Malaysia ah Zomi Nam Ni siim phei – 1 ~ Hau Za Cin

Malaysia ah Zomi Nam Ni siim phei – 1

Kum dang mah bangin tukum zong Zomi Nam Ni hong tun ding ciangin Zomite tawh zat khawm ngeingai ding kilunggulh in kei mimal takin zong ka kithawi khol simsim hi. Singapore a om Zomi leh Malaysia ah om Zomi khempeuh in zangkhawm kik leng cih makaite ngaihsutna a om ciangin ‘pha ei’ ciin ka thukim pah a, tua tawh kitona pai ding ka lungsim in ka khentat hi.

Zomite minam a hong bawl Pasian in hih ciang hong tonpihna lungdam ko khawm ding leh i omom na ah hong kep hong khoinate kikum khawm a mailam maban bangci kalsuan ding cihte genkhawm a mainawt khawm dingin Singapore pan in mi a man thei, a pai ut teng pai man koh leh koh kisik ciat in Bus tawh 18 Feb 2015 zan nai 9pm in a pai phei uh hi. A zingciang 19 Feb 2015 ni pen Malaysia a om Zomi khempeuh in mipi kikhawm in Zomi Nam Ni a zatkhawm ngeingai ni ding ahih manin ngaklah in koh zong nitak annek nangawn valh khin manlo, ka gawl vuah awk kawmkawm in ka dingkhia liang uh hi. Malaysia ah om Zomite tukum lawp lua in Zomi Nam Ni ni khat bek zat ding hawmthawh in ni thum zang ding ci ahih manun koh zong ‘nop tuak ei’ ka ci mai uh hi. Tua mana a ni khatna pan lap loh ding lau a annek valh khin manlo, kam khuah manlo, singgah ne manlo lianga ka annek kuang nangawn uh a mun ah nusia a tai heethaat ka hi uh hi. Sum zattawm dingteng Bus station ah khek tawm pak in, ka van uh zong a kisam pak teng bek guang in KL lam ka delh phei henhan uh hi.

Singapore gamgi ka tun uh ciangin ka van teng uh tawi ding hinapi pawlkhat bangin tawi kha lo in Bus sungah ka nusia uh a, ahi zongin Pasian huhna tawh bangmah na cilo bilbel hi. Sente kumthak sung ahih manin Singapore pan Malaysia zin nuam mi na tamlua mahmah a lampi khempeuh ah mawtaw dimin gamgi kanna zum khempeuh zong miksi pemta mahmah bangin na kimeizop diudeu hi. Mi tamlua mahmah ahih manin a vekpi un Zomi Nam Ni siim ding ka sa uh hi; amau lah a zinna ding uh hong hilhlo hiven 🙂

Zingsang nai 4am in KL tung pan:
KL ka zin ciangin Singapore pan nai 4 pan nai 5 sungin ka tung den hi. Tuzan zong tua dan ding ciin Zomi makaite ka hilhkhol a, nai 9pm a pai pen a ziakai pen nai 2am in tung ding ciin ka kamciam hi. Ka upmawh uh bangin kilamzanglo ahih manin zingsang nai 4am in ka tung pan uh a, ahi zongin Zomi makaite in mit hak teta in hong na dawn lai veve uh hi. Singapore pan a pai mi 14 teng maitai takin hong na dawn uh a, a car vuah hong pua in Zomi Innpi ah hong puak in zinbuk ah nuamtak a giak dingin hong tawldamsak uh hi. Ka khualzin sung khempeuh ah ka tun hak penpen ahih hang Zomite ki itna leh kikhualna hang tawh ka tawlloh penpen hun ahi hi.

Zomi hih mah nuam ngaungau ei.

