Malaysia, Banting innsung ah mi 4 aki haltumvai Update themkhat

Malaysia, Banting innsung ah mi 4 aki haltumvai Update themkhat

Malaysia, Banting vengsung ah zanni in innkhat ki haltumsak a, asungah mi 4 takin sihlawh uhhi. Tua asi mi 4 te lakah nupa kopkhatzong kihel uhhi. Tua nupakop tepen apapi kum 73 aphakhin Chia Tee Nang leh azi kum 68 aphakhin Lim Mai Shak kici te ahihi.

Anupa un Vietnam gamsung ah Holiday hunnuam zangkhawm in, Malaysia gamsungah aciahkik khitzawh ni 2 khitciangin guta damiah te’n amau innsungah meitawh ahallum uh ahihi.

Hih nupa tepen vokkhawina “Pig Farming Business” anei uh hi a, atute 3 tawh sangkhaksung School Holiday nuamtak zangkhawmding cih geelnazong anei uh ahihi.

Atute lakah kum 10 leh kum 12 aphate pen amautawh aomkhawm uh hi a, kum 3 aphakhinpan pen ahihleh ahawhpak ahihi. Tua kum 3 aphapanpen Kuala Lumpur khuasung ah anu apa tetawh aom uh hi a, meitawh akihaltum madiak in apute kiangah aom ahihi.

Hun awng nuamtak zangkhawmding “quality time together” cih ngimna, geelna nei in, atute 3 tawh aomkhop laitak in, a innsungah guta te lut uh a, aneihsa adeihteng alaksak banah ami mahmahzong temtawh satgawp in, tuakhit ciangin amitawh a inntawh mei ahaltumsak himawk hi.

Asi nupa te ii atate genna ah hih apate innsungah guta damiah te alut hunsungpen Minute 15 sungkhawng hidinghi ci’n genkhia uhhi.

Atute 3 tawh aomkhop laitakin guta damiah te alut hi a, tua atute lakah kum 12 aphakhin naupangno pasalno khat suakta bibel hi. Tua naupangno pen inn akatziahziah laitak in Video akizaihkha khat om a, tua Video sungah naupangno in thupawlkhat genkhia hi.

Video: Grandparents-grandsons bonding holiday ends in tragedy

Kapu te innsung ah migilo guta honglut in, kapu kapi leh ka sanggamte 2 hong thahlupsak in, meitawh hong haltumsak hi ci’n genkhia hi. Amahpen bangci bangin suaktathei nahihiam ci’n akidot ciangin dailenbuk Toilet sungah kakibu a, gutate innpanin apaikhiatphet in kataikhia cihi.

More: China Petrol Station khatah mei akihal laitak hanciam in aphelh tantan nasem te kipahtawi

Guta tepen amai uh maituam Mask tawh tuamcip ahih manin, amel katheikei cisawnsawn hi. Tua naupangpa pen lungsim gimlua in zato ah kikem cihi. Naupangte ii anu apa te’nzong na samahmah uh a, hihbangliang in kua gamtatna hilawmlawm hidinghiam ci’n khasia mahmah uhhi. Asuakta naupangno kum 12 pen ii lungsimzong bang acimawkdiam, amuhtang in api apu leh asanggamte 2 tak aki thatlum, mei kihaltum himawk a, tua naupang ii lungsim cidamna zong sukha mahmah khadinghi. Sawltak #zomidaily