Teelna Vive ~ Rev. Fr. Damian Dal

Teelna Vive ~ Rev. Fr. Damian Dal

Nisim in teelna (choice) vive hi in, teelsiam na’ng haksa mahmah hi. Utna leh deihna kikal nangawn ah, kikol taang thei a, honghonkhia ding midang omlo in, ei le ei ki etcian kik theihna bekmah honghuh ding lawm hoih ahihlam ih phawksemsem hi.

Mailamthu in sunmang hi a, geelna lian, tupna lian le cihtak tentan na bek tawh, suangthuu thum bangin dingkhawm in, ih kalsuan liailiai hi.

Apiangding thu hongpiang in, atungdingthu hongtunga; Sunmang te zanmang hongleh suakkik theihlam ihphawk kha sansan hi. Tutding le din ding nangawn khatveivei teel hak lua a; Sepding le seploh ding thu in, teelhak zawlai hi.

Banghangin hi ci in, ih om denden hiam? Banghanghiamcih ka lungngaingai a, anuai athu kamu hi. Tua thu in, keihongkhem ding ‘vangnei u nau nga’ om in, anga un, sunlehzan, mial le vak ci lo in, keimahtawh omkhawm den hi.

Tua u naunga te in;

• (i) muhna (seeing)
• (ii) zakna (hearing)
• (iii) alim a al theih na (tasting and smelling),
• (iv) sukkhak na pan theihna (touch)
• (v) thu ngaihsut na (reasoning power)te ahi hi.

Ih muhnate hoih le man i sa a, ihmuhloh aman leh ahoih tampi ih nusia kha hi.

Ih zakna man isa a, ihzakloh thu ihkin bawl khakei thei hi. Genteh na in ci leng, thulang up, ei thubek thusa cih dan..adang tampi omlai kha ding hi.

Alim a al, athuk akha te sila in ih om a, hoihlo thei napi, nialzo lo in, athu ihmang kha ham tangzel hi. Genteh na, zatep, tuibuk, khaini, zu, beer cih te leh adang tampi te.

Ih ngaihsutna man isa a, ih ngaihsut zawhloh thute manding in ih umzo kei thei hi. (Adiak diak in Pasianthu tawh kisai..Siangthopumpi thu cih te pawl).

Tua hi in, ahoih pen ding ih teel a, ahoih pen cih aom loh lam ih thei hi. Anuam pending ih teel a, anuampen cih ihciam kha ngei kei hi. Leitung nuntakna hu kasan laiteng, hih vanglian u nau nga teng in,kei hongkhemden ding cih kathei a, lau in kaling hi.

• Tua ngateng kantan in, nungta zo leng, Pasian thu um taktak ka hi ta ding hi.
• Topa in hongteel sak kei leh, leitungah bang kateel ngam ding hiam?
• Hih ngateng in, teel na ah, siapi hongsem den hi. Ahoih lamin honghuh hun a om mah bangin, ahoihlo lamah zong hongpai pih den hi.

Hih unau nga tenghangin, thuhoih thupha ih thei a, amau te hangmah in, siatna sung intung thei hi. Hi vanglian unau nga tawh bangci kakithuah dinghiam..teelhak kasa hi. By Rev Fr damian dal