Zingsang Kiallap Lim:
Zingsang ka thawh phet un lupna puansilh singkhia in ka diangto uh a, a gei a anzuakna ah niangtui leh moh a lim nono delh in a man masasa ka kizui ngelhngelh uh hi. Zan ihmut nuam in zingthawh nuam ahih manin kiallap ka vaikhak bangbang uh limtak in ka ne uh a, a ha lah bei hanhan, a tui lah kiam hanhan… lungsim ah nuam hanhan… Zomi Nam Ni zatna phual pai ding lah hong nai hanhan… ka lawpna uh lah hong khang hanhan…

Zomi Nam Ni ah pai phei pah saisai:
Kiallap ka nek khit phet un Zomi Nam Ni zatna ah pai phei ding ka cih uh leh Zomi Youth Association makaite Zogam pan hong zinte tawh ka kimu uh a, khut kilen in ka ‘kibansah’ ziahziah uh hi. Amau zong gam leh minam itna hang bekbek tawh a inn lum, a loma uh nusia a hong zin cih ka ngaihsut ciang ka khasiat bang hong suak liang hi. Ahi zongin Topa in Zomi leh Zogam a dingin i sepna khempeuh ah hong makaih ding, thupha hong pia in hong gualzawhpih ding a a gah khum mahmah a lo, a ne pen Zomi nang leh kei i hi veve ding hi. Amau minam adingin nu leh pa bang, sanggam u leh nau laizom bang hi a, panpih theihna khempeuh ah panpih ciat dingin ka khentat hi.

Zomi Khangno makaite tawh ka kimuh khit uh ciangin KL khuasunga mawtaw hoihnono Zomi te tuanna dinga hong tai keukeute khat lamgei ah khawlsak in a sungah ka lut pah uh hi. Ka pai nopna khempeuh vuah hong paipih in a sum nangawn la lo dek liangin hong pua nuam uh a, Zomi Nam Ni zatna ding mun ah hong tunpih uh hi. Ka paina lamdung vuah Zomi Nam Ni zang dinga khe tawh lamgei tuak ah a pai diamdiam, a kizui diamdiam Zolia Zotaang te muhnop mahmah hi. Numei naupang, nupi papi zong a om tei uh hangin khangno vive hizaw ahih manin lawp-huai mahmah hi. Koh mawtaw tawh a tuangte nangawn ka kum khit ma un lawmte zong hong tung to ngeingai uh a, Zomi Nam Ni zatna ding innpi Chinwoo Stadium mai tualpi ah maan kizaih ziahziah uh hi. A vei a tak vua Zodial, Zopuan, Zokhi kikhaite etlawm in kumpi David tausang tunga kikhai galhangte thaltang te ziahziah tawh kibang hi.

Zomi Nam Ni hun nai 11 a kipan ding pen koh nai 10:30am in ka tung uh a, innpi sungah mi na dim zihziah ta uh hi. A lutna kongkhak ah zong vaidawn nungak tangvalte in zopuan kilawm taka silh dimdiam in na ding dimdem uh a, a tung masasa angsuan na suansak in tua ciangin a suang masasa inn sung lut thei uh hi. Koh zong suang dingin ka kigual uh a, ka awmtung vuah ka suan khit uh ciangin ka lut phei pah uh hi. Ka vei lam vuah Zokhi, Zopuan, Zodial cih bang na kizuak zeizai a, laibu zong a tuamtuam na kizuak zihziah hi. Ka leinop a om hiam ciin ka et kiaukiau leh ka nung pan innpi sung lut nuam mipi hong tam lua mahmah ahih manin hong kiphu zuazua a lut loh phamawh ahih manin lei manlo in ka lutsuak hi. Kikhop tawp ciangin ka en kik ding ka cih leh kikhop tawp ciangin lawmte’n na zuak khin man uh a, na om nawnlo uh hi 🙁

Inn sungah music tumsiamte in tumging na tum ziahziah uh a, Zogam ngaihla, Zomi Nam Ni la cihte na kitum zihziah hi. Hun kipat ding nai 11 lah hong nai semsem ahih manin mipi dim phitphet kikal a paina ding lampi kihong tawnin ka lut pheiphei uh a, ka tutna ding uh mun ka tun uh ciangin zinmang dinga Zogam pan hong zin Rev. Dr. Go Chin Zam, Associate General Secy, GZA tawh ka kimu uh a, makaite mah na tung masa ahih manin Zomi adingin lungmuanhuai hi, ka ci hi. Makaite tung nunung hilo in makaite mipi tawh tung khawm, tung masa cih pen ‘khantoh gim nam’ hi khin hi.

Zomi hih hong nuam semsem…

(zop lai ding)

Hau Za Cin
Phuitong Liim
www.hauzacin.blogspot.com