Video: Malaysia ah suntangpi in damiah te’n piteekkhat ii sumbawm suhsak

Video: Malaysia ah suntangpi in damiah te’n piteekkhat ii sumbawm suhsak

Pasal khatin nupikhat ii asumbawm asuhsak laitak Video Clip pen Social Media tungah ki thehzak hi. Hih thupiang pen Malaysia, Kelantan, Kota Baru khuasung aom Jalan Hamzah kici lampinawl khatah thupiang ahihi.

Mivan asuhsak damiah guta “snatch theft” khatin nupikhat ii asumbawm “Handbag” pen thatang hatthu tawh asuhsakgawp laitak Video akizaihkha ahihi. Tua nupinu pen kum 72 aphakhin, piteek khat hi a, atha hatnawn hetlo apai liamliam theibekkhat hihtuak hi.

Hihbang in piteek khat sumbawm aki suhsak laitakpen ageinai aom CCTV panin Video Record akibawlkha ahihi. Piteeknu pen asumbawm akisuhsak khitciangin tuksuk in, alu tatsuk sawnsawn ahih manin, tawmvei khuaphawklo hileh kilawm hi.

Khua aphawk ciangin damdam in hongkizia in, adinsawmleh hawkguam sungah kiasuksuak sawnsawn hi.

Hih sumbawm akisuhsak laitak Motorcycle khattawh anawkkha khatin kiciantak in muding himahleh huhlo kici sawnsawn hi. Piteeknu pen hawkguam sungah kiasuksuak sawnsawn ahih manin, ageinai ah mawtaw apaipai, anawknawk hangin kuamah in mupaklo kici hi.

Video: Shocking daylight snatch theft, Kelantan, Malaysia

Akitheih ciangin tua nupinu pen Hospital Raja Perempuan Zainab II ah kipuakpah a, alu liam kici hi.

Sumbawm asuhsak “snatch theft” guta tenihzong kimankhin a, anih un unau cisawnsawn hi. Unau in kithutuak takin nupi, piteek khat damiah ataih uh himawk hi. Tua unau guta damiah tepen kum 27 leh kum 33 aphakhin kici a, piteeknu damiah ataihzawh uh nai 1 sungin Police te’n mankhia theipah uhhi.

Ageinai ah amukha Witness te’n tua guta unau te ii mawtawzat a number plate ciamtehkha in, tuatawh asawtlo in Police te’n mankhiatheipah uhhi.

More: Kachin, Myitkyina aom Kanbawza Bank ah damiah lut, thein 920 puakhia

Hih damiah unaute pen abeisa 2013 kum inzong hihbangmah guktak gamtatna tawh akimanngei uh kici hi. Tuaban ah Police te’n Test abawl uhciangin zatui Drug azang, Methamphetamine azatlam uh kimukhia hi. Police te’n piteeknu ii asumbawm Handbag pen ngahsakkik uh a, asungah sum RM200 leh MyKad khatzong om kici a, Police te’n tua unau guta te thubawlding uh cih kiza hi. Sawltak #zomidaily