Malaysia ah UN Card design athak ki zangtading

Malaysia ah UN Card design athak ki zangtading

Malaysia gamsung aom gambeel Refugee te ii tawiding UNHCR Card design athak tawh kibawlding a, aluiteng damdamin ki laihto taktak tading cih the Star News inzong pulak tahi. Hih UNHCR (United Nations High Commissioner for Refugees) Card athak pen Smartphone tawhzong velcianna, etcianna Verify kibawltheiding a, a Card anei taktak ahihleh ahihloh sittelna baihmahmah tading cihi.

Hih UNHCR Card athakpen Security Feature tampi tawh behlap in abawl uh hi a, 3D Holograms leh Bar Code namnih kihelsak uhhi.

Android ahih keileh iPhone khatpeuhpeuh panin Secure Quick Response (SQR) tawh a Card tung aom Bar Code te Scan ziauleng Card tawipa ii Biodata teng hongsuakpahding in abawl uh ahihi.

Hih Card thak pen tuni Tuesday ni in Malaysia Bukit Petaling aom UNHCR zumpi ah honpawi neitaktakta uhhi. Hih UNHCR Card athak pen Register a ngahthak te ahi zongin, Card tettan abeiciang a Renew te ahi zongin damdam in laihto saksak tading uhhi.

Hih Card thak Design pen Malaysia kumpi thunei te leh Goverment Agencies tuamtuam, Media tuamtuam te tungah lahkhiatna ki neikhinta hi. Card tettan pen abeisa hun mahbang in kum 1 pan kum 3 kikal hiding cihzong kiza hi.

Abeisa hunsung ah UN Card pen atuh bawltawm baihlua mahmah ahih manin, atuh tamlua in buaina tampitak piangsak khinhi. Tuahang in Malaysia UNHCR leh kumpi thunei te kikumkhawm in UNHCR Card design athak hongbawlkhia uh ahihi.

Theihding: Hih UNHCR Card athakpen Malayia gammi hihna ID Card cihbang hilo a, nasep theihna phalna zong aki ngah hituan nailo hi. ZD Sawltak #zomidaily