Malaysia Factory khatah numei 172 te zawhthawh thutawh sila bangin nasem in kikhumcip

Malaysia Factory khatah numei 172 te zawhthawh thutawh sila bangin nasem in kikhumcip

Malaysia, Klang vengsung Jalan Pasar aom Factory khatah numei honkhat zawhthawhthu tawh nasemsak in agawtbawl mahmah Boss khat kimankhia cih theStar pan kiza hi. Tua nasem te lakah Myanmar, Indonesia leh Malaysia gammi pawlkhat zong kihel uh cihi.

A nasepna uhpen Bird’s Nest Factory kici Sente’n zatui in azat uh vasabu bawlna khatah hi a, Tuesday ni in Malaysia Home Ministry te’n akankhiat uh ahihi. Boss papen Datuk Title aneikhat hidepzawlai mah a, ahi zongin mihing lungsim neilo in, nasem numei te pen nikhat in nai 16 valval semsak in, tawlngakni cihbang piavetlo cihi.

Bird’s Nest Factory ah asempen numei bekbek akigawm in 172 tak pha uhhi. Boss papen kum 29 aphakhin khat hi a, Tuesday ni in Anti-Trafficking in Persons leh Anti-Smuggling of Migrants Unit te’n mankhia theita uhhi.

Hihpa pen “Anti-Trafficking in Persons and Smuggling of Migrants Act 2007, Immigration Act and Employment Act” cih thukhun tetawh thu kibawlding cihi.

Thunei te genkhiatna ah hih Datuk pa in nasem bekbek numei 172 nei a, tuate pen Myanmar, Indonesia leh Local Maalaysian pawlkhatzong kihel uh cihi. Nikhat in atawmpen nai 16 pan atungsiah utleh utloh tawh kisailo in na semsakden a, tawlngakni cihbang piavetlo cihi.

Na asepsep uhhangin khasumzong hoihtak pialo in, piasunsun lehzong ahunlap in pia ngeilo hi. Pawlkhat acina in na semzokeileh khasum tampipi katsukgawp a, pawlkhat pen khakhat in RM200 leh RM300 kikal khawngbek ngahsak cimawk hi.

Hih Bird’s Nest Factory pen 2014 kumpek panin akipan hi a, hihsung ah nasem numei tengpen nasephun sawtlua leh nasep gimlua uh ahih manin atamzaw pen lungsimzong manzotak nawnlo hileh kilawm ci’n thunei te’n Reporters te tungah genkhia uhhi.

Myanmar leh Indonesia panin nasem in apai tezong mundang ah ataikhiat theihloh nadingin Passport te kepcipsak uhhi. Tuaban ah pawlkhat pen Passport leh Visa tungah innteeng nasemding, Domestic Workers ding kici himahleh hih Factory ah semsak in khumcip cihi.

Nasem in aom numei tepen kum 18 pan 40 gual vivepawl hi uh a, asepzawh uhpen kum 2 pan kum 3 kikal asemcip vive hi uh cihi.

More: Bangladesh Factory meikang hangin mi 23 si, 70 val liam

Hih Bird’s Nest Factory kankhiatna Operation ah akihel pen Selangor police anti-vice, gaming and secret societies division, Bukit Aman police, immigration and manpower departments cihteng hi uh a, akisam bangin thu bawlding uh cih kiza hi. ZD Sawltak #zomidaily