uh a, gilbem sungah nadengsuakna uhhi.

Hih galkap tumsawm tegel pen Malaysia panin Syria gam apaiding uh kitheisak nuamlo uh ahih manin, amasa in Butterworth panin Thai gam khuapi Bangkok ah October 28 ni in lengphei masa uhhi.

Bangkok panin Abu Dhabi ah Transit bawlmasa uh a, Turkey khuapi Istanbul nazuan uhhi. Tuapanin Turkish kumpi thuneite’n azia uh thei ahih manin, anamat uh ahihi.

Akiman lakah khatpa pen Johor ah Technician asem khat hi a, adang khatpa ahihleh Sarawak ah nasemmi khat ahihi.

Hih tegel pen Syria gamsung aom Malaysia gammi khat ahi, IS sungahzong athunei mawhlo Mohamad Wanndy Mohamad Jedi kicipa in kaihkhop hiding in ki ummawh a, asumbei khempeuh zong amasik hiding in ki ummawh hi.

October 09 ni inzong Malaysia gamsung muntuamtuam ah kumpi thuneite’n Operation (Operasi) nasiatak bawluh a, migilo hiam gamtattawh akizom mi 16 mankhia uhhi. Tua Operasi akibawlna pen Selangor, Kelantan, Perak, Kedah, Penang, Sabah cih State sungteng ahihi. ZD Sawltak #zomidaily